ക്രൈംബ്രാഞ്ച് സംഘം പിഎസ്സി ചെയര്മാനെതിരെ ഉള്പ്പെടെ ലഭിച്ച പരാതികള് പരിശോധിക്കുന്നു
പിഎസ്സി നിയമന ക്രമക്കേടുമായി ബന്ധപ്പെട്ട് അന്വേഷണം നടത്തുന്ന ക്രൈംബ്രാഞ്ച് സംഘം പിഎസ്സി ചെയര്മാനെതിരെ ഉള്പ്പെടെ ലഭിച്ച പരാതികള് പരിശോധിക്കുന്നു. നിരവധി പരാതികളാണ് ചെയര്മാനെതിരെയും ലഭിച്ചിരിക്കുന്നത്. ഈ പരാതികളുമായി ബന്ധപ്പെട്ട വിവരങ്ങള് ശേഖരിച്ച ശേഷം തുടര്നടപടി സ്വീകരിക്കും.
പരീക്ഷാ ക്രമക്കേടില് പിഎസ്സി ആസ്ഥാനത്ത് വിപുലമായ പരിശോധനയാണ് ക്രൈംബ്രാഞ്ച് സംഘം നടത്തുന്നത്. വെള്ളിയാഴ്ച വരെ പരിശോധന തുടരും. സൈബര് സാങ്കേതിക വിദഗ്ധര് ഉള്പ്പെടെ 20 പേരടങ്ങുന്ന സംഘം രാവിലെ മുതല് വൈകിട്ടുവരെ വിശദമായ പരിശോധനയാണ് നടത്തുന്നത്. ആസൂത്രണ ബോര്ഡ് ചീഫ് തസ്തികയിലേക്കു നടന്ന പരീക്ഷയ്ക്ക് ഓണ്സ്ക്രീന് മാര്ക്കിടാന് ഉപയോഗിച്ച കംപ്യൂട്ടറുകളും ഓണ്ലൈന് രേഖകളും ഉത്തരക്കടലാസുകള് അയച്ചുകൊടുക്കുന്ന രീതികളും ഉള്പ്പെടെ പരിശോധിക്കുന്നുണ്ട്. രണ്ടുദിവസം കൂടി പരിശോധന തുടരും.
ഈ ആഴ്ചയ്ക്കുള്ളില് പരമാവധി തെളിവുകള് ശേഖരിക്കുകയാണ് സംഘത്തിന്റെ ലക്ഷ്യം. ആസൂത്രണ ബോര്ഡ് ചീഫ് തസ്തികയിലേക്കുള്ള പരീക്ഷയില് 10 ചോദ്യങ്ങള് മൂല്യനിര്ണയം നടത്താതിരുന്നതില് ക്രൈംബ്രാഞ്ച് കേസെടുത്തിരുന്നു. ഇതില് ഉദ്യോഗസ്ഥരുടെ പേരെടുത്തു പറഞ്ഞിരുന്നില്ല. തെളിവുകള് ശേഖരിച്ച ശേഷം പ്രതികളുടെ പേര് ഉള്പ്പെടെ കോടതിയില് റിപ്പോര്ട്ട് നല്കാനാണ് സംഘം ശ്രമിക്കുന്നത്. ഇതിനു പുറമേ മറ്റു പരാതികളില് കേസെടുക്കുന്ന കാര്യവും സംഘം പരിഗണിക്കുന്നുണ്ട്.
https://www.facebook.com/Malayalivartha
