അസംസ്‌കൃത എണ്ണയുടെ വിലയിടിവും ഗള്‍ഫ് രാജ്യങ്ങളിലെ സ്വദേശിവല്‍കരണ നടപടികളും മലയാളികളുടെ ഗള്‍ഫ് മോഹത്തിന് കടിഞ്ഞാണിടുന്നു. ആഭ്യന്തര പ്രശ്‌നങ്ങളും സാമ്പത്തിക പ്രതിസന്ധിയും വർദ്ധിച്ച് വരുന്നതും വിദേശരാജ്യങ്ങളിൽ മലയാളികളുടെ തൊഴിൽ സാധ്യത കുറക്കുന്നതിനു കാരണമാകുന്നുണ്ടെന്നാണ് ഇത് സംബന്ധിച്ച പഠനങ്ങളിൽ വ്യക്തമാകുന്നത് .ഇതിന് പുറമെ ഗള്‍ഫ് കുടിയേറ്റത്തില്‍ വന്നുകൊണ്ടിരിക്കുന്ന ആകര്‍ഷണക്കുറവും നിയമത്തിന്റെ നൂലാമാലകളും ഗള്‍ഫ് മേഖലകളില്‍ നിന്ന് മലയാളികളെ പിന്നോട്ടടിപ്പിക്കുന്നു
തൊഴിൽ അവസരങ്ങൾ കുത്തനെ കുറഞ്ഞതിനൊപ്പം വിദേശത്ത് നിന്ന് മടങ്ങുന്നവരുടെ എണ്ണവും കൂടുകയാണ്. പുതിയ മേച്ചിൽ പുറങ്ങൾ തേടി കടൽ കടക്കാൻ യുവതലമുറക്ക് മുൻപ് കാണിച്ചിരുന്ന ആവേശം ഇപ്പോൾഇല്ല എന്നതും ശ്രദ്ധേയമാണ് .
തിരുവനന്തപുരത്തെ സെന്റർ ഫോർ ഡെവലപ്മെന്റ് സ്‌റ്റഡ‌ീസ് നടത്തിയ സർവേ പ്രകാരം 2018ൽ വിദേശത്ത് ജോലി ചെയ്യുന്ന മലയാളികളുടെ എണ്ണം 34.17 ലക്ഷമാണ്. 2014ലെ കണക്ക് പ്രകാരം 36.5 ലക്ഷം മലയാളികൾ വിദേശത്ത് ജോലി ചെയ്‌തിരുന്നത്. 2.33 ലക്ഷം പേരുടെ കുറവ്.
പുതിയ ജോലികൾ തേടി വിദേശത്തേക്ക് പോകുന്നവരുടെ എണ്ണത്തിലും വൻ കുറവുണ്ടായി. 2014ൽ 24 ലക്ഷം പേർ വിദേശത്ത് പോയപ്പോൾ 2018ൽ ഇത് 21.2 ലക്ഷമായി കുറഞ്ഞു. 2.8 ലക്ഷം പേരുടെ കുറവ്. എന്നാൽ 2014ൽ 11.5 ലക്ഷം പേർ വിദേശത്ത് നിന്നും കേരളത്തിലേക്ക് മടങ്ങിയപ്പോൾ 2018ൽ ഇത് 12.94 ലക്ഷമായി വർദ്ധിച്ചു. അഞ്ച് വർഷത്തിനിടെ വിദേശ മലയാളികളുടെ എണ്ണത്തിൽ 2.36 ലക്ഷത്തിന്റെ കുറവുണ്ടായെന്നും സർവേയിൽ പറയുന്നു.
പരമ്പരാഗത തൊഴിലുകളിൽ മലയാളികളേക്കാൾ കുറവ് ശമ്പളം പറ്റുന്ന രാജ്യങ്ങളിലെ തൊഴിലാളികൾ രംഗപ്രവേശനം ചെയ്‌തതും സ്വദേശിവത്കരണം ശക്തമായി നടപ്പിലാക്കിയതുമാണ് മലയാളികൾക്ക് തിരിച്ചടിയായതെന്നാണ് വിലയിരുത്തൽ. നേരത്തെ മലയാളികൾ ചെയ്‌തിരുന്ന ചെറുകിട ബിസിനസ് സംരംഭങ്ങളിലേക്ക് കൂടി സ്വദേശിവത്കരണം നടപ്പിലാക്കിയതും വൻ തിരിച്ചടിയായി. ഇതിന് പിന്നാലെ ആഗോള സാമ്പത്തിക മാന്ദ്യമുണ്ടാകുമെന്ന ഭീതിയും തിരിച്ചടിക്ക് കാരണമായെന്നാണ് വിലയിരുത്തൽ. കേരളത്തില്‍ നിര്‍മാണ, കാര്‍ഷിക, സര്‍വീസ് മേഖലകളില്‍ അനുഭവപ്പെടുന്ന തൊഴിലാളിക്ഷാമവും ഉയര്‍ന്ന വേതനനിരക്കും ഗള്‍ഫ് കുടിയേറ്റം അനാകര്‍ഷമാക്കിയിട്ടുണ്ടെന്നും റിപ്പോര്‍ട്ടില്‍ ചൂണ്ടിക്കാട്ടുന്നു.

തിരുവനന്തപുരം ജില്ലയിൽ നിന്നാണ് ഏറ്റവും കൂടുതൽ പേർ വിദേശത്ത് നിന്നും മടങ്ങിയത്. വിദേശത്ത് ജോലി ചെയ്യുന്നവരിൽ ഏറ്റവും കൂടുതൽ മലപ്പുറം ജില്ലയിൽ നിന്നുള്ളവരാണ്. ഗൾഫ് മേഖലയിലാണ് ഏറ്റവും അധികം മലയാളികൾ തൊഴിലെടുക്കുന്നത്.