നടൻ ശ്രീനിവാസന്റെ അസുഖങ്ങളും പിന്നീട് അദ്ദേഹം പൊതുവേദികളിൽ പ്രത്യക്ഷപ്പെട്ടതും വലിയ വാർത്തയായിരുന്നു. ആരോഗ്യ പ്രശ്‌നങ്ങളെ തുടർന്ന് സിനിമയിൽ നിന്നും താരം ഏറെക്കാലമായി വിട്ടു നിൽക്കുകയാണ്. ഇതിനിടയിൽ മഴവിൽ മനോരമയുടെ പരിപാടിയിൽ ശ്രീനിവാസൻ പങ്കെടുത്തിരുന്നു. കൂടാതെ നടി സ്മിനു സിജോയും ശ്രീനിവാസന്റെ ചിത്രം പങ്കുവെച്ചുകൊണ്ട് എത്തിയിരുന്നു. ചെറിയ ചില ആരോഗ്യപ്രശ്‌നങ്ങളൊഴിച്ചാൽ അദ്ദേഹം പൂർണ്ണ ആരോഗ്യവാനാണെന്നാണ് സ്മിനു തന്റെ ഫേസ്ബുക്ക് കുറിപ്പിൽ പറഞ്ഞത്. ശ്രീനിവാസൻ വീണ്ടും സജീവമാകുന്നതും കാത്തിരിക്കുകയാണ് മലയാളി പ്രേക്ഷകർ. ഇപ്പോഴിതാ നടൻ ശ്രീനിവാസന്റെ ചിത്രങ്ങൾ സോഷ്യൽ മീഡിയയിൽ പ്രചരിപ്പിക്കുന്നതിനെതിരെ പ്രതികരണവുമായി എത്തുകയാണ് നടനും നിർമ്മാതാവുമായ തമ്പി ആന്റണി. ഫേസ് ബുക് കുറിപ്പിലൂടെയായിരുന്നു താരത്തിന്റെ പ്രതികരണം.

കുറിപ്പ് ഇങ്ങനെ...

'ഇപ്പോൾ പ്രശസ്ത നടൻ ശ്രീനിവാസന്റെ ചിത്രങ്ങൾ സോഷ്യൽ മീഡിയയിലിട്ട് ആഘോഷിക്കുന്നവർ ആരാണെങ്കിലും ആർക്കു വേണ്ടിയാണന്ന് മനസിലാകുന്നില്ല. സ്വയം പ്രശസ്തിക്കു വേണ്ടിയാണെങ്കിൽ പോലും അത് അദ്ദേഹത്തെ അപമാനിക്കുന്നതിനു തുല്ല്യമായേ എനിക്ക് കാണാൻ സാധിക്കുകയുള്ളു.' 'രോഗാവസ്ഥയിൽ നിന്ന് പരിപൂർണമായി സുഖം പ്രാപിക്കുന്നതിനു മുമ്പുള്ള ഈ അവസ്ഥയിൽ, സിനിമാക്കാരുൾപ്പെടെ ആരും അദ്ദേഹത്തിന്റെ കൂടെനിന്ന് ഫോട്ടോയെടുത്ത് പ്രദർശിപ്പിക്കരുതേ എന്നൊരപേക്ഷയുണ്ട്. ഇതൊക്കെ കണ്ടിട്ടും ആരും പ്രതികരിക്കുന്നില്ല എന്നതാണ് അത്ഭുതകരമാണെന്നും തമ്പി ആന്റണി കുറിച്ചു.