വി ഐ പി യില്‍ തട്ടി ദിലീപിനെതിരായ അന്വേഷണം തകിടം മറിയാതിരിക്കാന്‍ തത്കാലം വിഐപി യെ കേരള പോലീസ് മറക്കുമെന്ന് സൂചന.

ഇത് വി ഐ പി യെ രക്ഷപ്പെടുത്താനുള്ള അടവായി കരുതുന്നവരുമുണ്ട്. കേസന്വേഷണത്തില്‍ നിന്നും ഒരു തരി പോലും പിന്നോട്ടു പോകാതെ ദിലീപിനെ കുരുക്കുക മാത്രമാണ് ലക്ഷ്യമെന്ന് അന്വേഷണ സംഘം പറയുന്നു.

എന്നാല്‍ വി ഐ പി യെ കണ്ടെത്താതെ അന്വേഷണം പൂര്‍ത്തിയാവില്ലെന്നാണ് ബാലചന്ദ്രകുമാര്‍ അന്വേഷണ ഉദ്യോഗസ്ഥരെ അറിയിച്ചത്. അതവിടെ നില്‍ക്കട്ടെ എന്നാണ് ഉദ്യോഗസ്ഥര്‍ പ്രതികരിച്ചതെന്നറിയുന്നു.

കൊച്ചിയില്‍ നടിയെ ആക്രമിച്ച കേസില്‍ നടന്‍ ദിലീപിനെതിരെയുള്ള തെളിവുകള്‍ വ്യാജമല്ലെന്ന് സംവിധായകന്‍ ബാലചന്ദ്ര കുമാര്‍. ദിലീപിന്റെ ഇടപെടല്‍ സംബന്ധിച്ചും സാക്ഷികളെ സ്വാധീനിക്കുന്നതടക്കമുള്ള കാര്യങ്ങളുമായി ബന്ധപ്പെട്ട ഡിജിറ്റല്‍ തെളിവുകള്‍ക്ക് പുറമെ അനുബന്ധമായി കുറച്ചധികം തെളിവുകള്‍ കൂടി അന്വേഷണ സംഘത്തിന് അദ്ദേഹം കൈമാറിയെന്നാണ് പുറത്തുവരുന്ന വിവരം. ഇതില്‍ വിഐപി യെ കുറിച്ചുള്ള വിവരങ്ങളും ഉണ്ടത്രേ.

കേസില്‍ ആറാമനെന്ന് പറയപ്പെടുന്ന വിഐപി നടന്‍ ദിലീപുമായി ഏറ്റവും അടുത്ത് നില്‍ക്കുന്ന ആളാണെന്ന് ബാലചന്ദ്രകുമാര്‍ പറഞ്ഞു. അയാള്‍ ജുഡീഷ്യറിയെക്കുറിച്ചും മന്ത്രിമാരെക്കുറിച്ചും പറയുന്നുണ്ട്. ഒരു മന്ത്രിയുടെ സാന്നിധ്യത്തില്‍ അന്വേഷണ ഉദ്യോഗസ്ഥരെ ചീത്ത വിളിക്കണമെന്ന് പറയുന്നുണ്ട്. ഇയാള്‍ ഒരു മന്ത്രിയുടെ അടുത്ത സുഹൃത്താണെന്നും ബാലചന്ദ്ര കുമാര്‍ ആരോപിക്കുന്നു. പോലീസുകാരെ ഉപദ്രവിക്കാനും പള്‍സര്‍ സുനി അടക്കമുള്ളവര്‍ ജയിലില്‍ നിന്നിറങ്ങിയാല്‍ അവരെ അപായപ്പെടുത്താന്‍ വേണ്ടിയും അദ്ദേഹം പ്ലാന്‍ ചെയ്യുന്നുണ്ട്. ഇത്തരം കാര്യങ്ങള്‍ കൈകാര്യം ചെയ്യാന്‍ എല്ലാ മേഖലകളിലും സ്വാധീനമുള്ളയാള്‍ എന്ന നിലയ്ക്കാണ് അയാളെ വിഐപി എന്ന് വിശേഷിപ്പിച്ചതെന്നും ബാലചന്ദ്രകുമാര്‍ പറഞ്ഞു.

