അമേരിക്കയിലെ സ്കൂൾ വിദ്യാഭ്യാസത്തെക്കുറിച്ച് ലഭിച്ച വിവരങ്ങൾ എന്നെ അത്ഭുതപ്പെടുത്തിയെന്ന് ഡോ.ഇഖ്ബാൽ ബാപ്പുകുഞ്ചു. പബ്ലിക്ക് സ്കൂളുകളിലും ചാർട്ടർ സ്കൂളുകളിലും പൂർണ്ണമായും സൌജന്യ വിദ്യാഭ്യാസം, ഫീസ് ഈടാക്കുന്നില്ല എന്നും അദ്ദേഹം പറഞ്ഞു.

ഫേസ്ബുക്ക് കുറിപ്പ് ഇങ്ങനെ;

സ്കൂൾ വിദ്യാഭ്യാസം അമേരിക്കയിൽ

അമേരിക്കയിലെ സ്കൂൾ വിദ്യാഭ്യാസത്തെക്കുറിച്ച് ലഭിച്ച വിവരങ്ങൾ എന്നെ അത്ഭുതപ്പെടുത്തി. ഇവിടെ +12 വരെ മൂന്നു തരം സ്കൂളുകളാണുള്ളത്. പബ്ലിക്ക് (Public), ചാർട്ടർ (Charter), സ്വകാര്യം (Private) . പബ്ലിക്ക് സ്കൂളുകൾ സർക്കാർ സ്കൂളുകളും ചാർട്ടർ സ്കൂളുകൾ സർക്കാർ എയ്ഡഡ് സ്കൂളുകളുമാണ്. പബ്ലിക്ക് സ്കൂളുകളിലും ചാർട്ടർ സ്കൂളുകളിലും പൂർണ്ണമായും സൌജന്യ വിദ്യാഭ്യാസമാണ് നൽകുന്നത്. ഫീസ് ഈടാക്കുന്നില്ല. പാഠപുസ്തകങ്ങളും സൌജന്യമായി നൽകും.

അവസാനം ലഭ്യമായ കണക്കനുസരിച്ച് 50.7 ദശലക്ഷം കുട്ടികൾ പബ്ലിക്ക്-ചാർട്ടർ സ്കൂളുകളിൽ പഠിക്കുന്നു. അതായത് 89.90 ശതമാനം. അതിൽ തന്നെ പബ്ലിക്ക് സ്കൂളുകളിൽ 94% കുട്ടികൾ പഠിക്കുമ്പോൾ ചാർട്ടർ സ്കൂളുകളിൽ 6% കുട്ടികൾ മാത്രമാണ് പഠിക്കുന്നത്, അതായത് സ്വകാര്യ സ്കൂളുകളിൽ പഠിക്കുന്ന കട്ടികൾ കേവലം 10.10 ശതമാനം മാത്രം (ചിത്രം: ടെക്സാസ് ഹൂസ്റ്റണിലെ പ്രശസ്തമായ പബ്ലിക്ക് സ്കൂൾ Carnegie Vanguard High School ഇവിടെ വിദ്യാർത്ഥി അധ്യാപക അനുപാതം 24:1)