നടന്‍ ഷാജോണിന് വേണ്ടി തമിഴ് സംവിധായകന്‍ ഷങ്കര്‍ രജനി ചിത്രം യന്തിരന്‍ രണ്ടിന്റെ ചിത്രീകരണം നീട്ടി. ഷാജോണിന്റെ ദൃശ്യത്തിലെ പ്രകടനം കണ്ടാണ് ഷങ്കര്‍ ഷാജോണിനെ കാസ്റ്റ് ചെയ്തത്. ഷങ്കറിന്റെ ഓഫീസില്‍ നിന്നാണ് താരത്തെ വിളിച്ചത്. ആരെങ്കിലും പറ്റിക്കാന്‍ വിളിച്ചതാണെന്നാണ് ഷാജോണ്‍ കരുതിയത്. താല്‍പര്യമുണ്ടെങ്കില്‍ മേയ് 10 മുതല്‍ 18 വരെ ചെന്നൈയില്‍ എത്തണമെന്നും അറിയിച്ചു. അക്ഷയ്കുമാറും ഒത്തുള്ള കോമ്പിനേഷന്‍ സീനാണെന്നും സൂചിപ്പിച്ചു. എന്നാല്‍ ആ ദിവസങ്ങളില്‍ ഗള്‍ഫില്‍ സ്‌റ്റേജ്‌ഷോയ്ക്ക് പോകണമെന്ന് ഷാജോണ്‍ മറുപടി നല്‍കി. ചെറിയ സീനാണെങ്കിലും അഭിനയിക്കണമെന്നുണ്ട്. ഗള്‍ഫ് ഷോ കഴിഞ്ഞ് എപ്പോ വേണമെങ്കിലും എത്താമെന്നും ഉറപ്പ് നല്‍കി. 

അരമണിക്കൂര്‍ കഴിഞ്ഞ് ഷങ്കറിന്റെ ഓഫീസില്‍ നിന്ന് വീണ്ടും വിളിച്ചു. ജൂണ്‍ 10-നും 13-നും ഇടയില്‍ വരാമോന്ന് ചോദിച്ചു. താരം ഓകെ പറഞ്ഞു. അങ്ങനെ ഷാജോണ്‍ ജൂണ്‍ 12-ന് ചെന്നൈയിലെത്തി. താമസിക്കാനായി ആഢംബര ഹോട്ടലില്‍ കൊണ്ടുപോയപ്പോഴാണ് യന്തിരനിലേക്ക് തന്നെയാണ് വിളിച്ചതെന്ന് ഷാജോണ്‍ ഉറപ്പിച്ചത്. അടുത്ത ദിവസം അക്ഷയ്കുമാറും ഒത്തുള്ള സീനുകളാണ് ചിത്രീകരിച്ചത്. ഇതിനിടെ രജനീകാന്തിനെ പരിചയപ്പെടണമെന്ന് ഷാജോണ്‍ ഷങ്കറിന്റെ അസിസ്റ്റന്റിനോട് ആവശ്യപ്പെട്ടു. ഒരു ദിവസം ഷാജോണ്‍ കാരവനില്‍ ഇരിക്കുമ്പോള്‍ ഷങ്കര്‍ വിളിപ്പിച്ചു. അവിടെ ചെന്നപ്പോള്‍ ഷങ്കറും കൂടെയുണ്ടായിരുന്ന ആളും എഴുന്നേറ്റു. കൂടെയുണ്ടായിരുന്നത് രജനീകാന്തായിരുന്നു. രജനീകാന്ത് അമേരിക്കയില്‍ നിന്ന് ചികില്‍സ കഴിഞ്ഞ് എത്തിയ സമയമായിരുന്നു. അദ്ദേഹവുമായി ഷാജോണ്‍ കുറച്ച്‌നേരം സംസാരിച്ചു. ഷങ്കറിനാണെങ്കില്‍ കൊച്ചിന്‍ ഹനീഫയെ കുറിച്ച് മാത്രമാണ് പറയാനുണ്ടായിരുന്നത്. ദീപാവലിക്കാണ് യന്തിരന്‍ ടു റിലീസ്. അതിനായി കാത്തിരിക്കുകയാണ് ഷാജോണ്‍. കഥാപാത്രത്തെ കുറിച്ച് പുറത്ത് പറയരുതെന്ന് കര്‍ശന നിര്‍ദ്ദേശമുണ്ടെന്ന് താരം പറഞ്ഞു.