സുന്ദര നായക സങ്കല്‍പ്പങ്ങളെ പൊളിച്ചെഴുതി
കറുത്തൊരാള്‍ മലയാള സിനിമയില്‍ തകര്‍ത്താടിയത് കലാഭവന്‍ മണിയുടെ വരവോടെയായിരുന്നു. സീരിയലില്‍ അഭിനയിക്കാന്‍പോയി കലാഭവനില്‍ നിന്നും പുറത്തായ കലാഭവന്‍ മണി അഭിനയ രംഗത്തേക്ക് എത്തുന്നത് സുന്ദര്‍ദാസും ലോഹിതദാസും സല്ലാപത്തില്‍ അവസരം കൊടുത്തതോടെയാണ്. അതിന് മുന്‍പ് സമുദായം, അക്ഷരം എന്നീ സിനിമകളില്‍ അഭിനയിച്ചെങ്കിലും ശ്രദ്ധിക്കപ്പെട്ടത് സല്ലാപത്തിലൂടെയായിരുന്നു. മുനവെച്ച മൂളിപ്പാട്ടും പാടി ഗ്രാമങ്ങളിലെ ചെത്തുകാരന്റെ തനിപകര്‍പ്പായി മാറിയ അഭിനയം ചെറിയ വേഷമാണെങ്കിലും ഏറെ ശ്രദ്ധിക്കപ്പെട്ടു.
ങ്യാ..ഹഹ....എന്ന ചിരിയായിരുന്നു ആദ്യകാലത്ത് മലയാള സിനിമയ്ക്ക് കലാഭവന്‍മണി. മിമിക്രിയില്‍ നിന്ന് സിനിമയിലെത്തിയ ഒരാള്‍ തൊണ്ണൂറുകളില്‍ മലയാളത്തില്‍ തുടരെയിറങ്ങിയ ഹാസ്യസിനിമകളിലെ നിത്യസാന്നിധ്യം. മലയാള സിനിമയില്‍ പല പരീക്ഷണങ്ങളും നടത്തിയ സംവിധായകന്‍ വിനയന്റെ വാസന്തിയും ലക്ഷ്മിയും പിന്നെ ഞാനും എന്ന സിനിമ മണിയുടെ സിനിമാതലവര മാറ്റി മറിച്ചു. അന്ധനായ തെരുവപാട്ടുകാരന്റെ ജീവിതത്തിലേക്ക് ഗംഭീരമായി പകര്‍ന്നാട്ടം നടത്തിയ മണി മലയാളികളെ അത്ഭുതപ്പെടുത്തി. സിനിമ തിയേറ്ററുകളില്‍ നിറഞ്ഞോടിയതോടെ മണിയുടെ സിനിമാ ജീവിതം പുതിയ വഴിക്കു തിരിഞ്ഞു. പക്ഷേ, മിമിക്രിയില്‍ നിന്നു വരുന്നവരെല്ലാം തമാശനടന്മാരാണെന്ന മുന്‍വിധി പിന്നീടും ഒരുപാടുകാലം മണിയെ തമാശവേഷം കെട്ടിച്ചു. ഇതിനെ തകര്‍ത്ത് സല്ലാപത്തിന്റെ തുടര്‍ച്ചയായി അഭിനയ സാധ്യതയുള്ള വേഷം പിന്നെ മണിക്ക് കൊടുത്തത് വിനയനാണ്. അവാര്‍ഡുകളുടെ പെരുമഴയായിരുന്നു വാസന്തിയും ലക്ഷ്മിയും പിന്നെ ഞാനും എന്ന സിനിമയിലെ കാഥാപാത്രത്തിന് മണിക്ക് ലഭിച്ചത്. സംസ്ഥാന അവാര്‍ഡ് പ്രതീക്ഷിച്ച് കിട്ടാതെ പോയപ്പോള്‍ മണി ബോധം കെട്ടുവീണതും വാര്‍ത്തയായി.
പിന്നീടും തമാശവേഷങ്ങള്‍ ചെയ്‌തെങ്കിലും കരുമാടിക്കുട്ടന്‍, ഗാര്‍ഡ്, ആകാശത്തിലെ പറവകള്‍, വാല്‍കണ്ണാടി, സ്വര്‍ണം തുടങ്ങിയ സിനിമകളില്‍ മികച്ച വേഷങ്ങള്‍ മണിയെ തേടിവന്നു. ഏറെ സിനിമകളില്‍ നായകനായി. വില്ലനായപ്പോള്‍ മണി കൂടുതല്‍ കരുത്തോടെ സ്‌ക്രീനില്‍ നിറഞ്ഞു. തമിഴിലും തെലുങ്കിലും കന്നടയിലും മണി താരമായി. കലാമണി എന്ന തമിഴര്‍ വിളിച്ച മണി രജനീകാന്തിന്റെയും വിക്രത്തിന്റെയും വിജയകാന്തിന്റെയുമൊക്കെ വില്ലനായി നിറഞ്ഞാടി. ചെയ്യുന്ന സിനിമകളുടെ എണ്ണം കുറച്ചപ്പോഴും മികച്ച സിനിമകളുടെ ഭാഗമാകാന്‍ മണി ശ്രദ്ധിച്ചിരുന്നു. മലയാളത്തിലെ എണ്ണം പറഞ്ഞ നടന്മാരുടെ പട്ടികയില്‍ പേരെഴുതിചേര്‍ത്താണ് മണി അരങ്ങൊഴിയുന്നത്.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
