പ്രധാനമന്ത്രി നരേന്ദ്രമോദിക്ക് ഇന്ന് 72ാം ജന്മദിനം. പിറന്നാൾ ദിനത്തില്‍ മധ്യപ്രദേശിലാണ് നരേന്ദ്രമോദിയുടെ പരിപാടികൾ. നമീബിയയില്‍ നിന്നും കൊണ്ടുവന്ന ചീറ്റപ്പുലികളെ മോദി ഇന്ന് കുനോ ദേശീയ ഉദ്യാനത്തിലേക്ക് തുറന്നുവിടും. മധ്യപ്രദേശില്‍ വിവിധിയിടങ്ങളിലായി നടക്കുന്ന പരിപാടികളിലും മോദി പങ്കെടുക്കും. അതേ സമയം പിറന്നാൾ ദിനത്തോടനുബന്ധിച്ച് രാജ്യവ്യാപകമായി സേവാ ദിവസമായി ആചരിക്കുകയാണ് ബിജെപി. ഇന്ന് മുതല്‍ ഒക്ടോബർ 2 വരെ നീളുന്ന ആഘോഷ പരിപാടികളാണ് ബിജെപി വിവിധ സംസ്ഥാനങ്ങളിലായി സംഘടിപ്പിക്കുന്നത്. അതേസമയം ലോകത്തിന്റെ നാനാ ഭാഗത്ത് നിന്നും പിറന്നാൾ ആശംസകൾ എത്തുകയാണ്. ലോക നേതാക്കളും രാഷ്ട്രീയക്കാരും മാത്രമല്ല, സെലിബ്രിറ്റികൾ മുതൽ സാധാരണക്കാർ വരെ മോദിക്ക് പിറന്നാൾ ആശംസിച്ചു. സുരേഷ് ഗോപി,മമ്മൂട്ടി, മോഹൻലാൽ, ഉണ്ണി മുകുന്ദൻ, അക്ഷയ് കുമാർ, അജയ് ദേവ്ഗൺ, റിതേഷ് ദേശ്മുഖ്, അനുപം ഖേർ തുടങ്ങി നിരവധി താരങ്ങൾ പ്രധാനമന്ത്രി നരേന്ദ്ര മോദിയുടെ പ്രത്യേക ദിനത്തിൽ ആശംസകൾ നേർന്നു. നമ്മുടെ ബഹുമാനപ്പെട്ട പ്രധാനമന്ത്രി നരേന്ദ്ര മോദി ജിക്ക് ഊഷ്മളമായ ജന്മദിനാശംസകളും സ്നേഹവും. നിങ്ങൾക്ക് നല്ല ആരോഗ്യവും, സന്തോഷവും, കൂടുതൽ വിജയവും നിറഞ്ഞ ഒരു അനുഗ്രഹീത വർഷം ഉണ്ടാകട്ടെ'- എന്ന് മോഹൻലാൽ ആശംസിച്ചു. പിറന്നാൾ ആശംസ അറിയിച്ച് കൊണ്ട് മമ്മൂട്ടിയും എത്തിയിരുന്നു. 'നമ്മുടെ ചലനാത്മകവും ദീർഘവീക്ഷണമുള്ളതുമായ പ്രധാനമന്ത്രി നരേന്ദ്ര മോദി ജിക്ക് ജന്മദിനാശംസകൾ. രാഷ്ട്രത്തെ നിസ്വാർത്ഥമായി സേവിക്കാൻ നിങ്ങൾക്ക് ദീർഘവും ആരോഗ്യകരവുമായ ജീവിതം ആശംസിക്കുന്നു.'- മോദിക്കൊപ്പമുള്ള ചിത്രം പങ്കുവച്ച് സുരേഷ് ഗോപി ആശംസിച്ചു. പ്രധാനമന്ത്രി മോദിക്കൊപ്പമുള്ള ഒരു ചിത്രം പങ്കുവച്ച് അക്ഷയ് കുമാർ അദ്ദേഹത്തിന് ആശംസകൾ നേർന്നു, "നിങ്ങളുടെ കാഴ്ചപ്പാട്, നിങ്ങളുടെ ഊഷ്മളത, ജോലി ചെയ്യാനുള്ള നിങ്ങളുടെ കഴിവ്... എനിക്ക് ആഴത്തിൽ പ്രചോദനം നൽകുന്ന നിരവധി കാര്യങ്ങളിൽ ചിലത് മാത്രം.. ജന്മദിനാശംസകൾ @narendramodi ji. നിങ്ങൾക്ക് ആരോഗ്യവും സന്തോഷവും ശോഭനമായ ഒരു വർഷം ആശംസിക്കുന്നു."- അക്ഷയ് കുമാർ ആശംസിച്ചു.  'ബഹുമാന്യനായ പ്രധാനമന്ത്രി @നരേന്ദ്രമോദി നിങ്ങളുടെ നേതൃത്വം എനിക്കും പ്രചോദനം നൽകുന്നു. നിങ്ങൾക്ക് നല്ല ആരോഗ്യവും മികച്ച ഒരു വർഷവും ആശംസിക്കുന്നു സർ''- അജയ് ദേവ്ഗൺ ട്വീറ്റ് ചെയ്തു. എന്നിങ്ങനെ പോകുകയാണ് ആശംസകൾ.