വിദ്യാർഥിയായിരിക്കുമ്പോൾ തന്നെ സ്ഥാപനങ്ങളെക്കുറിച്ചു മനസ്സിലാക്കാനും അവയിൽ പ്രവർത്തിക്കാനും അവസരമൊരുക്കാൻ ഇന്റേൺഷിപ്പ് അവസരമൊരുക്കും . പൊതുവെ ഇപ്പോൾ എൻജിനീയറിങ് വിദ്യാർത്ഥികൾക്ക് മാത്രമാണ് വിദ്യാർഥികൾക്കു കോഴ്സിന്റെ ഭാഗമായി ഇന്റേൺഷിപ്പ് നിര്ബന്ധമായിട്ടുള്ളത്. അതുകൊണ്ടു തന്നെ ഇന്റേൺഷിപ് എൻജിനീയറിങ് വിദ്യാർത്ഥികൾക്ക് മാത്രമുള്ളതാണെന്നാണ് പൊതുവെയുള്ള ധാരണ. എന്നാൽ മാറ്റ് വിഭാഗങ്ങളിലും ഇന്റേൺഷിപ്പിനു പ്രാധാന്യം ഏറിവരികയാണ്. ഇന്റർവ്യൂവിൽ തിളങ്ങാനും മികച്ച കരിയർ സാദ്ധ്യതകൾ കണ്ടെത്താനും ഇന്റേൺഷിപ്പ് സഹായകകരം തന്നെ.
ചില ഇന്റേൺഷിപ്പുകളിൽ വിദ്യാർഥികൾക്കു പ്രതിഫലം ലഭിക്കും. പെയ്ഡ് എന്ന് ഇവ അറിയപ്പെടുന്നു. ചിലതിൽ ഒന്നും ലഭിക്കില്ല. പണം നോക്കി ഇന്റേൺഷിപ്പുകൾ തിരഞ്ഞെടുക്കരുത്. മറിച്ച് അതുവഴി ലഭിക്കുന്ന നൈപുണ്യവികസനം , ഭാവിയിൽ ഉരുത്തിരിയുന്ന തൊഴിൽ സാധ്യതകൾ എന്നിവയാണു പരിഗണിക്കേണ്ടത്. ഇന്റേൺഷിപ്പുകളുടെ ഏറ്റവും വലിയ ഗുണങ്ങളിലൊന്നാണു നെറ്റ്‌വർക്കിങ്. വലിയ സ്ഥാപനത്തിൽ ഇന്റേൺഷിപ്പിനു പോകുമ്പോൾ അവിടെയുള്ള ഉന്നത ഉദ്യോഗസ്ഥരെ പരിചയപ്പെടാൻ അവസരം ലഭിക്കും. ഇത് മികച്ച കരിയർ സാദ്ധ്യതകൾ കണ്ടെത്താൻ സഹായിക്കും .
വിവിധ മേഖലകളിൽനിന്നുള്ളവർക്കു കേന്ദ്ര സർക്കാർ വകുപ്പുകളും പാർലമെന്റ് ഉൾപ്പെടെയുള്ള ഭരണഘടനാ സ്ഥാപനങ്ങളും വാതിലുകൾ തുറന്നിട്ടു കാത്തിരിക്കുകയാണ്. ചിലതിന് അഞ്ചക്ക സ്റ്റൈപൻഡുമുണ്ട്.

സിവിൽ സർവീസസ് ലക്ഷ്യമിടുന്നവർക്കു കേന്ദ്രസർക്കാർ സ്ഥാപനങ്ങളുടെയും മറ്റും പ്രവർത്തനം അടുത്തറിയാൻ ഡൽഹിയിൽ ചുവടുറപ്പിക്കുന്നതാണ് നല്ലത്. ഇന്റേൺഷിപ് വാഗ്ദാനം ചെയ്യുന്ന ചില കേന്ദ്ര സർക്കാർ വകുപ്പുകളും സ്ഥാപനങ്ങളും ഇവയാണ്

