പ്രശസ്ത സീരിയൽ സംവിധായകൻ ആദിത്യന്റെ വേർപാട് വിശ്വസിക്കാനാകാതെ സീരിയൽ ലോകം. നിരവധി സൂപ്പര്‍ ഹിറ്റ് പരമ്പരകള്‍ കുടുംബ പ്രേക്ഷകര്‍ക്ക് സമ്മാനിച്ച സംവിധായകന്‍ നാൽപ്പത്തേഴാം വയസിൽ മരണത്തിന് കീഴടങ്ങിയത് ഹൃദയാഘാതത്തെ തുടർന്നായിരുന്നു.ടെലിവിഷന്‍ രംഗത്ത് തൊട്ടതെല്ലാം പൊന്നാക്കിയ സംവിധായകനാണ് ആദിത്യന്‍. ഏഷ്യാനെറ്റില്‍ സംപ്രേഷണം ചെയ്തുവരുന്ന സാന്ത്വനമാണ് അദ്ദേഹത്തിന്റെ അവസാനത്തെ പരമ്പര.

സിനിമാ- ടെലിവിഷന്‍ രംഗത്തെ പ്രമുഖരടക്കം ആദിത്യന്റെ ആകസ്മിക വേര്‍പാടിന്റെ ഞെട്ടലിലാണ്. പാണ്ഡ്യന്‍ സ്റ്റോര്‍സിന്റെ റീമേക്കാണ് സാന്ത്വനം. മലയാളി പ്രേക്ഷകര്‍ക്ക് ഇഷ്ടമാവുന്ന തരത്തിലുള്ള മാറ്റങ്ങള്‍ വരുത്തിയാണ് സാന്ത്വനം ഒരുക്കുന്നതെന്ന് അദ്ദേഹം മുമ്പൊരു അഭിമുഖത്തില്‍ വ്യക്തമാക്കിയിരുന്നു. അപ്രതീക്ഷിതമായെത്തിയ വിയോഗ വാര്‍ത്തയില്‍ സങ്കടവും നടുക്കവും രേഖപ്പെടുത്തി സഹപ്രവര്‍ത്തകരെല്ലാം എത്തിയിരുന്നു.

ഏഷ്യാനെറ്റിന് എന്നും സൂപ്പര്‍ ഹിറ്റ് പരമ്പരകള്‍ സമ്മാനിച്ച സംവിധായകനാണ് അദ്ദേഹം. വാനമ്പാടി, ആകാശദൂത്, അമ്മ തുടങ്ങിയ പരമ്പരകള്‍ക്കു ശേഷമാണ് സാന്ത്വനത്തിലൂടെയും ആദിത്യന്‍ പ്രേക്ഷകര്‍ക്ക് പ്രിയങ്കരനായത്. ആദിത്യന്‍ സാറിന്റെ പിന്തുണയെക്കുറിച്ച് വാചാലരായി താരങ്ങളും എത്താറുണ്ട്. ഒരു കുടുംബം പോലെ തന്നെയാണ് അദ്ദേഹത്തിന്റെ ലൊക്കേഷന്‍ എന്ന് താരങ്ങള്‍ പറഞ്ഞിരുന്നു. സാന്ത്വനം ഇത്രയധികം ഹിറ്റാവുമെന്ന് താനൊരിക്കലും പ്രതീക്ഷിച്ചിരുന്നില്ലെന്ന് അദ്ദേഹം പറഞ്ഞിരുന്നു.

പതിവില്‍ നിന്നും വ്യത്യസ്തമായ തരത്തിലുള്ള മേക്കിംഗും പ്രമേയവുമാണ് സാന്ത്വനത്തിന്റേത്. പ്രണാമം ചേട്ടാ, എന്ത് പറയണം എന്നറിയില്ല ജീവിതത്തില്‍ കൂടെ ചേര്‍ത്ത് നിര്‍ത്തി വളര്‍ത്തിയ ഓരോരുത്തരായി കണ്ണ് മുന്നില്‍ നിന്നും പൊടുന്നനെ മാഞ്ഞുപോകുന്നത് വിശ്വസിക്കാന്‍ പറ്റുന്നില്ല എന്താ ചേട്ടാ നിങ്ങളെ കുറിച്ച് പറയേണ്ടത് അറിയില്ല അത്രമാത്രം എന്റെ അഭിനയജീവിതത്തില്‍ ഗുരുനാഥനായും ജീവിതത്തില്‍ ഒരു സഹോദരനെ പോലെയും സ്വാധീനിച്ച അങ്ങേക്ക് എങ്ങനെ ആദരാഞ്ജലികള്‍ അര്‍പ്പിക്കണം എന്നറിയില്ല. ചേട്ടന്റെ കുടുംബത്തിന് എല്ലാം അതിജീവിക്കാന്‍ കരുത്തു നല്‍കട്ടെ ഈശ്വരന്‍ എന്നായിരുന്നു സീരിയല്‍ നടി ഉമ നായര്‍ കുറിച്ചത്. ഇരുവരും വാനമ്പാടി എന്ന സീരിയലില്‍ ഒരുമിച്ച് പ്രവര്‍ത്തിച്ചിരുന്നവരാണ്.