ചില ജഡ്ജിമാരുമായി തനിക്ക് അടുത്ത ബന്ധമുണ്ടെന്ന് വി ഐ പി പറയുന്നുണ്ട്. ജഡ്ജിമാര്‍ എന്ന പേരില്‍ ചിലരുമായി വി ഐ പി സംസാരിച്ചിട്ടുണ്ട്. ദിലീപിന്റെ കേസ് അനുകൂലമാക്കാന്‍ ജുഡീഷ്യറിയുടെ സഹായം ഉണ്ടാകുമെന്നും വിഐപി ഉറപ്പുനല്‍കിയത്രേ.


'തെളിവുകള്‍ ഒരിക്കലും കൃത്രിമമായി ഉണ്ടാക്കിയിട്ടില്ല. പുറത്തുവന്നത് അദ്ദേഹത്തിന്റെ ശബ്ദമല്ലെന്ന് അദ്ദേഹം ഒരിക്കലും പറഞ്ഞിട്ടില്ല. മുഖ്യമന്ത്രിക്ക് കൊടുത്ത പാരാതിയിലും അദ്ദേഹം പറഞ്ഞിട്ടില്ല. അദ്ദേഹത്തിന്റെ അനിയന്‍ സംസാരിച്ചിട്ടുണ്ട്, അദ്ദേഹത്തിന്റെ സഹോദരി സംസാരിക്കുന്ന ശബ്ദമുണ്ട്, കാവ്യയുടെ ശബ്ദം ഉണ്ട്. ഇതൊക്കെ വ്യാജമായിട്ട് ചെയ്യാന്‍ പറ്റുമോ ?' - ബാലചന്ദ്രകുമാര്‍ പറഞ്ഞു. ദിലീപ് സാക്ഷികളെ സ്വാധിനിച്ചതിന്റെ തെളിവുകള്‍ ഉണ്ട്. ഇവര്‍ക്ക് എത്ര രൂപ കൊടുത്തു എങ്ങനെയാണ് ഇടപാട് നടത്തിയത് എന്നത് സംബന്ധിച്ചതിനെക്കുറിച്ചുള്ള തെളിവുകളും കൈയിലുണ്ടെന്നും ബാലചന്ദ്രകുമാര്‍ അവകാശപ്പെട്ടു.

വി ഐ പി യെ തത്കാലം വിടുമെങ്കിലും കേരള പോലീസിന്റെ ചാര കണ്ണുകള്‍ വിഐപി ക്ക് പിന്നാലെയുണ്ട്. വി ഐ പി യുടെ ചലനങ്ങള്‍ നിരീക്ഷിക്കാന്‍ ഒരു പ്രത്യേക സംഘത്തെ തന്നെ പോലീസ് നിയോഗിച്ചിട്ടുണ്ടെന്നാണ് ലഭിക്കുന്ന സൂചനകള്‍.വി ഐ പി ക്ക് അറിയാം താന്‍ ദിലീപ് കേസിലെ വി ഐ പി ആണെന്ന്. ഇതില്‍ നിന്നും രക്ഷപ്പെടാനായി അദ്ദേഹം ബാലചന്ദ്രനെ സ്വാധീനിക്കാന്‍ ശ്രമിച്ചതായും സൂചനയുണ്ട്. എന്നാല്‍ ബാലചന്ദ്രകുമാര്‍ പോലീസ് വലയത്തിലായതിനാല്‍ അദ്ദേഹത്തിന് വി ഐ പി യെ സഹായിക്കാനായില്ല.

വി ഐ പി ആരെന്നറിയാന്‍ ബാലചന്ദ്രകുമാറിന്റെ പിന്നാലെ ജനങ്ങള്‍ പരക്കം പായുന്നതായും റിപ്പോര്‍ട്ടുണ്ട്. വലിയ കൗതുകമാണ് വിഐപി കേരളത്തില്‍ സൃഷ്ടിച്ചിരിക്കുന്നത്.