ദിലീപ് വീണ്ടും ജഡ്ജിയമ്മാവന്‍ കോവിലിലെത്തി. നടി ആരകമിക്കപ്പെട്ട കേസില്‍ പ്രതിയായ ദിലീപ് ഇത് മൂന്നാം തവണയാണ് ക്ഷേത്രത്തിലെത്തുന്നത്. ഇതിനു മുന്‍പ് ദിലീപിന്റെ സഹോദരനുള്‍പ്പെടെയുള്ളവര്‍ പലതവണ ദിലീപിനായി ഇവിടെയെത്തിയിട്ടുണ്ട്. 

നീതി തേടി കോടതിക്കു മുന്നിലെത്തുന്നവര്‍ക്കും വ്യവഹാരങ്ങളില്‍ തീര്‍പ്പാകാതെ ബുദ്ധിമുട്ടുന്നവര്‍ക്കും ആശ്രയമായി മാറുന്ന ജഡ്ജിയമ്മാവന്‍ കോവില്‍. ഇവിടെയെത്തി പ്രാര്‍ഥിച്ചാല്‍ ഫലസിദ്ധിയുണ്ടാകുമെന്നാണ് വിശ്വാസം.

നടിയെ അക്രമിച്ച കേസില്‍ കുറ്റാരോപിതനായ നടന്‍ ദിലീപ് ജഡ്ജിയമ്മാവനെ കണ്ട് അനുഗ്രഹം തേടിയപ്പോഴൊക്കെ വാര്‍ത്തകളും മുറപോലെ പിന്നാലെയെത്തിയിരുന്നു. ഇപ്പോഴിതാ കോട്ടയം പൊന്‍കുന്നത്തുള്ള ചെറുവള്ളിയിലെ ജഡ്ജിയമ്മാവന്‍ കോവിലില്‍ നിറകണ്ണുകളോടെ എത്തി വഴിപാടുകള്‍ നടത്തിയെന്നതാണ് പുതിയ വാര്‍ത്ത. താരം എത്തിയ വാര്‍ത്ത പരന്നതോടെ വന്‍ ജനക്കൂട്ടം ക്ഷേത്രം വളഞ്ഞു. തന്നെ കാണാന്‍ എത്തിയവരോട് സൗഹൃദത്തോടെ പെരുമാറിയ ദിലീപ് ആവശ്യപ്പെട്ടവര്‍ക്കൊപ്പം സെല്‍ഫിയെടുക്കാനും നിന്നുകൊടുത്തു.

നടി ആക്രമിക്കപ്പെട്ട കേസില്‍ ദിലീപിന്റെ ജാമ്യാപേക്ഷ ഹൈക്കോടതി പരിഗണിച്ച ദിവസം സഹോദരന്‍ അനൂപ് ജഡ്ജിയമ്മാവന്‍ കോവിലിലെത്തി വഴിപാടുകള്‍ നടത്തിയിരുന്നു. ജാമ്യം ലഭിച്ചാല്‍ ഉടന്‍തന്നെ ദിലീപും ഇവിടെയെത്തുമെന്ന് അന്നുമുതല്‍ ക്ഷേത്രഭാരവാഹികള്‍ക്കിടയില്‍ നിന്നും സംസാരമുണ്ടായിരുന്നു.

ദിലിപിന്റെ സന്ദര്‍ശനത്തിനും മുന്നേ നീതി തേടിയെത്തിയ സെലിബ്രിറ്റികളുടെ നീണ്ട നിരയും അവരുടെ വ്യവഹാര കഥയും പങ്കുവയ്ക്കാനുണ്ട് ഈ ജഡ്ജിയമ്മാവന്‍ കോവിലിന്. പ്രശസ്തരായ അഭിഭാഷകരും ന്യായാധിപന്മാരും മാത്രമല്ല, രാഷ്ട്രീയ, സാമൂഹ്യം കായിക രംഗത്തെ പ്രമുഖര്‍ നിയമവഴികളില്‍ നീതി തേടി ഇവിടെ എത്താറുണ്ട്. ശ്രീശാന്ത്, ശാലു മേനോന്‍, സരിത എസ്.നായര്‍ എന്നിവര്‍ ഇവിടെ മുന്‍പ് വഴിപാടുകള്‍ നടത്തിയിട്ടുണ്ട്.