അസുരന് ശേഷം വീണ്ടും തമിഴകത്തെ അതിശയിപ്പിക്കാനൊരുങ്ങുകയാണ് മഞ്ജു വാര്യര്‍. വലിമൈക്ക് ശേഷം അജിത് നായകനാകുന്ന ചിത്രത്തിലാണ് മഞ്ജു നായികയായി എത്തുന്നത്. സിനിമയുടെ ചിത്രീകരണം പുരോഗമിക്കവെ അജിത്തും സംഘവുമായി നടത്തിയ ലഡാക്ക് യാത്രയുടെ അനുഭവം പങ്കുവെച്ച് മഞ്ജു തന്നെ എത്തിയിരുന്നു. ഇപ്പോഴിതാ ട്രിപ്പിന് ശേഷം നടന്‍ ഹെലികോപ്റ്റര്‍ പറത്തിയിരിക്കുകയാണ്. പൈലറ്റ് ലൈസന്‍സുള്ള വ്യക്തിയാണ് അജിത്. നടന്‍ ഹെലികോപ്റ്ററില്‍ കയറുന്നതിന്റെയും കോക്ക്പിറ്റിലിരിക്കുന്നതിന്റെയും ചിത്രങ്ങളും വീഡിയോകളും വൈറലാണ്. കഴിഞ്ഞ മാസമാണ് അജിത്തും സംഘവും ലഡാക്കിലേക്ക് ബൈക്ക് യാത്ര നടത്തിയത്. മഞ്ജു വാര്യരും സംഘത്തിന്റെ ഭാഗമായി. നടന്റെ പുതിയ ചിത്രം ‘എകെ 61’ല്‍ മഞ്ജു വാര്യരാണ് നായിക കഥാപാത്രത്തെ അവതരിപ്പിക്കുന്നത്. സിനിമയുടെ ബ്രേക്കിലാണ് മഞ്ജു പര്യടനത്തില്‍ ജോയിന്‍ ചെയ്തത്. ‘നേര്‍ക്കൊണ്ട പാര്‍വൈ’, ‘വലിമൈ’ എന്നീ സിനിമകള്‍ക്ക് ശേഷം എച്ച് വിനോദും അജിത്തും വീണ്ടും ഒന്നിക്കുന്ന സിനിമയാണ് ‘എകെ 61’. ചിത്രം പാന്‍ ഇന്ത്യന്‍ ലെവലില്‍ റിലീസ് ചെയ്യാനാണ് അണിയറപ്രവര്‍ത്തകര്‍ ശ്രമിക്കുന്നത്.