എണ്‍പതുകളില്‍ മലയാളത്തിലെ ഏറ്റവും റൊമാന്റിക് നായകനാണ് റഹ്മാന്‍. നീണ്ട ഇടവേളയ്ക്ക് ശേഷം ഇപ്പോള്‍ അഭിനയ രംഗത്ത് സജീവ സാന്നിധ്യമായിരിക്കുകയാണ് താരം. സിനിമയിലേക്ക് തിരിച്ച് വരണമെന്ന് ഒരിക്കലും ആഗ്രഹിച്ചിരുന്നില്ലെന്ന് റഹ്മാന്‍ പറയുന്നു. ഒരു സിനിമ പോലുമില്ലാതെ വീട്ടിലിരുന്ന കാലമുണ്ടായിരുന്നെന്നും അപ്പോഴാണ് നെഗറ്റീവ് റോളുകള്‍ ചെയ്യാന്‍ തീരുമാനിച്ചതെന്നും താരം വ്യക്തമാക്കി.

ഡാഡി എന്താ വില്ലനാകാത്തതെന്ന മകള്‍ അലീഷയുടെ ചോദ്യത്തിന് ധ്രുവങ്ങള്‍ 16 റിലീസാകും വരെ ഉത്തരമുണ്ടായിരുന്നില്ലെന്നും താരം വിവരിച്ചു. രണ്ട് പെണ്‍മക്കളാണ് റഹ്മാനുള്ളത്. മൂത്തമകള്‍ റുഷ്ദ എം ബി എയ്ക്ക് പഠിക്കാന്‍ തയ്യാറെടുക്കുന്നു. രണ്ടാമത്തെ മകള്‍ അലീഷ ഒമ്പതാം ക്ലാസിലാണ്. മക്കളുടെ അഭിനയ മോഹത്തെക്കുറിച്ചും റഹ്മാന്‍ വിവരിച്ചു.

രണ്ടുപേര്‍ക്കും അഭിനയത്തില്‍ താല്‍പര്യമുണ്ടെന്നും നല്ല റോളുകള്‍ വന്നാല്‍ തീര്‍ച്ചയായും അവര്‍ സിനിമയിലെത്തുമെന്നും അദ്ദേഹം വ്യക്തമാക്കി. മമ്മൂട്ടിയുടെ മകനും റഹ്മാന്റെ മകളും നായികാനായകന്മാരായി സിനിമ വരുമോ എന്ന ചോദ്യത്തിന് എല്ലാം പ്ലാന്‍ ചെയ്യുന്നത് മുകളിലുളള ആളല്ലേ, അങ്ങനെ സംഭവിച്ചാല്‍ നല്ലതെന്നായിരുന്നു മറുപടി. ദുല്‍ഖറിന്റെ കടുത്ത ആരാധികയാണ് റുഷ്ദയെന്നും റഹ്മാന്‍ വെളിപ്പെടുത്തി.