നമ്മുടെ ലാലേട്ടന്റെ കൈയ്യില്‍ നിന്ന് അടി വാങ്ങുന്നത് വില്ലന്മാരെ സംബന്ധിച്ച് സിനിമയില്‍ തോല്‍വി ആണെങ്കിലും ജീവിതത്തില്‍ രാശി ആയിരിക്കും എന്നാണ് തോന്നുന്നത്. മോഹന്‍ലാലിന്റെ എയ്ഞ്ചല്‍ ജോണ്‍, ജനപ്രിയനായകന്റെ പാസഞ്ചര്‍, പ്രിഥ്വിയുടെ പാവാട തുടങ്ങി ഇപ്പോള്‍ നിവിന്‍ പോളിയുടെ ആക്ഷന്‍ ഹീറോ ബിജുവിലെ മട്ടാഞ്ചേരി മാര്‍ട്ടിനില്‍ എത്തി നില്‍ക്കുന്ന കരിയര്‍ ഗ്രാഫ് ഒന്ന് കൂടി ഉയരത്തിലേക്ക് എത്തുന്നതിന്റെ സന്തോഷത്തിലാണ് കൊച്ചിക്കാരനായ ബിനീഷ് ബാസ്റ്റിന്‍. ഈ വര്‍ഷം പ്രേക്ഷകര്‍ ഏറ്റവും പ്രതീക്ഷയോടും ആവേശത്തോടും കാത്തിരിക്കുന്ന അറ്റ്‌ലിയുടെ 'തെരി'യില്‍ സാക്ഷാല്‍ ഇളയദളപതിയുടെ വില്ലനായി ബിനീഷ് അഭിനയിച്ചു കഴിഞ്ഞിരിക്കുന്നു.

സെറ്റില്‍ വിജയ് തന്നോട് എപ്രകാരം പെരുമാറി എന്നതിനെക്കുറിച്ച് പറയാന്‍ ബിനീഷിനു നൂറു നാവാണ്. തന്റെ ആദ്യത്തെ സീനില്‍ വിജയ് അവതരിപ്പിക്കുന്ന കഥാപാത്രത്തെ ഭീഷണിപ്പെടുത്തുന്ന രീതിയിലുള്ള ഡയലോഗ് ആണത്രേ പറയാനുണ്ടായിരുന്നത്. ഇടയ്‌ക്കെപ്പൊഴോ ഇത്രയും ആരാധകരുള്ള ഒരു നടനോടൊപ്പം ആണല്ലോ അഭിനയിക്കുന്നത് എന്ന് മനസ്സില്‍ വന്ന സമയം ആകെ പരിഭ്രമമായി. അവസാനം വിജയ് തന്നെ ഇടപെട്ടു. നിങ്ങളെപ്പോലെ സാധാരണ മനുഷ്യനാണ് ഞാനും ഒരു സഹപ്രവര്‍ത്തകനെന്ന നിലയില്‍ മാത്രം എന്നെ കണ്ടാല്‍ മതിയെന്ന് പറഞ്ഞു ധൈര്യപ്പെടുത്തിയ നടന്റെ പെരുമാറ്റം ആണ് തന്നെ ടെന്‍ഷന്‍ കൂടാതെ അഭിനയിക്കാന്‍ സഹായിച്ചതെന്ന് ബിനീഷ് ഓര്‍ക്കുന്നു.

നമ്മളുടെ അഭിനയം ഇഷ്ടപ്പെട്ടാല്‍ സംവിധായകനോട് കൂടുതല്‍ സീനുകള്‍ക്കായി നമുക്ക് വേണ്ടി സംസാരിക്കാന്‍ തയ്യാറാകുന്നത്ര നല്ല സ്വഭാവത്തിനുടമയാണ് ഇളയദളപതി. വീട്ടുകാര്‍ക്ക് വേണ്ടിയാണെന്ന് പറഞ്ഞപ്പോള്‍ ഞാന്‍ കൊടുത്ത 7 ഓട്ടോഗ്രാഫുകളിലും അദ്ദേഹം ഒരു മടിയും കൂടാതെ ഒപ്പ് വച്ചു. വിജയ്യോടൊപ്പം അഭിനയിക്കാന്‍ കഴിഞ്ഞത് സ്വപ്നതുല്യമായ ഒരു ആഗ്രഹ പൂര്‍ത്തീകരണമായി ബിനീഷ് ബാസ്റ്റിന്‍ കണക്കാകുന്നു. തന്റെ അടുത്ത ചിത്രത്തിലും ഒരു വേഷം നല്‍കാമെന്ന് സംവിധായകന്‍ അറ്റ്‌ലി വാക്കു നല്‍കിയതിന്റെ സന്തോഷത്തിലാണിപ്പൊള്‍ ബിനീഷ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha