ഒമ്ബത് കോടിയുടെ ഓഫര്‍ നിരസിച്ച് ബോളിവുഡ് താരം കാര്‍ത്തിക് ആര്യന്‍. പാന്‍ മസാല കമ്ബനിയുടെ പരസ്യ ഓഫറാണ് താരം നിരസിച്ചത്. തെറ്റായ കാര്യങ്ങള്‍ പ്രചരിപ്പിക്കാന്‍ താല്‍പര്യമില്ലെന്ന കാരണത്താലാണ് കാര്‍ത്തിക് ആര്യന്‍ പരസ്യ ഓഫര്‍ നിരസിച്ചത്. ഒരു പ്രമുഖ പരസ്യ നിര്‍മ്മാതാവ് വാര്‍ത്ത സ്ഥിരീകരിച്ചതായി ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നുണ്ട്.

പാന്‍ മസാല പരസ്യം വേണ്ടെന്ന് വെച്ച കാര്‍ത്തിക് ആര്യനെ പിന്തുണച്ച് ഒട്ടേറെ പേരാണ് സമൂഹ മാധ്യമത്തിലൂടെ രംഗത്ത് എത്തുന്നത്. അക്ഷയ് കുമാര്‍, അജയ് ദേവ്ഗണ്‍ തുടങ്ങിയ നടന്‍മാര്‍ കാര്‍ത്തിക് ആര്യനെ കണ്ടുപഠിക്കണമെന്നാണ് സോഷ്യല്‍ മീഡിയ പറയുന്നത്.

പാന്‍ മസാല പരസ്യത്തില്‍ അഭിനയിച്ചതിന് അക്ഷയ് കുമാര്‍ അടക്കമുള്ളവര്‍ നേരത്തെ വലിയ വിമര്‍ശനം നേരിട്ടിരുന്നു. ഇതേതുടര്‍ന്ന് ഇനി മേലില്‍ ഇത്തരം പരസ്യങ്ങളുടെ ഭാഗമാകില്ല എന്നും അക്ഷയ് കുമാര്‍ വ്യക്തമാക്കിയിരുന്നു.

സെന്‍സര്‍ ബോര്‍ഡിന്റെ മുന്‍ ചെയര്‍പേഴ്‌സണും നിര്‍മ്മാതാവുമായ പഹ്‌ലജ് നിഹലാനിയും നടനെ അഭിനന്ദിച്ച് രംഗത്തെത്തി. 'പാന്‍ മസാല ആളുകളെ കൊല്ലുകയാണ്. ബോളിവുഡ് നായകന്മാര്‍ ഗുട്കയും പാന്‍ മസാലയും കഴിക്കാന്‍ പ്രോത്സാഹിപ്പിക്കുന്നത് തീര്‍ച്ചയായും രാജ്യത്തിന്റെ ആരോഗ്യത്തിന് ഹാനികരമാണ്', അദ്ദേഹം അഭിപ്രായപ്പെട്ടു.