മഞ്ജുവാര്യര്‍ തങ്ങള്‍ക്കൊപ്പമെന്ന് വിമന്‍ ഇന്‍ കളക്ടീവ്, രാജിവെച്ചെന്ന് താരസംഘടനയിലെയും ഫെഫ്കയിലെയും ചിലര്‍, എന്താണ് സത്യം?
ദിലീപിനെ താരസംഘടനയില്‍ തിരിച്ചെടുത്തതിനെ തുടര്‍ന്നുണ്ടായ വിവാദം കത്തിപ്പടരുന്നതിനിടെ മഞ്ജുവാര്യര്‍ വിമന്‍ ഇന്‍ കളക്ടീവ് സിനിമയില്‍ നിന്ന് രാജിവെച്ചെന്ന് റിപ്പോര്‍ട്ട്. അതേസമയം അതെല്ലാം അഭ്യൂഹങ്ങളാണെന്ന് ഡബഌൂ.സി.സി പറയുന്നു. ഇക്കാര്യത്തില്‍ മഞ്ജു ഔദ്യോഗികമായി വിശദീകരണം നടത്തിയിട്ടില്ല. മഞ്ജുവാര്യര്‍ മുന്‍കൈ എടുത്താണ് സംഘടന രൂപീകരിച്ചത്. ഇപ്പോള്‍ അതില്‍ നിന്ന് പിന്‍മാറാനുള്ള കാരണം എന്തെന്ന് വ്യക്തമല്ല. മഞ്ജുവിന് സ്വന്തമായ നിലപാടുകളുണ്ടെന്നാണ് രമ്യാനമ്പീശന്‍ പറയുന്നത്. എന്നാല്‍ മഞ്ജുവിന്റെ വ്യക്തിജീവിതത്തെ കൂടി ബന്ധപ്പെടുത്തിയുള്ള പ്രശ്‌നമായതിനാല്‍ വിവാദങ്ങളില്‍ നിന്ന് സ്വയം ഒഴിഞ്ഞ് നില്‍ക്കുകയാണെന്ന് രേവതി പറയുന്നു.
മഞ്ജു വിമന്‍ ഇന്‍ കളക്ടീവ് സിനിമയില്‍ നിന്ന് രാജി വെച്ച് മെയില്‍ അയച്ചെന്ന് പ്രശസ്ത സിനിമാ വാരികയായ നാന റിപ്പോര്‍ട്ട് ചെയ്യുന്നു. കൈരളി ചാനലിന്റെ ഓണ്‍ലൈനും ഇൗ വാര്‍ത്ത പ്രസിദ്ധീകരിച്ചിട്ടുണ്ട്. സംവിധായകന്‍ ശാന്തിവിള ദിനേശ് പലര്‍ക്കും വാട്‌സാപ് സന്ദേശവും അയച്ചിട്ടുണ്ട്. ദിലീപിന് വേണ്ടി ചാനല്‍ ചര്‍ച്ചകള്‍ നടത്തുന്ന ശാന്തിവിള ഇത്തരം സന്ദേശങ്ങള്‍ പ്രചരിപ്പിച്ചില്ലെങ്കിലേ അത്ഭുതമുള്ളൂ എന്ന് ചില സിനിമാ പ്രവര്‍ത്തകര്‍ പറയുന്നു. അവാര്‍ഡ് നിശയില്‍ പങ്കെടുക്കാന്‍ അമേരിക്കയില്‍ പോയ മഞ്ജു താമസിക്കാതെ തിരികെ വരും. ഇപ്പോഴുണ്ടായ വിവാദങ്ങളിലൊന്നും ഇടപെടാന്‍ താരത്തിന് താല്‍പര്യമില്ല.
അച്ഛന്‍ മരിച്ചതിന്റെ ചടങ്ങുകള്‍ ഇനിയും പൂര്‍ത്തിയാക്കാനുണ്ട്. അതിനാല്‍ വിവാദങ്ങളുടെ ഭാഗമാകാന്‍ താല്‍പര്യമില്ല. മോഹന്‍ലാലിന്റെ ഒടിയന്‍ അടക്കമുള്ള സിനിമകള്‍ പൂര്‍ത്തിയാക്കേണ്ടതുണ്ട്. അതിനാല്‍ മഞ്ജു കടുത്ത തീരുമാനം എടുത്താല്‍ താരസംഘടനയുടെ പ്രസിഡന്റായ മോഹന്‍ലാലിനെ അടക്കം അത് ബാധിക്കുമെന്ന് അറിയാം. മോഹന്‍ലാല്‍ അടക്കമുള്ള പലരുടെയും നിര്‍ബന്ധത്തിന് വഴങ്ങിയാണ് സംഘടനയുടെ സ്റ്റേജ്‌ഷോയില്‍ പങ്കെടുക്കാതിരുന്നത്. ദിലീപിനെ ഒഴിവാക്കി മഞ്ജുവിനെ പങ്കെടുപ്പിച്ചാല്‍ അത് വലിയ വിവാദങ്ങള്‍ക്ക് ഇടയാക്കുമെന്ന് പലരും താരത്തെ ധരിപ്പിച്ചു.
https://www.facebook.com/Malayalivartha
