തെന്നിന്ത്യയില്‍ ഏറെ താരമൂല്യമുള്ള നടിയാണ് അനുഷ്‌ക ഷെട്ടി. രാജമൗലിയുടെ ബാഹുബലി 2 കണ്ടവരാരും ദേവസേനയെ മറക്കാനിടയില്ല. ഏറെ പ്രതീക്ഷ പുലര്‍ത്തുന്ന ഒരു പ്രോജക്ടാണ് അനുഷ്‌കയുടേതായി അടുത്തതായി തീയേറ്ററിലെത്താനുള്ളത്. 

അശോക്.ജി സംവിധാനം ചെയ്യുന്ന ഭാഗ്മതിയില്‍ ടൈറ്റില്‍ കഥാപാത്രത്തെയാണ് അനുഷ്‌ക അവതരിപ്പിക്കുക. ഒരു മോഡേണ്‍ഡേ ത്രില്ലര്‍ എന്ന് സംവിധായകന്‍ വിശേഷിപ്പിച്ച ചിത്രത്തില്‍ അനുഷ്‌കയുടെ നായകനാവുകയാണ് മലയാളത്തിന്റെ ഉണ്ണി മുകുന്ദന്‍. 

ഉണ്ണി മുകുന്ദന്‍ പ്രഭാസിന് പകരം അനുഷ്‌കയുടെ നായകനാകുന്നെന്ന വാര്‍ത്ത ട്രോളില്‍ മുങ്ങിയിരുന്നു. ഉണ്ണി മുകുന്ദനെവിടെക്കിടക്കുന്നു പ്രഭാസ് എവിടെക്കിടക്കുന്നു എന്നാണ് പലരും ചോദിച്ചത്. എന്നാല്‍ അത് സംഭവിച്ചത് തന്നെ. മാത്രമല്ല ഉണ്ണിയെപ്പറ്റി അനുഷ്‌ക പുകഴ്ത്തിയും പറഞ്ഞു. 

നടനെന്ന നിലയിലും മനുഷ്യനെന്ന നിലയിലുമുള്ള ഗുണങ്ങള്‍ മറ്റുള്ളവര്‍ക്കിടയില്‍ എപ്പോഴും നിങ്ങളെ എടുത്തുനിര്‍ത്തുമെന്ന് അനുഷ്‌ക ഉണ്ണി മുകുന്ദനെക്കുറിച്ച് പറയുന്നു. ഒപ്പം കരിയറില്‍ എല്ലാ വിജയങ്ങളും നേരുന്നുവെന്നും ഒരുമിച്ച് കൂടുതല്‍ സിനിമകള്‍ ചെയ്യാന്‍ ആഗ്രഹമുണ്ടെന്നും കുറിച്ചു. 

ഉണ്ണി മുകുന്ദനും അനുഷ്‌കയ്‌ക്കൊപ്പമുള്ള അനുഭവത്തെക്കുറിച്ച് വ്യക്തമാക്കി. ഏറ്റവും സൗന്ദര്യമുള്ള സ്ത്രീക്കൊപ്പമുള്ള ഒരു യാത്രയായിരുന്നു ഇത്. സൗന്ദര്യം പുറമേയുള്ളത് മാത്രമല്ല. അത്ഭുതകരമായ സ്ത്രീയാണ് അനുഷ്‌കയെന്നും ഉണ്ണി മുകുന്ദന്‍ കുറിച്ചു.