നടിയെ ആക്രമിക്കുന്നതിനുള്ള ഗൂഢാലോചനയില്‍ നടന്‍ സിദ്ധിഖ് പങ്കെടുത്തോ എന്നറിയാന്‍ ക്രൈം ബ്രാഞ്ച് അന്വേഷണം തുടങ്ങി. ആലുവയിലെ വിഐപി ശരത്തിന്റെ ഹോട്ടലില്‍ നടന്നതായി പറയപ്പെടുന്ന ഗൂഢാലോചനയില്‍ സിദ്ധിഖ് പങ്കെടുത്തെന്ന സംശയം വെളിപ്പെടുത്തിയത് പള്‍സര്‍ സുനിയുടെ അമ്മയാണ്.

ഈ യോഗത്തില്‍ സിദ്ദീഖ് എന്നയാള്‍ പങ്കെടുത്തതായി സുനി തനിക്ക് നല്‍കിയ കത്തില്‍ എഴുതിയിട്ടുണ്ട്. എന്നാല്‍, ഇത് നടന്‍ സിദ്ദീഖ് ആണോ എന്ന് തനിക്കറിയില്ലെന്ന് അമ്മ ശോഭന പറഞ്ഞു. സംവിധായകന്‍ ബാലചന്ദ്ര കുമാര്‍ പറയുന്നത് സത്യമാണെന്നും ഇക്കാര്യങ്ങളെല്ലാം അറിയാവുന്ന പലരും അത് പുറത്ത് പറയാന്‍ തയ്യാറാവുന്നില്ലെന്നും ജയിലില്‍ വെച്ച് കണ്ടപ്പോള്‍ സുനി പറഞ്ഞതായി അമ്മ വ്യക്തമാക്കി.



ദിലീപ് ഒറ്റയ്ക്ക് ഇത്തരമൊരു ഗൂഢാലോചന നടത്തി എന്ന വിശ്വാസം അന്നുമിന്നും പോലീസിനില്ല. ഗൂഢാലോചന നടക്കുന്ന കാലത്ത് മലയാള സിനിമയിലെ മുടിചൂടാ മന്നനായിരുന്നു ദിലീപ്. സൂപ്പര്‍ താരങ്ങള്‍ ഉള്‍പ്പെടെയുള്ളവര്‍ ദിലീപിന്റെ ചൊല്‍പ്പടിക്ക് നില്‍ക്കുന്ന കാലം.

ഇതു തന്നെയായിരുന്നു അന്വേഷണ സംഘത്തിലെ സംശയങ്ങള്‍ ബലപ്പെടാന്‍ കാരണം. സിദ്ധിഖിന്റെ കാര്യത്തില്‍ വ്യക്തത വന്നിട്ടില്ലെങ്കിലും മറ്റ് താരങ്ങളുടെ കാര്യവും പോലീസ് പരിശോധിക്കുകയാണ്. ആദ്യത്തെ അന്വേഷണ സംഘം ഇത്തരം കാര്യങ്ങള്‍ അന്വേഷിച്ചെങ്കിലും വ്യക്തത കിട്ടിയിരുന്നില്ല. എന്നാല്‍ ദിലീപ് തന്റെ ബന്ധങ്ങള്‍ ഗൂഢാലോചനയില്‍ ഉപയോഗിച്ചതായി ക്രൈംബ്രാഞ്ച് കരുതുന്നു.

അതേസമയം, നടിയെ ആക്രമിച്ച കേസിലെ അന്വേഷണ ഉദ്യോഗസ്ഥരെ അപായപ്പെടുത്താന്‍ ഗൂഢാലോചന നടത്തിയെന്ന കേസില്‍ നടന്‍ ദിലീപ് സമര്‍പ്പിച്ച മുന്‍കൂര്‍ ജാമ്യാപേക്ഷ നാളെ ഹൈക്കോടതി പരിഗണിക്കും.

