ജനറല് സെക്രട്ടറി ബി.ഉണ്ണികൃഷ്ണന് ആക്രമിക്കപ്പെട്ട നടിക്കൊപ്പമല്ലെന്ന രൂക്ഷവിമര്ശനം നടത്തിയ ആഷിഖ് അബുവിനെതിരെ നടപടിയില്ലെന്ന് ഫെഫ്ക
ഫെഫ്ക ജനറല് സെക്രട്ടറി ബി.ഉണ്ണികൃഷ്ണനെതിരെ അതിരൂക്ഷവിമര്ശനം ഉന്നയിച്ച സംവിധായകന് ആഷിഖ് അബുവിനെതിരെ നടപടിയില്ല. ആഷിഖിനെ സംഘടനയില് നിന്ന് ഒഴിവാക്കാനും തീരുമാനിച്ചിട്ടില്ലെന്ന് ബി.ഉണ്ണികൃഷ്ണനും ഡയറക്ടേഴ്സ് യൂണിയന് നേതാവുമായ രഞ്ജിപണിക്കരും മാധ്യമങ്ങളെ അറിയിച്ചു. നേതൃത്വത്തിന്റെ നിലപാടുകളെ എതിര്ക്കുന്നവരെ ഒറ്റപ്പെടുത്തുകയും സിനിമയില് നിന്ന് തന്നെ ഒഴിവാക്കുകയും ചെയ്തിരുന്ന ഫെഫ്ക പുതിയ സംഭവവികാസങ്ങളുടെ പശ്ചാത്തലത്തിലാണ് യാതൊരു നടപടിയും സ്വീകരിക്കാതിരിക്കുന്നത്. ആഷിഖ് അബുവും അന്വര് റഷീദും അമല്നീരദും അടക്കമുള്ള ഒരു സംഘം യുവസംവിധായകര്ക്ക് ഫെഫ്കയുടെ പല തീരുമാനങ്ങളിലും കടുത്ത വിയോജിപ്പാണുള്ളത്.
ആഷിഖിനെ പുറത്താക്കില്ലെന്നും വിമര്ശനങ്ങള് ഉന്നയിക്കാന് ഫെഫ്കയുടെ വേദി തുറന്നിട്ടിരിക്കുകയാണെന്നും രഞ്ജി പണിക്കര് അറിയിച്ചു. ബി. ഉണ്ണികൃഷ്ണന് ആക്രമിക്കപ്പെട്ട നടിക്കൊപ്പമല്ലെന്ന ആഷിഖിന്റെ വിമര്ശനം താനും ആഷിഖും പറഞ്ഞ് തീര്ത്തുകൊള്ളാമെന്ന് ഉണ്ണികൃഷ്ണന് അറിയിച്ചു. ഈ വിഷയം ഇപ്പോള് ചര്ച്ച ചെയ്യേണ്ട സാഹചര്യം നിലവിലില്ലെന്നും നടി ആക്രമിക്കപ്പെട്ട സംഭവത്തില് ദിലീപ് അറസ്റ്റിലായി രണ്ടരമണിക്കൂറിനുള്ളില് ഡയറക്ടേഴ്സ് യൂണിയനില് നിന്ന് പുറത്താക്കിയെന്നും ഉണ്ണികൃഷ്ണന് പറഞ്ഞു. അതിന് ശേഷം ചേര്ന്ന മൂന്ന് യോഗങ്ങളിലും അതിന് മുമ്പും ആക്രമിക്കപ്പെട്ട സഹോദരിക്കൊപ്പമാണ് സംഘടന നിലനിന്നിട്ടുള്ളത്. ഇനിയും അങ്ങനെയായിരിക്കും. നിരപരാധിത്വം തെളിയാതെ ദിലീപിനെ തിരിച്ചെടുക്കില്ലെന്നും വ്യക്തമാക്കി.
നടിമാര് രാജിവെച്ച സംഭവങ്ങളടക്കമുള്ള കാര്യങ്ങള് അമ്മ ഭാരവാഹികളുമായി ചര്ച്ച നടത്തുമെന്നും മാധ്യമങ്ങളുടെ മീഡിയേഷന് ആവശ്യമില്ലെന്നും ഉണ്ണികൃഷ്ണന് വ്യക്തമാക്കി. ആഷിഖ് അബുവിന്റെ സാള്ട്ട് ആന്ഡ് പെപ്പര് എന്ന സിനിമയുടെ പകര്പ്പവകാശത്തിന്റെ പണം നടന് പ്രകാശ് രാജില് നിന്ന് വാങ്ങിനല്കുന്നതിന് ഫെഫ്ക കമ്മിഷന് വാങ്ങിയെന്നും ഇത്തരത്തിലുള്ള ജനാധിപത്യവിരുദ്ധ സംഭവങ്ങളാണ് സംഘടനയില് നടക്കുന്നതെന്നും ഒരു അഭിമുഖത്തില് ആഷിഖ് അബു പറഞ്ഞു. അതിന് വിശദീകരണം തേടിയെങ്കിലും മറുപടി നല്കിയില്ലെന്ന് അദ്ദേഹം തന്നെ വ്യക്തമാക്കിയിട്ടുണ്ട്. എപ്പോള് വേണമെങ്കിലും ആഷിഖിന് കാര്യങ്ങള് വിശദീകരിക്കാമെന്നും പുറത്താക്കുമെന്നുള്ള പ്രചരണം ശരിയല്ലെന്നും രഞ്ജി പണിക്കര് പറഞ്ഞു. സംഘടനയുടെ നിയമാവലിയനുസരിച്ചേ കാര്യങ്ങള് തീരുമാനിക്കൂ എന്നും ഉണ്ണികൃഷ്ണന് അറിയിച്ചു.
https://www.facebook.com/Malayalivartha