മെഗാസ്റ്റാര്‍ മമ്മൂട്ടിയും തമിഴ് സൂപ്പര്‍താരം സൂര്യയും ഒന്നിക്കുന്നു. ആന്ധ്രാ മുഖ്യമന്ത്രിയായിരുന്ന രാജശേഖര്‍ റെഡ്ഡിയുടെ ജീവിതം പറയുന്ന യാത്ര എന്ന തെലുങ്ക് ചിത്രത്തിലാണ് ഇരുവരും ഒന്നിക്കുന്നത്. തമിഴിലും തെലുങ്കിലും ഒരുക്കുന്ന ചിത്രത്തിന്റെ ചിത്രീകരണം താമസിക്കാതെ തുടങ്ങും. സംവിധായകന്‍ മഹിരാഘവനാണ് യാത്ര ഒരുക്കുന്നത്. രണ്ട് ഭാഷകളിലും മമ്മൂട്ടിതന്നെയാണ് ഡബ്ബ് ചെയ്യുന്നത്. ഏവര്‍ക്കും അനുകരണീയനായ ഒരു നേതാവായതിനാലാണ് അദ്ദേഹത്തിന്റെ ജീവിതം വെള്ളിത്തിരയിലെത്തിക്കുന്നതെന്നാണ് സംവിധായകന്‍ പറയുന്നു. തമിഴകത്തെ പല പ്രശസ്ത താരങ്ങളേയും ചിത്രത്തില്‍ ഉള്‍പ്പെടുത്തുവാനുള്ള ശ്രമങ്ങള്‍ നടന്നുവരികയാണ്. 

നടന്‍ സൂര്യ ഒരു പ്രധാനകഥാപാത്രമാകാന്‍ സമ്മതിച്ചെന്ന് അണിയറപ്രവര്‍ത്തകര്‍ പറയുന്നു. മമ്മൂട്ടിയുടെ നായികയാവുന്നത് നയന്‍താരയാണ്. മമ്മൂട്ടിക്കൊപ്പമുളള ചിത്രം ട്വിറ്ററില്‍ ഷെയര്‍ ചെയ്താണ് സംവിധായകന്‍ സിനിമ പ്രഖ്യാപിച്ചതായുളള വിവരം അറിയിച്ചത്. മലയാളത്തില്‍ മാങ്കത്തിനു പുറമേ എബ്രഹാമിന്റെ സന്തതികള്‍, പേരന്‍മ്പ് എന്നീ ചിത്രങ്ങള്‍ മമ്മൂട്ടിയുടേതായി അണിയറയില്‍ ഒരുങ്ങുന്നുണ്ട്.
അടുത്തവര്‍ഷം ജനുവരിയില്‍ ചിത്രം റിലീസ് ചെയ്യാനാകുമെന്നാണ് പ്രതീക്ഷ. വിജയ് ചില്ലയാണ് ചിത്രം നിര്‍മ്മിക്കുന്നത്. 1999 മുതല്‍ 2004 വരെയുള്ള കാലഘട്ടത്തിലെ വൈഎസ്ആറിന്റെ ജീവിതമാണ് ചിത്രം പറയുന്നത്.

2004ല്‍ കോണ്‍ഗ്രസിനെ അധികാരത്തില്‍ എത്തിക്കുന്നതില്‍ പ്രധാന പങ്കുവഹിച്ച വൈഎസ്ആറിന്റെ മൂന്നു മാസം നീണ്ട പദയാത്രയാണ് ചിത്രത്തിന്റെ ഇതിവൃത്തം. വളരെ ചെറുപ്പത്തിലെ കൊല്ലപ്പെട്ട നേതാവാണ് അദ്ദേഹം. ഹെലിക്കോപ്ടര്‍ അപകടത്തിലായിരുന്നു മരണം. ആന്ധ്രയിലെ ഗ്രാമീണര്‍ക്കും കര്‍ഷകര്‍ക്കും വേണ്ടി ജീവിച്ചയാളായിരുന്നു വൈ.എസ്.ആര്‍. അദ്ദേഹത്തിന്റെ മരണ ശേഷം മകന്‍ ജഗന്‍മോഹന്‍ റെഡ്ഡി വൈ.എസ്.ആര്‍ കോണ്‍ഗ്രസ് എന്ന പ്രാദേശി പാര്‍ട്ടി രൂപീകരിച്ചു. വൈഎസ് ജഗമോഹന്‍ റെഡ്ഡിയുടെ പിന്തുണയും സംവിധായകന്‍ രാഘവിനുണ്ട്. 1992ല്‍ കെ വിശ്വനാഥന്‍ സംവിധാനം ചെയ്ത സ്വാതി കീരണത്തിലൂടെയാണ് മമ്മൂട്ടി ആദ്യമായി തെലുങ്കിലെത്തുന്നത്. 1998ല്‍ പുറത്തിറങ്ങിയ റെയില്‍വേ കൂലിയാണ് മമ്മൂട്ടി അവസാനമായി അഭിനയിച്ച തെലുങ്ക് ചിത്രം.