ഇന്ദ്രജിത്തിന്റെയും പൂര്‍ണിമയുടെയും മകൾ പ്രാര്‍ഥന ഇന്ദ്രജിത്ത് പാട്ട് പാടിയും ഫാഷന്‍ നോക്കിയും ആരാധകരെ സ്വന്തമാക്കി കഴിഞ്ഞിരിക്കുകയാണ്. ഇപ്പോഴിതാ താരപുത്രി ഇന്‍സ്റ്റാഗ്രാം പേജിലൂടെ പങ്കുവെച്ച പുതിയ വീഡിയോയാണ് ഇപ്പോള്‍ വൈറലാവുന്നത്. കുടുംബാംഗങ്ങളെയൊക്കെ വീഡിയോയില്‍ കാണാമെങ്കിലും എല്ലാവരും കെട്ടിപ്പിടിച്ച് കരയുന്നത് എന്തിനാണെന്നുള്ള ചോദ്യം ഉയരുകയാണ്. ഏറ്റവും കഠിനമായൊരു വിടപറച്ചില്‍' എന്ന് പറഞ്ഞ് കൊണ്ടാണ് പ്രാര്‍ഥന ഒരു വീഡിയോ ഇന്‍സ്റ്റാഗ്രാം പേജിലൂടെ പങ്കുവെച്ചിരിക്കുന്നത്. വീഡിയോയുടെ തുടക്കത്തില്‍ പൂര്‍ണിമയുടെ അമ്മയെ കെട്ടിപ്പിടിക്കുകയും ഉമ്മ കൊടുക്കുന്നതുമൊക്കെ കാണാം. അമ്മമ്മ പറയുന്നത് കേട്ട് പ്രാര്‍ഥനയുടെ കണ്ണ് നിറഞ്ഞ് അത് തുടയ്ക്കുന്നതും വീഡിയോയിലുണ്ട്. സഹോദരി നക്ഷത്രയാണ് ഇതൊക്കെ പകര്‍ത്തുന്നത്. ശേഷം ഇളയമ്മയായ പ്രിയ മോഹനെയും അവരുടെ ഭര്‍ത്താവും നടനുമായ നിശാല്‍ പിള്ളയെയും കെട്ടിപ്പിടിച്ച് യാത്ര പറയുന്നു. ഒടുവില്‍ ഇവരുടെ മകന്‍ വേദുവിനെ എടുത്ത് സ്‌നേഹം പങ്കുവെക്കുകയാണ് പ്രാര്‍ഥന. വീഡിയോയുടെ താഴെ എന്റെ കുഞ്ഞാണെന്ന കമന്റുമായിട്ടാണ് പ്രിയ മോഹന്‍ എത്തിയത്. നിന്നെ ഞങ്ങള്‍ മിസ് ചെയ്യും എന്നൊക്കെയുള്ള കമന്റുകളും ഇതിന് താഴെ വരുന്നുണ്ട്. പ്രാര്‍ഥന വിദേശത്തേക്ക് പഠിക്കാന്‍ പോവുന്നതിന്റെ ഭാഗമായി കുടുംബാംഗങ്ങളോട് യാത്ര പറയാന്‍ എത്തിയതായിരുന്നു. എല്ലാവരോടും യാത്ര പറഞ്ഞ് താരപുത്രി പോവുകയും ചെയ്തു. എന്തായാലും ഉപരി പഠനത്തിന് വിദേശത്തേക്ക് പോവുന്ന പ്രാര്‍ഥനയ്ക്ക് എല്ലാവിധ ആശംസകളുമായിട്ടാണ് പ്രിയപ്പെട്ടവര്‍ എത്തുന്നത്.