ബോളിവുഡില്‍ ഗോസ്സിപ്പുകള്‍ പതിവാണ്. പ്രത്യേകിച്ച് ലോകസുന്ദരി ഐശ്വര്യാ റായ്. തന്റെ മകള്‍ ആരാധ്യയോടും ഭര്‍ത്താവ് അഭിഷേകിനോടൊപ്പവും മാതൃകാപരമായ കുടുംബജീവിതം നയിച്ചുവരുന്ന ഇവരെക്കുറിച്ച് ഗോസിപ്പുകള്‍ ഒരു കുറവുമില്ലാതെ തുടരുന്നു. ഇങ്ങനെ ഗോസിപ്പുകള്‍ക്കുള്ള പ്രധാന കാരണം ഇവരുടെ ചിത്രങ്ങളിലെ പ്രണയരംഗങ്ങളാണ്. ഐശ്വര്യാ റോയ്അഭിഷേക് ബച്ചന്‍ ബന്ധത്തെക്കുറിച്ച് പാപ്പരാസികള്‍ പലതും പറഞ്ഞു നടക്കുന്നുണ്ടെങ്കിലും ഇന്നുവരെ യാതൊരുവിധ ഉലച്ചിലും സംഭവിച്ചിട്ടില്ല സംഭവിക്കുകയുമില്ല എന്ന് ഈ ദമ്പതിമാര്‍ പറയുന്നു.

സമീപകാലത്തായി റിലീസ് ചെയ്ത 'യേ ദില്‍ ഹൈ മുഷ്‌ക്കില്‍' എന്ന ചിത്രത്തില്‍ ഐശ്വര്യ രണ്‍വീര്‍ ജോഡികളുടെ കിടപ്പറ രംഗം വിവാദങ്ങള്‍ ആളിപ്പടര്‍ത്തിയിരുന്നു.

ഇതേക്കുറിച്ച് അഭിഷേക് ബച്ചന്റെ പ്രതികരണം ഇങ്ങനെ:

'നടി ഐശ്വര്യാ റായ് ലോകസുന്ദരി എന്ന നിലയ്ക്ക് അവരുടെ ചുറ്റിനും എപ്പോഴും പുരുഷന്മാര്‍ തടിച്ചുകൂടുക പതിവാണ്. പക്ഷേ ഈ ഒരു കാരണം കൊണ്ടായിരുന്നില്ല ഐശ്വര്യയെ ഞാന്‍ വിവാഹം ചെയ്തത്.' ഒരു ചടങ്ങില്‍ വച്ച് അഭിഷേക് പറഞ്ഞു: 'എന്നെ സംബന്ധിച്ച് ഐശ്വര്യാറായി ഈ ഭൂമിയില്‍ ഏറ്റവും വലിയ സുന്ദരിയാണ്. എന്റെ മുഖം കണ്ണാടിയിലൂടെ കാണുമ്പോള്‍ ഒരു തരം ഭീരുത്വമാണ് തോന്നുക. കാരണം എന്റെ മുഖം ക്രൂരമായി തോന്നും.

അതുകൊണ്ട് ഞാന്‍ അവരോട് മത്സരിക്കാന്‍ ശ്രമിക്കാറില്ല. ഞങ്ങള്‍ ഇരുവരും സൗന്ദര്യം മൂലം ഒത്തു ചേര്‍ന്നവരല്ല. സാധാരണ ജനങ്ങള്‍ അവരെ നേരില്‍ കാണുക അപൂര്‍വ്വം. ഞാനൊരു നടനെന്ന നിലയ്‌ക്കോ, ഒരു സൂപ്പര്‍ സ്റ്റാറിന്റെ മകനെന്ന നിലയ്‌ക്കോ, അവര്‍ ഒരു ലോകസുന്ദരി എന്ന നിലയ്‌ക്കോ അല്ല അവര്‍ എന്നെ വിവാഹം ചെയ്തത്.

ഞങ്ങള്‍ തമ്മിലുള്ള മാനസിക ഐക്യം, ആത്മബന്ധം എന്നിവയാണ് വിവാഹബന്ധത്തില്‍ എത്തിച്ചത്. അതുകൊണ്ട് സിനിമകളില്‍ ഐശ്വര്യ കിടപ്പറ രംഗത്തോ, ചുംബനരംഗത്തോ അഭിനയിച്ചാലും അവരോടുള്ള എന്റെ സ്‌നേഹവായ്പിന് ഒരു കുറവും അനുഭവപ്പെടില്ല. ഇതു മനസ്സിലാക്കിത്തന്നെയാണ് ഐശ്വര്യ ധൈര്യമായി അഭിനയിക്കുന്നതും.