ബാലുവിന്റെയും ലക്ഷ്മിയുടെയും ആരോഗ്യനിലയില്‍ നേരിയ പുരോഗതിയുണ്ടായതിന്റെ ആശ്വാസത്തിലാണ് എല്ലാവരും. എങ്കിലും രണ്ടുപേരും വെന്റിലേറ്ററില്‍ തുടരുകയാണ്. നട്ടെല്ല്, സുഷുമ്‌ന, കഴുത്ത് എന്നിവിടങ്ങളിലാണ് ബാലുവിന് ഗുരുതര പരിക്ക്. ശസ്ത്രക്രിയയ്ക്ക് വിധേയനാക്കിയിരുന്നു. ലക്ഷ്മിക്ക് അരയ്ക്ക് കീഴ്‌പ്പോട്ടാണ് പരിക്ക്. ഇടയ്ക്ക് ബോധം വന്നപ്പോള്‍ ലക്ഷ്മി മകളെ തിരക്കിയിരുന്നു. കുഞ്ഞ് ത്വേജസിനിയുടെ വിയോഗം ഇരുവരേയും അറിയിച്ചിട്ടില്ല. അച്ഛന്‍ വിളിച്ചപ്പോള്‍ ബാലഭാസ്‌കറും ചെറുതായി കണ്ണു തുറന്നിരുന്നു.

അതേസമയം ബാലഭാസ്‌കറിന് വിദഗ്ദ ചികിത്സ നല്‍കാന്‍ എയിംസില്‍ നിന്ന് ഡോക്ടര്‍മാരെ എത്തിക്കാന്‍ ആത്മാര്‍ത്ഥമായ ശ്രമം നടക്കുന്നുണ്ടെന്ന് ശശി തരൂര്‍ എംപി. എയിംസ് ഡയറക്ടറോടും കേന്ദ്ര ആരോഗ്യമന്ത്രി ജെപി നദ്ദയോടും ഇതിനെക്കുറിച്ച്‌ സംസാരിച്ചിട്ടുണ്ടെന്നും ശ്രമങ്ങള്‍ നടക്കുകയാണെന്നും അദ്ദേഹം പറഞ്ഞു. എന്നാല്‍ മന്ത്രിയില്‍ നിന്ന് ഇപ്പോഴും ഔദ്യോഗികമായ ഉറപ്പൊന്നും ലഭിച്ചിട്ടില്ലെന്നും എന്നാല്‍ മാത്രമേ ഡോക്ടര്‍മാര്‍ക്ക് എത്താനാവുകയുള്ളെന്നും തരൂര്‍ പറഞ്ഞു. കേരള സര്‍ക്കാരും ഇതിനായുള്ള ശ്രമങ്ങള്‍ നടത്തുന്നുണ്ടെന്നും തരൂര്‍ അറിയിച്ചു.