എന്റെ ആത്മമിത്രവും ഏഷ്യനെറ്റ് 'സാന്ത്വനം' സീരിയലിന്റെ സംവിധായകനുമായ ആദിത്യന്‍ ഇന്ന് പുലര്‍ച്ചെ ഹൃദയാഘാതം മൂലം ഈ ലോകത്തോട് വിടവാങ്ങി. എന്ത് കാര്യവും എന്നോട് പറയാറുള്ള പ്രിയ ആദിത്യാ ഒരു യാത്രാമൊഴി പോലും തരാതെ ഞങ്ങളേ വിട്ടു പോയല്ലോ. എന്റെ വിഷമങ്ങള്‍ ഞാനിനി ആരോട് പറയും പ്രിയ മിത്രമേ. അതുകൊണ്ട് തന്നെ പ്രണാമവും ആദരാഞ്ജലിയും ഞാന്‍ മനപ്പൂര്‍വ്വം അര്‍പ്പിക്കുന്നില്ല. കാരണം നിങ്ങളിപ്പോഴും എന്റെ ഉള്ളില്‍ ജീവനോടെ ചൈതന്യത്തോടെ തന്നെ ഉണ്ടെന്ന് ഞാന്‍ വെറുതെയെങ്കിലും വിശ്വസിച്ചോട്ടേ.

എന്തൊരു ലോകം ദൈവമേ ഇതെന്നായിരുന്നു മനോജ് കുറിച്ചത്. ആദരാഞ്ജലികള്‍ പ്രിയ സുഹൃത്തേ. ഏഷ്യാനെറ്റില്‍ സംപ്രേഷണം ചെയ്തു വരുന്ന സാന്ത്വനം സീരിയലിന്റെ സംവിധായകന്‍ ആദിത്യന്‍ വിടവാങ്ങി. ജീവിതത്തിന്റെ പാതിയില്‍ എല്ലാം അവസാനിപ്പിച്ച് ധൃതിയില്‍ പോയതെന്തിനാണ് സുഹൃത്തെ, വിട എന്നായിരുന്നു സംവിധായകനും നടി അപ്സരയുടെ ഭര്‍ത്താവുമായ ആല്‍ബി ഫ്രാന്‍സിസ് കുറിച്ചത്.

പ്രിയപ്പെട്ട ആദിത്യ ..വിശ്വസിക്കാൻ പറ്റുന്നില്ല. സഹിക്കാൻ പറ്റുന്നില്ല ആദിത്യ...വാനമ്പാടിയിലെ എന്റെ ഭദ്ര‌യും, ആകാശദൂദിലെ ജെസിയും ഈ കൈകളിൽ ഭദ്രം ആയിരുന്നു" എന്നാണ് സീമ ജി നായർ സോഷ്യൽ മീഡിയയിൽ കുറിച്ചത്. സിനിമകൾ സംവിധാനം ചെയ്യുന്നതിന്റെ ഒരുക്കങ്ങളിലേക്കും അദ്ദേഹം കടന്നിരുന്നു.

അതിനിടെയാണ് അകാലത്തിലെ വിയോഗം. മൃതദേഹം തിരുവനന്തപുരം ജനറൽ ആശുപത്രിയിൽ പോസ്റ്റ്‌മോർട്ടം നടത്തിയതിന് ശേഷം ഭാരത് ഭവനിൽ പൊതുദർശനം ഉണ്ടായിരിക്കും. തുടർന്ന് കൊല്ലത്തേക്കു കൊണ്ടു പോകും. അവിടെയാണ് സംസ്കാരം.