വേദിയിലിരുന്ന വിക്കി കൗശലിനെയും കരണ്‍ ജോഹറിനെയും ചിരിപ്പിച്ച് ബേസില്‍
നടന്‍ ബേസില്‍ ജോസഫിന്റെ ഏറ്റവും പുതിയ പ്രസംഗമാണ് ഇപ്പോള്‍ ആരാധകര്‍ക്കിടയില്‍ തരംഗമാകുന്നത്. ഹോളിവുഡ് റിപ്പോര്‍ട്ടര്‍ ഇന്ത്യ സംഘടിപ്പിച്ച പ്രൗഢ ഗംഭീരമായ ചടങ്ങില്‍, മികച്ച പ്രകടനത്തിനുള്ള അംഗീകാരം ഏറ്റുവാങ്ങിയ ശേഷം താരം നടത്തിയ പ്രസംഗമാണ് സദസിലുള്ള എല്ലാവരെയും ചിരിപ്പിച്ചത്.
സംവിധായകരായ രാജ് കുമാര്‍ ഹിറാനിയും വിധു വിനോദ് ചോപ്രയും ചേര്‍ന്നാണ് ബേസിലിന് പുരസ്‌കാരം നല്‍കിയത്.'വളരെ നന്ദി. ഈ അംഗീകാരം സ്വീകരിക്കുമ്പോള്‍ എനിക്ക് വാക്കുകള്‍ കിട്ടുന്നില്ല; സത്യത്തില്‍ ഞാന്‍ ഒരുപാട് വികാരാധീനനാണ്. ഒരു പ്രസംഗം ഒക്കെ തയാറെടുത്തു വന്നെങ്കിലും ഈ വേദിയില്‍ നില്‍ക്കുമ്പോള്‍ എനിക്ക് വലിയ പരിഭ്രമം തോന്നുന്നുണ്ട്. പ്രത്യേകിച്ച്, എനിക്ക് ഈ അവാര്‍ഡ് നല്‍കിയ ആ രണ്ട് വ്യക്തികള്‍, ഞാന്‍ അവരുടെ എത്ര വലിയ ആരാധകനാണെന്നോ !
ഒരു സംവിധായകനായാണ് എന്റെ സിനിമ ജീവിതം തുടങ്ങിയത്, പിന്നീടാണ് നടനായി മാറിയത്. ഇത്രയധികം പ്രതിഭകള്‍ക്ക് മുന്നില്‍ ഈ വേദിയില്‍ നില്‍ക്കാന്‍ സാധിക്കുന്നത് അത്ഭുതകരമായി തോന്നുന്നു. ഒരു നടനെന്ന നിലയില്‍ ഈ അവാര്‍ഡ് ലഭിക്കുക എന്നത് എന്നെ സംബന്ധിച്ച് ചിന്തിക്കാന്‍ പോലും കഴിയാത്ത കാര്യമായിരുന്നു. ജീവിതം ഇത്രത്തോളം മാറിമറിഞ്ഞതില്‍ ഞാന്‍ പ്രപഞ്ചത്തോടും ദൈവത്തോടും നന്ദി പറയുന്നു.
ആദ്യമായി, എന്റെ സംവിധായകന്‍ ജിതിന്‍, ടൊവിനോ തോമസ്, കൂടെ അഭിനയിച്ചവരോടും, സാങ്കേതിക പ്രവര്‍ത്തകരോടും, ഈ സിനിമയുടെ ഭാഗമായ എല്ലാവരോടും ഞാന്‍ കടപ്പെട്ടിരിക്കുന്നു. സത്യം പറഞ്ഞാല്‍, ഇത്തരം വിലകൂടിയ വസ്ത്രങ്ങള്‍ ധരിച്ചും വലിയ പാര്‍ട്ടികളില്‍ പങ്കെടുത്തും എനിക്ക് അത്ര ശീലമില്ല.
ഇവിടെ എത്തിയപ്പോള്‍ എനിക്ക് നല്ല ടെന്‍ഷന്‍ ഉണ്ടായിരുന്നു, പക്ഷേ എല്ലാവരും ഞാന്‍ സുന്ദരനായിട്ടുണ്ടെന്ന് പറഞ്ഞ് എന്നെ ആശ്വസിപ്പിച്ചു. പെട്ടെന്ന് ഒരു നടി എന്റെ അടുത്തു വന്ന് പറഞ്ഞു, 'ബേസില്‍, എനിക്ക് നിന്നെ വലിയ ഇഷ്ടമാണ്' എന്ന്. ഉടനെ തന്നെ ഞാന്‍ തിരിച്ചു പറഞ്ഞു, 'എനിക്കും നിങ്ങളെ ഇഷ്ടമാണ്!'. ഈ മുറിയിലുള്ള എല്ലാവരും അത്രയധികം സ്‌നേഹമുള്ളവരാണ്. ഈ അവസരത്തിന് എല്ലാവരോടും നന്ദി.
സര്‍ (സംവിധായകന്‍ രാജ്കുമാര്‍ ഹിറാനിയോട്), ഒരു ചലച്ചിത്ര നിര്‍മാതാവ് എന്ന നിലയില്‍ ഞാന്‍ പ്രധാനമായും തമാശയ്ക്കും നര്‍മത്തിനും പ്രാധാന്യമുള്ള സിനിമകളാണ് ചെയ്യുന്നത്. എനിക്ക് നിങ്ങളോട് ഒരു കാര്യം പറയണമെന്നുണ്ട്. നിങ്ങളുടെ ഒരു അഭിമുഖം ഞാന്‍ കണ്ടിരുന്നു. നിങ്ങളുടെ ഓഫിസിന്റെ ഭിത്തിയില്‍ ഫ്രെയിം ചെയ്തു വെച്ചിരിക്കുന്ന ചില കീവേഡുകള്‍ ശ്രദ്ധയില്‍പ്പെട്ടു.
ഓരോ സീനിലും ഉണ്ടായിരിക്കേണ്ട ഘടകങ്ങളെ കുറിച്ചായിരുന്നു അത്. ചിരി (laugh), പ്രണയം (love), പിന്നെ.. എല്‍.എസ്.ഡി (LSD) അല്ല, എല്‍.സി.ഡി (LCD) ക്ഷമിക്കണം, എനിക്ക് തെറ്റിയതാണ്. 'L' ഫോര്‍ ലാഫ് (laugh), 'C' ഫോര്‍ െ്രെക (cry)... മൂന്നാമത്തേത് ഞാന്‍ മറന്നുപോയി, സര്‍. ഞാന്‍ പോയിട്ട് അത് വീണ്ടും പരിശോധിക്കാം.''
https://www.facebook.com/Malayalivartha
