ഞെട്ടിക്കുന്ന പ്രതിഫലം വാങ്ങി അവാര്‍ഡ് നിശയില്‍ അവതാരകരായി സല്‍മാനും ഷാരൂഖും
ബോളിവുഡിലെ അവാര്‍ഡ് നൈറ്റുകളുടെ സീസണിന് തുടക്കമിട്ട് സ്റ്റാര്‍ സ്‌ക്രീന്‍ അവാര്‍ഡുകള്‍ വിജയികള്‍ക്ക് നല്‍കി. ഇത്തവണത്തെ സ്റ്റാര്‍ സ്‌ക്രീന്‍ അവാര്‍ഡ്‌സിന് അവതാരകരായത് ഷാരൂഖ് ഖാനും സല്‍മാന്‍ ഖാനും. അമിതാഭ് ബച്ചന്‍ മികച്ച നടനും (പിങ്ക്) അലിയ ഭട്ട് മികച്ച നടി (ഉഡ്താ പഞ്ചാബ്) യുമായ അവാര്‍ഡ് നിശയിലാണ് അവതാരകരായി ഒരുമിച്ചെത്തി ഖാന്‍മാര്‍ കാണികളെ കൈയിലെടുത്തത്. ഷാരൂഖും സല്‍മാനും അവതാരകരായി എത്തിയതുകൊണ്ട് മാത്രം ശോഭ പതിന്മടങ്ങ് വര്‍ധിച്ച അവാര്‍ഡ് നിശയ്ക്ക് ഇരുവരും ഈടാക്കിയതും ഒരേതുക. 3 കോടി രൂപ വീതമാണ് പരിപാടിയില്‍ പങ്കെടുക്കുന്നതിനായി ഇരുവരും ഈടാക്കിയത്. വേദിയില്‍ വിജയികളുടെ പേരുകള്‍ പ്രഖ്യാപിക്കവേ ഒരുമിച്ച് സ്‌ക്രീനിലെത്തുന്നതിന്റെ സാധ്യതകളെക്കുറിച്ചും പറഞ്ഞു ഷാരൂഖും സല്‍മാനും.
നേരത്തേ രാകേഷ് റോഷന്റെ സംവിധാനത്തില്‍ 1995ല്‍ പുറത്തെത്തിയ കരണ്‍ അര്‍ജുന്‍ എന്ന ചിത്രത്തില്‍ ഇരുവരും ഒന്നിച്ച് അഭിനയിച്ചിട്ടുണ്ട്. പക്ഷേ അന്ന് താരതമ്യേന സ്‌ക്രീനില്‍ പുതിതാരങ്ങളായിരുന്നു ഇരുവരും. പിന്നീട് ഷാരൂഖ് ഖാന്റെ കുച്ച് കുച്ച് ഹോത്താ ഹൈയില്‍ സല്‍മാന്‍ അതിഥിതാരമായി എത്തി. സല്‍മാന്റെ ഹര്‍ ദില്‍ ജൊ പ്യാര്‍ കരേഗയില്‍ ഷാരൂഖും അതിഥിതാരമായി. 2007ല്‍ പുറത്തുവന്ന ഓം ശാന്തി ഓമിലാണ് ഇരുവരെയും അവസാനം സ്‌ക്രീനില്‍ ഒരുമിച്ച് കണ്ടത്.
രാഹുല്‍ ധോലക്കിയയുടെ സംവിധാനത്തിലെത്തുന്ന റയീസ് ആണ് അടുത്ത ഷാരൂഖ്ഖാന്‍ ചിത്രം. നവാസുദ്ദീന്‍ സിദ്ദിഖി മറ്റൊരു പ്രധാന കഥാപാത്രത്തെ അവതരിപ്പിക്കുന്ന ചിത്രം അടുത്ത റിപബ്ലിക് ദിനത്തില്‍ തീയേറ്ററുകളിലെത്തും. അതേസമയം സല്‍മാന്‍ ഖാന്റെ അടുത്തചിത്രം ചിത്രീകരണം പുരോഗമിക്കുന്ന ട്യൂബ്ലൈറ്റ് ആണ്. കബീര്‍ഖാനാണ് സംവിധായകന്‍.
https://www.facebook.com/Malayalivartha
