അമേരിക്കയിലെ വിർജീനിയയിൽ നിന്നുള്ള ഒരു അസാധാരണ വാർത്തയാണ് ഇപ്പോൾ അന്താരാഷ്ട്ര തലത്തിൽ ശ്രദ്ധനേടുന്നത്. കഴിഞ്ഞ വർഷം ഒരു മദ്യശാലയ്ക്കുള്ളിൽ അതിക്രമിച്ചു കയറി ബോധംകെട്ടു വീണ റാക്കൂൺ എന്ന ജീവി ഇപ്പോൾ സോഷ്യൽ മീഡിയയിലെ വലിയൊരു താരമായി മാറിയിരിക്കുകയാണ്. കഴിഞ്ഞ വർഷത്തെ ബ്ലാക്ക് ഫ്രൈഡേ ദിനത്തിലായിരുന്നു ഈ രസകരമായ സംഭവം അരങ്ങേറിയത്. ഒരു പ്രാദേശിക മദ്യശാലയ്ക്കുള്ളിൽ ഒളിച്ചുകടന്ന റാക്കൂൺ, അവിടെയുണ്ടായിരുന്ന ബോക്സുകളും സാധനങ്ങളും പൂർണ്ണമായി തകിടം മറിക്കുകയായിരുന്നു. ഇതിനിടയിൽ ഏകദേശം ഇരുപതിനായിരം രൂപയോളം വിലവരുന്ന 14 മദ്യക്കുപ്പികളാണ് ഇത് തകർത്തത്. കുപ്പികൾ പൊട്ടിയതിനെ തുടർന്ന് മദ്യം അകത്താക്കിയ റാക്കൂൺ, അധികം വൈകാതെ കടയ്ക്കുള്ളിൽ തന്നെ പൂർണ്ണമായി ബോധംകെട്ട് വീഴുകയായിരുന്നു. പിറ്റേന്ന് രാവിലെ കട തുറക്കാനെത്തിയ ജീവനക്കാരനാണ് ചവറ്റുകുട്ടയ്ക്കും ശുചിമുറിക്കും സമീപം അബോധാവസ്ഥയിൽ കിടക്കുന്ന ഈ ജീവിയെ കണ്ടെത്തിയത്.

തുടർന്ന് സ്ഥലത്തെത്തിയ 'ഹാനോവർ കൗണ്ടി അനിമൽ കൺട്രോൾ' വിഭാഗം ഇതിനെ സുരക്ഷിതമായി തങ്ങളുടെ ഷെൽട്ടറിലേക്ക് മാറ്റി. അധികൃതർ പുറത്തുവിട്ട റാക്കൂണിന്റെ ചിത്രങ്ങൾ നിമിഷനേരം കൊണ്ടാണ് ലോകമെമ്പാടും വൈറലായി മാറിയത്. സംഭവം വലിയ ചർച്ചയായതോടെ ഈ മൃഗസംരക്ഷണ കേന്ദ്രത്തെ സഹായിക്കാനായി 'ട്രാഷ്ഡ് പാണ്ട' എന്ന പേരിൽ ഒരു ഓൺലൈൻ ധനസമാഹരണ ക്യാമ്പെയ്ൻ ആരംഭിച്ചു. ലോകത്തിന്റെ വിവിധ ഭാഗങ്ങളിൽ നിന്നുള്ള ആളുകളുടെ പിന്തുണയോടെ ഈ ക്യാമ്പെയ്നിലൂടെ ഇതുവരെ 2.34 കോടി രൂപയാണ് സഹായമായി സമാഹരിക്കാൻ കഴിഞ്ഞത്. ലഭിച്ച ഈ വൻ തുക മൃഗങ്ങൾക്കെതിരെയുള്ള അതിക്രമങ്ങൾ തടയുന്നതിനുള്ള പുതിയ അത്യാധുനിക ഉപകരണങ്ങൾ വാങ്ങാനും മൃഗസംരക്ഷണ കേന്ദ്രത്തിന്റെ വികസനത്തിനുമായി ഉപയോഗിക്കുമെന്ന് അധികൃതർ വ്യക്തമാക്കി. മൃഗസംരക്ഷണ വിഭാഗം ഉദ്യോഗസ്ഥർക്ക് ആവശ്യമായ ബോഡി ക്യാമറകൾ വാങ്ങുന്നതിനും, ഷെൽട്ടറിലെ മൃഗങ്ങൾക്കായി പുതിയ താമസസൗകര്യങ്ങൾ, കളിപ്പാട്ടങ്ങൾ, വലിയൊരു ഭക്ഷ്യസംഭരണ കേന്ദ്രം എന്നിവ ഒരുക്കുന്നതിനും ഈ പണം വിനിയോഗിക്കുമെന്ന് ഹാനോവർ കൗണ്ടി ചീഫ് ജെഫ്രി പാർക്കർ അറിയിച്ചു. നിലവിൽ ഈ വൈറൽ റാക്കൂൺ എവിടെയാണെന്ന വിവരം സുരക്ഷാ കാരണങ്ങളാൽ വെളിപ്പെടുത്താൻ അധികൃതർ തയ്യാറായിട്ടില്ല.