ഇരവിപുരത്ത് ഭർതൃവീട്ടിൽ യുവതി മരിച്ച സംഭവത്തിൽ ദുരൂഹത വർദ്ധിപ്പിച്ചുകൊണ്ട് നിർണായക തെളിവുകൾ പുറത്ത്. മരിച്ച സായയും സുഹൃത്തും തമ്മിൽ നടത്തിയ വാട്സ്ആപ്പ് ചാറ്റുകളാണ് ഇപ്പോൾ പുറത്തുവന്നിരിക്കുന്നത്. ഭർതൃവീട്ടിൽ സായ കടുത്ത മാനസിക വിഷമതകൾ നേരിട്ടിരുന്നുവെന്ന് വ്യക്തമാക്കുന്നതാണ് ഈ സന്ദേശങ്ങൾ. കഴിഞ്ഞ സെപ്റ്റംബർ 24-നാണ് ഇരുവരും തമ്മിൽ അവസാനമായി സംസാരിച്ചത്. "എന്താ പറ്റിയത് നിനക്ക്?" എന്ന സുഹൃത്തിന്റെ ചോദ്യത്തിന്, "വീട്ടിൽ സീൻ, വിളിക്കാം" എന്ന് സായ മറുപടി നൽകി. തുടർന്ന് ആരുമായാണ് പ്രശ്നമെന്നും ഭർത്താവ് അഫ്സലാണോയെന്നും സുഹൃത്ത് ചോദിച്ചപ്പോൾ, "എല്ലാവരും" എന്നാണ് സായ പ്രതികരിച്ചത്. ഇതിനുശേഷം സുഹൃത്ത് വീഡിയോ കോൾ ചെയ്തെങ്കിലും സായ ഫോൺ എടുത്തില്ല. ഒരു തവണ മാത്രം കാണാൻ കഴിയുന്ന രീതിയിലുള്ള ഒരു സന്ദേശവും സായ സുഹൃത്തിന് അയച്ചിരുന്നു. കഴിഞ്ഞ ഒക്ടോബർ 31-നാണ് സായയെ ഭർതൃവീട്ടിൽ മരിച്ച നിലയിൽ കണ്ടെത്തിയത്.

മകൾ ഒരിക്കലും ജീവനൊടുക്കില്ലെന്നും മരണത്തിൽ ദുരൂഹതയുണ്ടെന്നും കാണിച്ച് സായയുടെ കുടുംബം രംഗത്തെത്തിയിട്ടുണ്ട്. സായയുടെ ലാപ്ടോപ്പും ഡയറിയും കാണാതായിട്ടുണ്ടെന്നും, ഇതിലുണ്ടായിരുന്ന തെളിവുകൾ ഭർത്താവ് അഫ്സലിന്റെ വീട്ടുകാർ നശിപ്പിച്ചതായും മാതാവ് റിഹാനി ഷാജി ആരോപിച്ചു. സായയ്ക്ക് ഹൃദയസംബന്ധമായ അസുഖമാണെന്ന് പറഞ്ഞാണ് ഭർതൃവീട്ടുകാർ തങ്ങളെ വിളിച്ചുവരുത്തിയത്. എന്നാൽ തങ്ങൾ എത്തുമ്പോഴേക്കും മൃതദേഹം മോർച്ചറിയിലേക്ക് മാറ്റിയിരുന്നു. മരണം നടന്ന് നാല് മണിക്കൂറിന് ശേഷമാണ് തങ്ങളെ വിവരമറിയിച്ചതെന്നും കുടുംബം പറയുന്നു. സ്വന്തം വീട്ടിലേക്ക് ഫോൺ വിളിക്കുന്നതിൽ നിന്ന് പോലും അഫ്സൽ സായയെ വിലക്കിയിരുന്നു. അഫ്സൽ കാണാതിരിക്കാൻ സായ പല മെസ്സേജുകളും ഡിലീറ്റ് ചെയ്യാറുണ്ടായിരുന്നുവെന്നും മാതാവ് മീഡിയവണിനോട് വ്യക്തമാക്കി.
അന്വേഷണത്തിൽ പൊലീസിന് ഗുരുതരമായ വീഴ്ച സംഭവിച്ചതായും കുടുംബം ആരോപിക്കുന്നു. മരണം നടന്ന് 11 ദിവസത്തിന് ശേഷമാണ് പൊലീസ് തങ്ങളുടെ മൊഴിയെടുത്തതെന്നും, ഇതിനിടയിൽ ഭർതൃവീട്ടുകാർക്ക് തെളിവുകൾ നശിപ്പിക്കാൻ സമയം ലഭിച്ചതായും അവർ കുറ്റപ്പെടുത്തി. മരണത്തിന് പിന്നിലെ യഥാർത്ഥ കാരണങ്ങൾ പുറത്തുകൊണ്ടുവന്ന് മകൾക്ക് നീതി ഉറപ്പാക്കണമെന്നാണ് കുടുംബത്തിന്റെ ആവശ്യം.