അതീവ ഗുരുതരമായി അവസ്ഥയിലും പുഞ്ചിരിച്ച് വരവേറ്റ കലാകാരനാണ് ജിഷ്ണു. രോഗബാധിതനായിരുന്നപ്പോള്‍ പോലും ഇന്നസെന്റിന് അര്‍ബുദം ബാധിച്ചപ്പോള്‍ എല്ലാം ശരിയാകും എന്ന പറഞ്ഞ് ജിഷ്ണു ധൈര്യം പകര്‍ന്നു. താന്‍ അസുഖബാധിതനാണെന്ന് സമ്മതിക്കാന്‍ ഒരുക്കമല്ലായിരുന്നു ജിഷ്ണു. സംസാരിക്കാന്‍ സാധിക്കാതിരുന്നപ്പോള്‍ കടലാസില്‍ എഴുതി സംസാരിക്കാന്‍ ശ്രമിച്ചു. ഈ വിടവാങ്ങല്‍ അതുകൊണ്ട് തന്നെ സിനിമാ ലോകത്തിന് കനത്ത വേദനയാണ് നല്‍കുന്നത്. അച്ഛന്‍ രാഘവനെ ആശ്വസിപ്പാക്കാന്‍ സഹപ്രവര്‍ത്തകര്‍ക്ക് വാക്കുകളില്ല.
ദൈവം വിളിച്ചാല്‍ എല്ലാവരും പോകണമെന്നായിരുന്നു ഇന്നസെന്റിന്റെ ജിഷ്ണുവിന്റെ വിയോഗത്തോടുള്ള പ്രതികറണം. ജിഷ്ണുവിന് നേരത്തെ പോകേണ്ടി വന്നതില്‍ വിഷമമുണ്ട്. ആത്മാവിന് നിത്യശാന്തി നേരുന്നു അതല്ലാതെ എനിക്ക് മറ്റൊന്നും പറയാനില്ല. ജിഷ്ണുവിന്റെ മരണത്തോട് അമ്മയുടെ പ്രസിഡന്റ് ഇന്നസെന്റിന്റെ പ്രതികരണം ഇങ്ങനെയായിരുന്നു. രോഗം ബാധിച്ചിരുന്നെങ്കിലും എപ്പോഴും ഊര്‍ജസ്വലനായാണ് ജിഷ്ണുവിനെ കണ്ടിട്ടുള്ളതെന്നും ഇന്ന്‌സെന്റ് ഓര്‍മിച്ചു. നാലുമാസങ്ങള്‍ക്ക് മുമ്പ് ഒരു സ്വകാര്യ ആശുപത്രിയില്‍ വച്ച് കാണുമ്പോള്‍ രോഗം കാരണം അദ്ദേഹത്തിന് ശബ്ദം പോലും ഉണ്ടായിരുന്നില്ല എന്നിട്ടും അതൊന്നും വകവക്കാതെ അദ്ദേഹം എന്നോട് സംസാരിച്ചുകൊണ്ടിരുന്നുഇന്നസെന്റ് ഓര്‍ത്തെടുത്തു.
തനിക്ക് ജീവിക്കാനാകുമെന്ന പ്രതീക്ഷ അദ്ദേഹത്തിന് ഉണ്ടായിരുന്നു. ഇതേ അസുഖമുള്ള ഒരു രോഗിയും ഇത്രത്തോളം ആത്മവിശ്വാസം കാണിക്കുന്നത് കണ്ടിട്ടില്ല. ഇന്നസെന്റ് പറയുന്നു. ജിഷ്ണുവിന്റെ മരണവാര്‍ത്ത ഉള്‍ക്കൊള്ളാനാകാതെ ഞെട്ടലിലാണ് ഭാവനയും. രോഗത്തെ കുറിച്ച് അന്വേഷിച്ച് വിളിക്കുമ്പോഴെല്ലാം ഭേദമായിക്കൊണ്ടിരിക്കുന്നു എന്ന സൂചനകളാണ് നല്‍കിയിരുന്നത്. അതുകൊണ്ട് തന്നെ ഇത്തരമൊരു വാര്‍ത്ത കേട്ടപ്പോള്‍ അത് ഉള്‍ക്കൊള്ളാന്‍ കഴിയുന്നില്ല. ഭാവന പറയുന്നു. ജിഷ്ണുവിന്റെ വീട്ടുകാരെ വിളിക്കാന്‍ പോലും സാധിക്കാത്ത മാനസികാവസ്ഥയിലാണ് താനെന്നും ഭാവന പറഞ്ഞു. ജിഷ്ണു നായകനായി അഭിനയിച്ച നമ്മളില്‍ നായികയായിരുന്നു ഭാവന.