ഒന്നാം പ്രതി ദിലീപിനൊപ്പം സഹോദരന്‍ അനൂപ്, സഹോദരി ഭര്‍ത്താവ് സുരാജ്, സുഹൃത്ത് ശരത് അടക്കമുളള പ്രതികള്‍ സമാന ഹര്‍ജി നല്‍കിയിട്ടുണ്ട്. അന്വേഷണ ഉദ്യോഗസ്ഥര്‍ വ്യക്തിവൈരാഗ്യം തീര്‍ക്കുകയാണെന്നും കളളക്കേസാണെന്നുമാണ് ദിലീപടക്കമുളള പ്രതികളുടെ വാദം. എന്നാല്‍ നിയമത്തിന്റെ പിടിയില്‍ നിന്ന് വഴുതി മാറാനുളള ശ്രമമാണ് ദിലീപിന്റേതും സകല തെളിവുകളും ശേഖരിച്ചശേഷമാണ് പ്രതി ചേര്‍ത്തതെന്നുമാണ് പ്രോസിക്യൂഷന്‍ നിലപാട്. ദിലീപടക്കമുളള പ്രതികളെ കസ്റ്റഡിയിലെടുത്ത് ചോദ്യം ചെയ്യണമെന്നാണ് പ്രോസിക്യൂഷന്‍ ആവശ്യം.

നടിയെ ആക്രമിച്ച കേസുമായി ബന്ധപ്പെട്ട് അന്വേഷണ ഉദ്യോഗസ്ഥരെ ആക്രമിക്കാന്‍ ശ്രമിച്ചെന്ന കേസില്‍ ദിലീപടക്കം ആറ് പ്രതികളുടെ മുന്‍കൂര്‍ ജാമ്യാപേക്ഷ ഹൈക്കോടതിയില്‍ പ്രോസിക്യൂഷന്‍ എതിര്‍ക്കുകയാണ്. ദിലീപ്, സഹോദരന്‍ അനൂപ്, സഹോദരീഭര്‍ത്താവ് സൂരജ്, ബന്ധുവായ അപ്പു, സുഹൃത്ത് ബൈജു ചെങ്ങമനാട്, പിന്നെ 'വിഐപി' എന്ന് വിളിക്കപ്പെട്ട ആറാമന്‍ ശരത് എന്നിവരുടെ മുന്‍കൂര്‍ ജാമ്യാപേക്ഷയാണ് പ്രോസിക്യൂഷന്‍ ശക്തമായി എതിര്‍ക്കുന്നത്.

ഇത് അസാധാരണമായ കേസാണെന്നും, ലൈംഗികപീഡനത്തിന് ക്രിമിനലുകള്‍ക്ക് ക്വട്ടേഷന്‍ നല്‍കിയത് നീതിന്യായവ്യവസ്ഥയുടെ ചരിത്രത്തില്‍ത്തന്നെ ആദ്യമാണെന്നും, സമൂഹത്തില്‍ വലിയ സ്വാധീനമുള്ള ദിലീപിന് മുന്‍കൂര്‍ ജാമ്യം നല്‍കുന്നത് കേസിനെത്തന്നെ ബാധിക്കുമെന്നും പ്രോസിക്യൂഷന്‍ റിപ്പോര്‍ട്ടില്‍ പറയുന്നു. സത്യം പുറത്തുവരാന്‍ ദിലീപിനെ കസ്റ്റഡിയിലെടുത്ത് ചോദ്യം ചെയ്യണമെന്നും പ്രോസിക്യൂഷന്‍ ആവശ്യപ്പെടുന്നു.

നാളെ കേസ് നേരിട്ട് കേള്‍ക്കാനാണ് കോടതി തീരുമാനിച്ചിരിക്കുന്നത്. നാളെ ഹൈക്കോടതി അവധിയായിട്ടും കേസ് കേള്‍ക്കും. കേസിലെ അടിയന്തിര പ്രാധാന്യം മനസിലാക്കിയാണ് നേരിട്ട് കേള്‍ക്കാന്‍ തീരുമാനിച്ചത്.