മാന്യത കാണിക്കേണ്ടത് വിഡിയോ എടുക്കുന്നവരും പോസ്റ്റ് ചെയ്യുന്നവരുമാണെന്ന് രമ്യ പണിക്കര്
ആറ്റുകാല് പൊങ്കാലയുമായി ബന്ധപ്പെട്ട് സോഷ്യല് മീഡിയയില് നടക്കുന്ന വിവാദങ്ങളില് പ്രതികരണവുമായി നടി രമ്യ പണിക്കര്. വീട്ടിലെ സ്വകാര്യതയില് നിന്നുള്ള നിമിഷങ്ങള് എടുത്ത് പുറത്തു പ്രചരിപ്പിച്ചതിന് ശേഷം, നമ്മളോട് തന്നെ കൂടുതല് ശ്രദ്ധിക്കണം, കോസ്റ്റ്യൂം മാന്യമായിരിക്കണം എന്ന് പറയുന്നത് ശരിയായ സമീപനമല്ലെന്ന് താരം പറഞ്ഞു. മാന്യത കാണിക്കേണ്ടത് വിഡിയോയില് ഉള്ളവര് മാത്രമല്ല, അതെടുക്കുന്നവരും പോസ്റ്റ് ചെയ്യുന്നവരുമാണെന്നും രമ്യ പണിക്കര് കൂട്ടിച്ചേര്ത്തു.
''പ്രിയപ്പെട്ടവരേ, ആറ്റുകാല് അമ്മയുടെ പൊങ്കാല പ്രമാണിച്ച് ഞാന് എന്റെ വീട്ടില് അച്ഛനും അമ്മയും കൂടെ, വളരെ സ്വകാര്യതയോടും െ്രെപവസിയോടും കൂടിയാണ് പൊങ്കാല അര്പ്പിച്ചത്. സന്തോഷത്തോടെ പൊങ്കാല ഇട്ടുകൊണ്ടിരുന്ന സമയത്ത് ചില ഓണ്ലൈന് മീഡിയ പ്രവര്ത്തകര് വീട്ടിലേക്ക് എത്തി വിശേഷങ്ങള് ചോദിക്കാമെന്ന നിലയില് വിഡിയോയും ചിത്രങ്ങളും എടുത്ത് മടങ്ങി.
പൊങ്കാല ഇടുമ്പോള് അടുപ്പ് മുറ്റത്ത് തറയില് വച്ചാണ് നില്ക്കുന്നത്. തീയുടെയും പായസത്തിന്റെയും അരിയുടെയും കാര്യങ്ങളില് മുഴുവന് ശ്രദ്ധ കേന്ദ്രീകരിച്ചിരിക്കുമ്പോള്, ആരൊക്കെ എങ്ങനെയൊക്കെ സൂം ചെയ്ത് ചിത്രീകരിക്കുന്നു എന്നത് ശ്രദ്ധിക്കാന് സാധിക്കാത്ത അവസ്ഥയാണ്. അതും സ്വന്തം വീടിന്റെ കംഫര്ട്ട് സോണില് നില്ക്കുന്ന സമയത്ത്.
പ്രതീക്ഷിക്കാതെ എത്തി ചിത്രീകരിച്ച ചില വിഡിയോകള് പിന്നീട് പുറത്തുവന്നത് ശ്രദ്ധയില്പ്പെട്ടു. എന്റേതു മാത്രമല്ല, മറ്റു ചില ആര്ട്ടിസ്റ്റുമാരുടെയും വിഡിയോകള് ഇതുപോലെ പ്രചരിക്കുന്നതായി കാണുന്നു. അതുകൊണ്ട് ഒരു വിനീതമായ അഭ്യര്ഥന — നിങ്ങളോടുള്ള വിശ്വാസത്തിലാണ് ഞങ്ങള് ചോദ്യങ്ങള്ക്ക് മറുപടി പറയുന്നത്. ആ വിശ്വാസം കാത്തുസൂക്ഷിക്കേണ്ട ഉത്തരവാദിത്വം നിങ്ങളുടേയും ആണ്. ഒരു പോസ്റ്റോ വിഡിയോയോ പങ്കുവയ്ക്കുന്നതിന് മുമ്പ് ഒരിക്കല് അല്ലെങ്കില് രണ്ടിക്കല് ആലോചിക്കണം. അത് നിങ്ങളുടെ കള്ച്ചറിനെയും പ്രഫഷണലിസത്തെയും പ്രതിഫലിപ്പിക്കുന്നതാണ്.
വീട്ടിലെത്തിയ എല്ലാ മീഡിയ സുഹൃത്തുക്കളോടും ഞങ്ങള് മാന്യമായിട്ടാണ് പെരുമാറിയത്. വീട്ടിലെ സ്വകാര്യതയില് നിന്നുള്ള നിമിഷങ്ങള് എടുത്ത് പുറത്തു പ്രചരിപ്പിച്ചതിന് ശേഷം, നമ്മളോട് തന്നെ കൂടുതല് ശ്രദ്ധിക്കണം, കോസ്റ്റ്യൂം മാന്യമായിരിക്കണം എന്ന് പറയുന്നത് ശരിയായ സമീപനം അല്ല. മാന്യത കാണിക്കേണ്ടത് വിഡിയോയില് ഉള്ളവര് മാത്രമല്ല — എടുക്കുന്നവരും പോസ്റ്റ് ചെയ്യുന്നവരുമാണ്. ഇതാണ് പറയാനുള്ളത്. നന്ദി'–രമ്യ പണിക്കരുടെ വാക്കുകള്.
https://www.facebook.com/Malayalivartha
