ഒന്നാം ഭാഗത്തിൻ്റെ വിജയം ഉണ്ടാക്കി വയ്ക്കുന്ന പ്രതീക്ഷകളുടെ ഭാരം എപ്പോഴും രണ്ടാം ഭാഗത്തിന് വെല്ലുവിളി ഉയര്‍ത്താറുണ്ട്. എന്നാല്‍ ഒന്നാം ഭാഗത്തേക്കാള്‍ ഒരുപടി മുകളില്‍ എന്ന തോന്നല്‍ സൃഷ്ടിക്കുന്ന തുടര്‍ച്ചകള്‍ തുലോം വിരളമാണ്. നന്നേ ചെറുതായിപ്പോയ ആ പട്ടികയിലെ അവസാന പേരാവുകയാണ് കെജിഎഫ് ചാപ്റ്റര്‍ 2. റോക്കിയ്ക്ക് അഴിഞ്ഞാടാനുള്ള വിളനിലം ഒരുക്കി വച്ച ഒന്നാം ഭാഗത്തിൻ്റെ തട്ടില്‍ നിറഞ്ഞാടാനുള്ള സംഭവങ്ങളെ കൃത്യമായ പേസില്‍ ആവേശവും ഉദ്വേഗവും ഇമോഷന്‍സും കൃത്യമായ അളവില്‍ ചേര്‍ത്തൊരുക്കിയ മാസ് കൂട്ടാണ് കെജിഎഫ് ചാപ്റ്റര്‍. കെജിഎഫ്, കെജിഎഫ് ചാപ്റ്റർ 2 എന്നീ ചിത്രങ്ങളിൽ കാസിം ചാച്ചയായി വേഷമിട്ട താരമാണ് ഹാരിഷ് റായ്. യാഷ് അവതരിപ്പിക്കുന്ന റോക്കി ഭായ് എന്ന കഥാപാത്രത്തിന്റെ സഹായിയായാണ് ഹാരിഷ് റായ് വേഷമിട്ടത്. ഇന്ത്യയിലെ ഏറ്റവും വിജയകരമായ സിനിമകളിൽ ഒന്നിന്റെ ഭാഗമായ ഹാരിഷ് റായ് ഇന്ന് കാൻസർ ബാധിതനായി ചികിത്സയ്ക്ക് പണമില്ലാതെ വിഷമിക്കുകയാണ്. തൊണ്ടയിൽ കാൻസർ ബാധിച്ച താരം ചികിത്സയ്ക്കായി ബുദ്ധിമുട്ടുന്ന അവസ്ഥയിലാണ് ഇപ്പോൾ. കെജിഎഫ് 2ന്റെ ചിത്രീകരണത്തിനിടെയാണ് തനിക്ക് അസുഖത്തെ നേരിടേണ്ടി വന്നതെന്ന് ഹാരിഷ് റായ് പറയുകയാണ്..

'കഴിഞ്ഞ മൂന്ന് വർഷമായി ഞാൻ ക്യാൻസർ ബാധിതനാണ്. കെ.ജി.എഫിൽ ജോലി ചെയ്യുമ്പോൾ താടി നീട്ടിവളർത്താൻ ഒരു കാരണമുണ്ട്. ഈ രോഗം കാരണം എന്റെ കഴുത്ത് വീർത്തിരുന്നു'- ഹാരിഷ് റായ് പറഞ്ഞു. പണമില്ലാത്തതിനാൽ കാൻസർ ശസ്ത്രക്രിയ വൈകിയതായും ഇപ്പോൾ കാര്യങ്ങൾ വഷളായെന്നും അദ്ദേഹം പറഞ്ഞു. 'മുമ്പ് മുഴുവൻ പണവും ഇല്ലാത്തതിനാൽ കുറച്ച് നാളത്തേക്ക് എന്റെ ശസ്ത്രക്രിയ മാറ്റിവച്ചിരുന്നു. സിനിമകളുടെ റിലീസിനായി ഞാൻ കാത്തിരുന്നു. ഇപ്പോൾ ഞാൻ രോഗത്തിന്റെ നാലാം ഘട്ടത്തിലെത്തി, കാര്യങ്ങൾ വളരെ മോശമായി. ആരാധകരോടും വ്യവസായികളോടും സഹായം അഭ്യർത്ഥിക്കാൻ ഞാൻ ഒരു വീഡിയോചെയ്തു. പക്ഷേ അത് പോസ്റ്റ് ചെയ്യാനുള്ള ധൈര്യം ഉണ്ടായിരുന്നില്ലെന്നും ഹാരിഷ് റായ് പറഞ്ഞു.