അഭിനേതാവ് ചെയ്യുന്നതുപോലെ എഐയ്ക്ക് ചെയ്യാന് സാധിക്കില്ല; എഐയെ കുറിച്ച് ജയസൂര്യ പറയുന്നത്
എഐ സിനിമയുടെ പ്രീ പ്രൊഡക്ഷന് സമയത്ത് വലിയ സഹായമാണെന്ന് നടന് ജയസൂര്യ. സംവിധായകന് ദൃശ്യങ്ങള് ഉണ്ടാക്കി നോക്കാനും കലാസംവിധായകനും കോസ്റ്റ്യൂമര്ക്കും കാര്യങ്ങള് നോക്കാനും സാധിക്കും. അതുപോലെ സിനിമയുടെ എല്ലാ മേഖലകളിലും ഇത്തരം സഹായത്തിന് ഉപയോഗിക്കാം. അല്ലാതെയുള്ള ക്രിയേറ്റീവ് സ്ഥലത്തേക്ക് എഐ എത്രത്തോളം സഹായിക്കുമെന്ന് വരും നാളുകളിലേ അറിയാന് പറ്റൂവെന്നും അദ്ദേഹം പറഞ്ഞു.
സിനിമ ഇപ്പോള് ഇറങ്ങുന്ന ക്വാളിറ്റിയില് എടുക്കാന് നിലവില് എഐക്ക് സാധിക്കില്ല. എന്നാല്, ആ വികാരം ആവിഷ്കരിക്കാന് അവരെ സഹായിച്ചേക്കാം. ഒരു നടന് സ്വാഭാവികമായി ചെയ്യുന്ന ഒന്നുണ്ട്, അത് എഐയിലൂടെ കിട്ടില്ല. തല്ക്കാലം എഐയെ കലാകാരന്മാര് പേടിക്കേണ്ടതില്ല. സ്പൈഡര്, സൂപ്പര്മാന് എന്നതൊന്നും ശരിക്കും ഇല്ലെന്നു നമുക്കറിയാം. എന്നാല്, അത് ആരോ സൃഷ്ടിച്ചതാണ്. അതുപോലെ കുറച്ചു കഴിയുമ്പോള് എഐ ആണോ അല്ലയോ എന്ന് നമുക്ക് മനസിലാകും. പക്ഷേ അതിനു സമയമെടുക്കും. സിനിമയില് ഗ്രാഫിക്സും മറ്റും കൂടുതലായി ഉപയോഗിക്കുമ്പോഴും 'ഇമാജിനേഷന്' വലിയ പങ്കുണ്ട്. ബീച്ചിന്റെ അവിടെ നില്ക്കുന്നതു പോലെ ഗ്രീന് മാറ്റില് വച്ച് ഷൂട്ട് ചെയ്താലും ആ ഇമോഷന് കിട്ടണമെങ്കില് എളുപ്പമല്ല. അത് അനുസരിച്ച് അഭിനയിക്കണം. ഇത് ഇമാജിനേഷനിലൂടെയാണ് സംഭവിക്കുന്നത്.
ഒരു അഭിനേതാവ് ചെയ്യുന്നത് പോലെ എഐയ്ക്ക് ചെയ്യാന് സാധിക്കില്ല. അവിടെയാണ് മനോഹരമായ ക്രിയേഷന് നടക്കുന്നത്. ഡിജിറ്റല് ഇരട്ടയെ അഭിനയിപ്പിക്കാമെന്നും പണം തരാമെന്നും പറഞ്ഞാല് സമ്മതിക്കുമോ എന്ന് പ്രേക്ഷകര് ചോദിച്ചപ്പോള് പണിയെടുത്ത് പൈസയുണ്ടാക്കാനാണ് എനിക്ക് താല്പര്യമെന്ന് ജയസൂര്യ പ്രതികരിച്ചു. അതിന്റെ സന്തോഷം പ്രധാനമാണ്. സംതൃപ്തി കിട്ടണമെങ്കില് ജോലിയെടുത്ത് സമ്പാദിക്കണം. താന് അങ്ങനെ ചെയ്തോളാമെന്നും ജയസൂര്യ പറഞ്ഞു.
https://www.facebook.com/Malayalivartha
