സിനിമയ്ക്കുണ്ടാകുന്ന നഷ്ടം മോഹന്‍ലാല്‍ പ്രതിഫലത്തില്‍ നിന്നും കുറയ്ക്കാറുണ്ടെന്ന് വെളിപ്പെടുത്തി നിര്‍മ്മാതാവ് സന്തോഷ് ടി കുരുവിള. 'നീരാളി' എന്ന സിനിമയുടെ ലൊക്കേഷനില്‍ വെച്ചായിരുന്നു അദ്ദേഹം ഇക്കാര്യം പറഞ്ഞതെന്നും സന്തോഷ് ടി കുരുവിള വെളിപ്പെടുത്തി. ഒരു മീഡിയക്ക് നല്‍കിയ അഭിമുഖത്തിലായിരുന്നു സന്തോഷ് ടി കുരുവിള മനസുതുറന്നത്.

'നീരാളി സിനിമയുടെ ഷൂട്ടിങ്ങിന് ലാലേട്ടന്റെ കൂടെ ആകെ രണ്ട് സ്റ്റാഫേ ഉള്ളൂ, ഞാനുണ്ട്. ബാക്കി ആരുമില്ല. ബോംബേയിലാണ്, ഞങ്ങള്‍ എല്ലാ ദിവസവും സംസാരിക്കും. ഒരു ഹോട്ടലില്‍ തൊട്ടടുത്തുള്ള മുറിയിലാണ്. അന്നേരം സംസാരിക്കുമ്പോള്‍ പുള്ളിയുടെ വായില്‍ നിന്ന് തന്നെ വന്നിട്ടുണ്ട്. വലിയ ഹിറ്റ് പടങ്ങളൊക്കെ അതിനു മുമ്പ് ഇറങ്ങിയിട്ടുണ്ട്. അവസാനം കണക്കുമായിട്ട് വരുമ്പോള്‍ ഒന്നും കാണത്തില്ല. നഷ്ടമായിരിക്കും. പുള്ളിക്ക് കൊടുക്കാനുള്ള ശമ്പളത്തില്‍ അത് കുറയ്ക്കും.' സന്തോഷ് ടി കുരുവിള പറയുന്നു.

'ലാലേട്ടന്‍ ഒരു കലാകാരനാണ്, ഒരു കലാകാരന്‍ ഒരു കാരണവശാലും ഒരു കച്ചവടക്കാരനായി മാറാന്‍ ഒക്കത്തില്ല. കച്ചവടക്കാരന്‍ ആയാല്‍ അയാളുടെ കല അയാളില്‍ നിന്ന് പോകും. ആന്റണി പെരുമ്പാവൂര്‍ വന്നതിന് ശേഷമാണ് ലാലേട്ടന് നല്ല സിനിമകളും ഫിനാന്‍ഷ്യല്‍ ഡിസിപ്ലിനും ഉണ്ടായത്. ഞാന്‍ അതിന് ശേഷമാണ് ലാലേട്ടനെ പരിചയപ്പെടുന്നത്. അതിന് മുന്നേയുള്ള കാര്യങ്ങള്‍ എനിക്ക് അറിയില്ല.' സന്തോഷ് ടി കുരുവിള കൂട്ടിച്ചേര്‍ത്തു.