അമ്മയുടെ ജനറല്‍ബോഡി മീറ്റിഗിന് ശേഷം നടത്തിയ വാര്‍ത്താസമ്മേളനത്തില്‍ ദിലീപിനെ പ്രതിരോധിക്കാനെത്തിയവരുടെ കൂട്ടത്തില്‍ കലാഭവന്‍ ഷാജോണും ഉണ്ടായിരുന്നു. അന്ന് മുതല്‍ ഷാജോണ്‍ ദിലീപിന് വേണ്ടി വാദിക്കുന്നു എന്ന പ്രചരണം നടക്കുന്നു. അത് ശരിയല്ലെന്ന് താരം വ്യക്തമാക്കി. ദിലീപ് അടുത്ത സുഹൃത്താണ്. ഞാനുള്‍പ്പെടെ നിരവധി പേര്‍ക്ക് പിന്തുണയും സഹായവും നല്‍കുന്നയാള്‍. അയാള്‍ കുറ്റക്കാരനാണെന്ന് കോടതി കണ്ടെത്തിയിട്ടില്ല. അതിന് മുമ്പ് സമൂഹമാധ്യമങ്ങളിലൂടെയും മറ്റും ക്രൂശിക്കുന്നത് കണ്ടപ്പോള്‍ ചൂണ്ടിക്കാട്ടിയതാണ് താന്‍ ചെയ്ത തെറ്റെന്നും ഷാജോണ്‍ പറഞ്ഞു. 

ദിലീപ് കുറ്റക്കാരനാണെങ്കില്‍ ശിക്ഷിക്കപ്പെടാന്‍ പാടില്ലെന്ന് താന്‍ പറഞ്ഞിട്ടില്ല. അദ്ദേഹത്തെ വര്‍ഷങ്ങളായി അറിയാം. ചേട്ടനെ പോലെയാണ്. കുറ്റം ചെയ്തവര്‍ ആരായാലും ശിക്ഷിക്കപ്പെടണം എന്നാണ് തന്റെ അഭിപ്രായമെന്നും താരം വ്യക്തമാക്കി. ദിലീപ് ജയിലിലായപ്പോള്‍ മലയാളസിനിമയിലെ ഭൂരിഭാഗം താരങ്ങളും നിശബ്ദരായത് അദ്ദേഹം കുറ്റം ചെയ്‌തെന്ന് വിശ്വസിക്കുന്നത് കൊണ്ടല്ല. ദിലീപിനോട് അടുപ്പവും സ്‌നേഹവും ഉള്ളവരാണ് ഭൂരിഭാഗം താരങ്ങളും. ജയിലിലായിരുന്നപ്പോള്‍ പോയി കാണാനോ, സംസാരിക്കാനോ പലരും തയ്യാറാകാഞ്ഞത് പേടികൊണ്ടാണ്. 

മുഖ്യമന്ത്രി പിണറായി വിജയന്‍ നടിയെ ആക്രമിച്ച സംഭവത്തില്‍ തുടക്കംമുതല്‍ വളരെ കൃത്യമായ നിലപാടാണ് സ്വീകരിച്ചത്. പൊലീസിന്റെ അന്വേഷണവും മറ്റ് നടപടിക്രമങ്ങളും തൃപ്തികരമായിട്ടാണ് തനിക്ക് തോന്നിയിട്ടുള്ളതെന്നും ഷാജോണ്‍ വ്യക്തമാക്കി. കുറ്റം ചെയ്തത് ഏത് ഉന്നതനായാലും കലാകാരനായാലും സത്യം പുറത്ത് വരണമെന്ന നിലപാടാണ് അദ്ദേഹം സ്വീകരിച്ചിരിക്കുന്നത്. അതില്‍ ജനങ്ങള്‍ സംതൃപ്തരാണെന്നും ഷാജോണ്‍ പറഞ്ഞു.

രാമലീലയുടെ റിലീസ് ഉള്‍പ്പെടെയുള്ള പ്രശ്‌നം സങ്കീര്‍ണമായപ്പോള്‍ മഞ്ജുവാര്യരുടെ പ്രസ്താവന സിനിമ ഇന്‍ഡസ്ട്രിക്ക് വലിയ ആശ്വാസമായി. നമ്മള്‍ സിനിമയില്‍ നിന്ന് കിട്ടുന്ന വരുമാനം കൊണ്ടാണ് ജീവിക്കുന്നത്. ഈ മേഖല തകരാന്‍ പാടില്ലെന്ന് ആഗ്രഹിക്കുന്നവരുടെ കൂട്ടത്തിലാണ് ഞാനുള്ളതെന്നും സിനിമാ മേഖലയെ മനപ്പൂര്‍വം കരിവാരിതേക്കാന്‍ ശ്രമിക്കുന്ന ചിലര്‍ക്കുള്ള ശക്തമായ മറുപടിയായിരുന്നു മഞ്ജുവാര്യരുടെ പ്രസ്തവനയെന്നും താരം പറഞ്ഞു.