പ്രണവിന്റെ അരങ്ങേറ്റം ഉടന്‍ ആദ്യ ചിത്രം ജിത്തുവിനൊപ്പം. ഏറെ പ്രതീക്ഷയോടെയാണു ആരാധകര്‍ മോഹന്‍ലാലിന്റെ മകന്‍ പ്രണവ് മോഹന്‍ലാലിന്റെ സിനിമ പ്രവേശനത്തേ ഉറ്റു നോക്കുന്നത്. എന്നാല്‍ തന്റെ അഭിനയത്തിലേയ്ക്കുള്ള പ്രവേശനത്തെക്കുറിച്ചു മോഹന്‍ലാല്‍ പറഞ്ഞത് ഇങ്ങനെ. എന്റെ ഈ പ്രായത്തില്‍ ഞാന്‍ എന്തൊക്കെ ചിന്തിക്കുന്നുവോ അതുപോലെ ചിന്തിക്കുന്നയാളാണു പ്രണവ്. ഒരുപാടു യാത്രകള്‍ ചെയ്യുന്നയാളാണ്. ഒരുപാട് പുസ്തകങ്ങള്‍ വായിക്കുന്ന, മ്യൂസിക് ചെയ്യുന്നയാളാണ്. ഒരുപാട് ആളുകളെ നിര്‍ബന്ധം കൊണ്ടു പ്രണവ് പറഞ്ഞു ഞാനൊരു സിനിമ ചെയ്യാം. 
ഒരുപാടു പേര്‍ വന്നിരുന്നു കഥപറയാന്‍. തമിഴ് സിനിമയില്‍ നിന്നും വന്നിരുന്നു. കൂറെ പരസ്യ ചിത്രങ്ങളും വന്നു. ഒടുവില്‍ ഈ ഒരെണ്ണം മാത്രം ചെയ്യാം എന്നു പറഞ്ഞാണ് എടുത്തത്. ജീത്തുവിനൊപ്പം രണ്ട് ചിത്രങ്ങളില്‍ സഹസംവിധായകനായി പ്രവര്‍ത്തിച്ചിരുന്നു. അതുകൊണ്ട് എന്റെ അടുത്തുവന്നു പറഞ്ഞു. എനിക്കു ജീത്തുവിന്റെ സിനിമയില്‍ അഭിനയിക്കാനാണു കൂടുതല്‍ കംഫര്‍ട്ടബിള്‍ എന്ന്. 
ഇപ്പോള്‍ അതിനു വേണ്ടിയുള്ള തയാറെടുപ്പിലാണ്. സ്‌ക്രിപ്റ്റിങ് ഒക്കെ കഴിഞ്ഞു. എന്നോടു ചോദിച്ചിരുന്നു എങ്ങനെയാണു ചെയ്യാന്‍ പറ്റുക എന്ന്. ഞാന്‍ പറഞ്ഞു എനിക്കൊന്നും ചെയ്യാന്‍ പറ്റില്ല. എന്റെ മകനായതുകൊണ്ട് അഭിനയിക്കാന്‍ പറ്റണം എന്നില്ല. അതു സ്വന്തമായി തെളിയിക്കണം. അത് അയാളുടെ വിധിയാണ്. നമ്മുക്ക് വേണമെങ്കില്‍ ഒന്നോ രണ്ടോ സിനിമ നിര്‍മ്മിച്ചു കൊടുക്കാം. അതു മോശമാണെങ്കില്‍ പിന്നെ നമുക്കു ചെയ്യാന്‍ പറ്റില്ല. ആള്‍ക്കാര്‍ക്ക് അദ്ദേഹത്തെ ഇഷ്ടമാകുക എന്നത് ഒരു മാജിക്കാണ്. അതു സംഭവിക്കട്ടെ. ഒരു സ്വകാര്യ ചാനലിന്റെ സംവാദ പരിപാടിക്കിടയിലാണു മോഹന്‍ലാല്‍ ഇക്കാര്യം പറഞ്ഞത്.