സുധ കൊങ്കര സംവിധാനം ചെയ്ത പീരിയഡ് ഡ്രാമ പരാശക്തിയിലെ പ്രകടനത്തിന് ലഭിക്കുന്ന മികച്ച പ്രതികരണങ്ങളില്‍ സന്തോഷം പങ്കുവച്ച് നടന്‍ ശിവകാര്‍ത്തകേയന്‍. രജനീകാന്തും കമല്‍ഹാസനും തന്നെ നേരിട്ട് വിളിച്ച് അഭിനന്ദിച്ചുവെന്നും താരം പറഞ്ഞു. ചിത്രത്തിന്റെ വിജയവുമായി ബന്ധപ്പെട്ട് നടന്ന വാര്‍ത്താസമ്മേളനത്തില്‍ സംസാരിക്കുകയായിരുന്നു അദ്ദേഹം. ഇതിഹാസ താരങ്ങളില്‍ നിന്ന് ലഭിച്ച അഭിനന്ദനങ്ങള്‍ തന്നെ അത്ഭുതപ്പെടുത്തിയെന്ന് ശിവകാര്‍ത്തികേയന്‍ പറഞ്ഞു.

'തലൈവര്‍ രജനീകാന്ത് സര്‍ ഇന്നലെ വിളിച്ചിരുന്നു. വളരെ ബോള്‍ഡായ സിനിമയെന്നാണ് അദ്ദേഹം പറഞ്ഞു. രണ്ടാം പകുതി ഗംഭീരമായിട്ടുണ്ടെന്ന് ആവര്‍ത്തിച്ചു. കമല്‍ സാറും ചിത്രം കണ്ടു. സിനിമയിലെ എല്ലാവരും അടിപൊളിയായിട്ടുണ്ടെന്ന് അറിയിച്ചു. അദ്ദേഹത്തില്‍ നിന്ന് അങ്ങനെയൊരു അഭിനന്ദനം ലഭിക്കുക പ്രയാസമാണ്. അഞ്ച് മിനിട്ടോളമാണ് ഞങ്ങള്‍ സിനിമയെക്കുറിച്ച് സംസാരിച്ചത്. 'അമരന്‍' സിനിമയ്ക്ക് പോലും രണ്ട് മൂന്ന് മിനിട്ടേ സംസാരം നീണ്ടു പോയിരുന്നുള്ളു.' താരം കൂട്ടിച്ചേര്‍ത്തു.

ജനുവരി 10നാണ് 'പരാശക്തി' തിയേറ്ററുകളിലെത്തിയത്. സെന്‍സര്‍ ബോര്‍ഡുമായി ബന്ധപ്പെട്ട തടസങ്ങള്‍ കാരണം 25ഓളം മാറ്റങ്ങള്‍ വരുത്തിയ ശേഷമാണ് ചിത്രം റിലീസ് ചെയ്തത്. 1965ലെ തമിഴ്‌നാട്ടിലെ ഹിന്ദി വിരുദ്ധ പ്രക്ഷോഭങ്ങളുടെ പശ്ചാത്തലത്തിലാണ് ചിത്രം ഒരുക്കിയിരിക്കുന്നത്. ചരിത്രപരമായ വസ്തുതകളെ വികലമായി ചിത്രീകരിക്കുന്നുവെന്നും കോണ്‍ഗ്രസ് നേതാക്കളെ അവഹേളിക്കുന്നുവെന്നും ആരോപിച്ച് തമിഴ്‌നാട് യൂത്ത് കോണ്‍ഗ്രസ് ചിത്രത്തിനെതിരെ രംഗത്തെത്തിയിരുന്നു. സിനിമയ്‌ക്കെതിരെയുള്ള നിരോധന നീക്കങ്ങളോടും വിമര്‍ശനങ്ങളോടും പ്രതികരിച്ച സംവിധായിക സുധ കൊങ്കര, തന്റെ ആവിഷ്‌ക്കാര സ്വാതന്ത്ര്യത്തില്‍ ഉറച്ചുനില്‍ക്കുന്നതായും ചരിത്രപരമായ വിശതികരണം ഉണ്ടായിട്ടില്ലെന്നും അവര്‍ വ്യക്തമാക്കി.