വിദേശകാര്യ മന്ത്രാലയം
ഐഎഫ്എസ് ഉദ്യോഗസ്ഥരുടെ കീഴിൽ ആറു മാസം വരെ പ്രവർത്തിക്കാനുള്ള അവസരമുണ്ട് .എന്നാൽ പ്രതിഫലമില്ല. ബിരുദധാരികൾക്ക് വർഷത്തിൽ എപ്പോൾ വേണമെങ്കിലും അപേക്ഷിക്കാം. പഞ്ചവൽസര കോഴ്സുകളിൽ മൂന്നു വർഷം പൂർത്തിയാക്കിയവർക്കും അപേക്ഷിക്കാം. ഒരേ സമയം 30 പേർക്കാണ് അവസരം. അപേക്ഷകളിൽ സൂക്ഷ്മ പരിശോധനയും ഇന്റർവ്യൂവും ഉണ്ടാകും.

ലോക്സഭാ സെക്രട്ടേറിയറ്റ്
ലോക്സഭാ സെക്രട്ടേറിയേറ്റിൽ രണ്ടു തരം ഇന്റേൺഷിപ്പുകൾ ഉണ്ട് . ആദ്യത്തേത് പിജി കഴിഞ്ഞവർക്കു 3 മാസം ഉള്ള ഇന്റേൺഷിപ്പ് സൗകര്യമാണ്. ഇതിൽ ആദ്യ രണ്ടു മാസം 20,000 രൂപ വീതവും മൂന്നാം മാസം 30,000 രൂപയും സ്റ്റൈപൻഡ് ലഭിക്കും .
അടൂർത്ത 18 വയസ്സ് കഴിഞ്ഞ ബിരുദ വിദ്യാർഥികൾക്ക് ഒരു മാസത്തെ ഇന്റേൺഷിപ്പാണ് . 25,000 രൂപ സ്റ്റൈപൻഡ് ലഭിക്കും . രണ്ടിനും ഉയർന്ന പ്രായപരിധി 30 വയസ്സ്. വർഷം 50 പേരെ തിരഞ്ഞെടുക്കും.

നിതി ആയോഗ്
ആറാഴ്ച മുതൽ മൂന്നു മാസം വരെ ദൈർഘ്യം ഉള്ള ഇന്റേൺഷിപ്പാണ് നീതി ആയോഗിൽ ലഭിക്കുന്നത് . എല്ലാ മാസവും പത്താം തീയതിക്കകം നിതി ആയോഗ് വെബ്സൈറ്റിലൂടെ അപേക്ഷിക്കാം. സ്റ്റൈപൻഡ് ഇല്ല.

കേന്ദ്ര ധന മന്ത്രാലയം
കേന്ദ്ര ധന മന്ത്രാലയത്തിൽ രണ്ടു വിഭാഗങ്ങളിൽ ഇന്റേൺഷിപ്പ് നൽകുന്നുണ്ട്
i) ഇക്കണോമിക് അഫയേഴ്സ് വിഭാഗം: ഫസ്റ്റ് ക്ലാസ് ഇക്കണോമിക്സ് ബിരുദവുമായി പിജി ചെയ്യുന്നവർക്ക് 6 മാസം വരെ ഇന്റേൺഷിപ്പ് അവസരമുണ്ട് . സ്റ്റൈപൻഡ് മാസം 10,000 രൂപ ലഭിക്കും .
ii) ധന വിനിയോഗ വിഭാഗം:
ഇക്കണോമിക്സ്, ഫിനാൻസ്, മാനേജ്മെന്റ്, നിയമ വിഷയങ്ങളിലെ പിജി വിദ്യാർഥികൾക്ക് രണ്ടു മുതൽ ആറു വരെ മാസം വരെ ഇന്റേൺഷിപ്പ് സൗകര്യമുണ്ട് . ഡിഗ്രിക്കു ഫസ്റ്റ് ക്ലാസ് ഉള്ളവർക്ക് മാത്രമേ ഇന്റേൺഷിപ്പിനു യോഗ്യതയുള്ളൂ . സ്റ്റൈപൻഡ് മാസം 10,000 രൂപ.

ഇലക്ട്രോണിക്സ് ; ഐടി
ഡിജിറ്റൽ ഇന്ത്യ ഇന്റേൺഷിപ്പിനു രണ്ടും മൂന്നും വർഷ എൻജിനീയറിങ് വിദ്യാർഥികൾക്ക് അപേക്ഷിക്കാം. സൈബർ സെക്യൂരിറ്റി, ഇ - ഗവേണൻസ്, സോഫ്റ്റ്‌വെയർ ടെസ്റ്റിങ് തുടങ്ങി വിവിധ വിഭാഗങ്ങളിലേക്കു മേയിലും ഡിസംബറിലും അപേക്ഷിക്കാം
2 മാസം ആണ് ഇന്റേൺഷിപ്പ് കാലാവധി . മാസം 10,000 രൂപ സ്റ്റൈപൻഡ് ലഭിക്കും

നാഷനൽ മ്യൂസിയം
സയൻസ്, ഹിസ്റ്ററി, ആർക്കിടെക്ചർ, ഡിസൈൻ, എൻജിനീയറിങ്, ഫൊട്ടോഗ്രഫി, ലൈബ്രറി മാനേജ്മെന്റ് തുടങ്ങിയ വിഷയങ്ങളിലെ ബിരുദധാരികൾക്ക് 6 – 12 ആഴ്ചത്തെ സമ്മർ-വിന്റർ ഇന്റേൺഷിപ്പുകൾ ഉണ്ട് . സ്റ്റൈപൻഡ് ഇല്ല .

റിസർവ് ബാങ്ക്
ബിടെക്, എംബിഎ, ഇക്കണോമിക്സ് / സ്റ്റാറ്റ് / ഇക്കണോമെട്രിക്സ് / ബാങ്കിങ് / ഫിനാൻസ് പിജി യോഗ്യതയുള്ളവർക്ക് അപേക്ഷിക്കാം . മാസം 35,000 രൂപ വരെ സ്റ്റൈപൻഡ് ഉണ്ട് . കുറഞ്ഞ കാലപരിധി 6 മാസം. വർഷത്തിൽ രണ്ടു തവണയാണു വിളിക്കാറുള്ളത്. കഴിഞ്ഞ ജൂലൈയിൽ ക്ഷണിച്ചിരുന്നു. കോംപറ്റീഷൻ കമ്മിഷൻ, നിയമ മന്ത്രാലയം, ഡയറക്ടറേറ്റ് ജനറൽ ഓഫ് ഫോറിൻ ട്രേഡ്, സ്റ്റാറ്റിസ്റ്റിക്സ് വകുപ്പ് തുടങ്ങിയവയിലും അവസരങ്ങളുണ്ട്

എൻജിനിയറിങ് വിദ്യാർഥികൾക്ക് പഠനശേഷം ഒരു വർഷം ഇന്റേൺഷിപ് നൽകുന്നതിനെക്കുറിച്ച് സർക്കാർ ആലോചിക്കുന്നതായി ഉന്നതവിദ്യാഭ്യാസ മന്ത്രി കെ ടി ജലീൽ പറഞ്ഞിട്ടുണ്ട്. മിക്കവാറും അടുത്തവർഷം മുതൽ ഇത് നടപ്പിൽ വരുമെന്ന് പ്രതീക്ഷിക്കുന്നതായും അദ്ദേഹം പറഞ്ഞു.

വിദ്യാർത്ഥികൾ തങ്ങളുടെ യോഗ്യതക്കും അഭിരുചിക്കും അനുസരിച്ച് മികച്ച ഇന്റേൺഷിപ്പുകൾ ചെയ്യുന്നത് കേറിയാൽ സാദ്ധ്യതകൾ വർദ്ധിക്കുന്നതിനും ഇന്റർവ്യൂവിലും മറ്റും മികച്ച സ്‌കോർ നേടുന്നതിനും സഹായകകരമാകും