ജിഷ്ണുവിന്റെ മരണം എല്ലാവര്‍ക്കും ഹൃദയഭേദകമായ ഒരു വാര്‍ത്തയാണെന്ന് ജഗദീഷ്. എല്ലാവരോടും വളരെ മാന്യമായി പെരുമാറിയുന്ന ഒരു വ്യക്തിയായിരുന്നു അദ്ദേഹം. ജീവിതത്തെ ശുഭപ്രതീക്ഷയോടെ കണ്ടിരുന്ന ഒരു ചെറുപ്പക്കാരന്‍. പുതുതലമുറക്ക് മാതൃകയാക്കാവുന്ന ഒരാളാണ് യഥാര്‍ത്ഥത്തില്‍ അദ്ദേഹം. കഴിവിനൊത്ത അവസരങ്ങള്‍ അദ്ദേഹത്തിന് ലഭിച്ചിരുന്നില്ല. ബിഹേവിയറല്‍ ആക്ടിംഗായിരുന്നു ജിഷ്ണുവിന്റേത്. നല്ല അവസരങ്ങള്‍ ലഭിക്കുകയായിരുന്നെങ്കില്‍ മികച്ച അഭിനയം കാഴ്ച വെക്കാന്‍ കഴിയുന്ന ഒരാളായിരുന്നു അദ്ദേഹം. സ്വയം രോഗബാധിതനായിരുന്നപ്പോള്‍ പോലും ഇന്നസെന്റിന് അര്‍ബുദം ബാധിച്ചപ്പോള്‍ എല്ലാം ശരിയാകും എന്ന പറഞ്ഞ് ധൈര്യം പകര്‍ന്ന വ്യക്തിയാണ് ജിഷ്ണുവെന്നും ജഗദീഷ് ഓര്‍മിച്ചു.
ജിഷ്ണുവിന്റേത് അകാലത്തിലുള്ള വേര്‍പാടാണെന്ന് സംവിധായകന്‍ കമല്‍. സംസാരിക്കാന്‍ സാധിക്കാതിരുന്നപ്പോള്‍ കടലാസില്‍ എഴുതി സംസാരിക്കാന്‍ ശ്രമിച്ചിരുന്നു ജിഷ്ണു. താന്‍ അസുഖബാധിതനാണെന്ന് സമ്മതിക്കാന്‍ ഒരുക്കമല്ലായിരുന്നു ജിഷ്ണു. ജീവിതത്തോടുള്ള ജിഷ്ണുവിന്റെ പോസിറ്റീവ് അപ്രോച്ച് എപ്പോഴും എടുത്തുപറയേണ്ട ഒന്നാണ്. നമ്മളില്‍ അഭിനയിക്കാന്‍ വരുമ്പോഴും ഇതേ ആത്മവിശ്വാസം ജിഷ്ണു പ്രകടിപ്പിച്ചിരുന്നതായും കമല്‍ ഓര്‍മിച്ചു. എനിക്ക് അഭിനയിച്ച് പരിചയമൊന്നുമില്ല. പക്ഷേ ഈ ചിത്രത്തിലൂടെ എന്നെ ആളുകള്‍ ശ്രദ്ധിക്കുമെന്ന എനിക്ക് ഉറപ്പുണ്ട്. ഷൂട്ടിംഗിനിടയില്‍ ഒരിക്കല്‍ ജിഷ്ണു പറഞ്ഞുകമല്‍ വിശദീകരിച്ചു.
ഒരു തഴക്കം വന്ന നടനെ പോലെയാണ് ജിഷ്ണു ചിത്രത്തില്‍ തന്റെ പ്രകടനം കാഴ്ച വച്ചതും. ഒരിടവേളക്ക് ശേഷം വീണ്ടും സിനിമയില്‍ സജീവമാകാന്‍ ഒരുങ്ങുമ്പോഴാണ് അര്‍ബുദം അദ്ദേഹത്തില്‍ പിടിമുറുക്കുന്നത്. എന്തായാലും മനക്കരുത്തോടെ ജീവിതത്തെ നേരിട്ട ആ യുവാവ് നമുക്കൊരു മാതൃക തന്നെയാണെന്നും ടെലിവിഷന്‍ ചാനലിനോട് കമല്‍ പ്രതികരിച്ചു. നമ്മള്‍ എന്ന സിനിമയിലൂടെ ജിഷ്ണുവിനെ നായകനാക്കി ഉയര്‍ത്തിയത് കമലായിരുന്നു.
വളരെ ഹെല്‍ത്ത് കോണ്‍ഷ്യസായിരുന്നു ജിഷ്ണുവെന്ന് കുഞ്ചാക്കോ ബോബനും അനുസ്മരിച്ചു. ജീവിതത്തെ പോസിറ്റീവായി കണ്ടിരുന്ന ഒരാള്‍. കുറച്ച് ദിവസങ്ങള്‍ക്ക് മുമ്പ് ഞാന്‍ ആശുപത്രിയില്‍ എത്തി അദ്ദേഹത്തെ കണ്ടിരുന്നു. അന്ന രോഗത്തിന്റെ വിഷമതകളൊന്നും അദ്ദേഹം കാണിച്ചിരുന്നില്ല. ചിരിച്ച് സന്തോഷത്തോടെയിരിക്കുന്ന ജിഷ്ണുവിനൊപ്പം അദ്ദേഹത്തിന്റെ അച്ഛനും മനസ്സിലുള്ള വിഷമമൊന്നും പുറത്തുകാണിക്കാതെ ജിഷ്ണുവിനെ സപ്പോര്‍ട്ട് ചെയ്ത് നിന്നിരുന്നത് എന്റെ മനസ്സില്‍ എന്നും ഉണ്ടായിരിക്കുംകുഞ്ചാക്കോ കുറിച്ചു.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha