തീയറ്ററുകളിൽ സിനിമകൾക്ക് മുൻപ് ദേശീയഗാനം നിർബന്ധമാക്കണോ..? വിദ്യ ബാലന്റെ പ്രതികരണം ഇങ്ങനെ
രാജ്യത്തെ സിനിമാ തീയറ്ററുകളിൽ ഷോ തുടങ്ങുന്നതിന് മുമ്പ് ദേശീയ ഗാനം നിർബന്ധമായി കേള്പ്പിക്കണമെന്ന് സുപ്രീംകോടതി ഉത്തരവിട്ടിരുന്നു. ഈ വിധി സുപ്രീം കോടതി പുനഃപരിശോധിക്കാനിരിക്കുകയാണ്. ഇതിനിടയിൽ നിരവധിപ്പേർ തങ്ങളുടെ നിലപാടറിയിച്ച് രംഗത്തെത്തിയിരുന്നു.
ഏറ്റവും ഒടുവിലായി താര സുന്ദരി വിദ്യ ബാലനും ഈ വിഷയത്തിൽ അഭിപ്രായപ്രകടനം നടത്തിയിരിക്കുകയാണ്. ഒരു പൊതുചടങ്ങിൽ വച്ച് വിദ്യ പറഞ്ഞതിങ്ങനെ; 'സിനിമകൾക്ക് മുൻപ് ദേശീയഗാനം നിർബന്ധമാക്കണമെന്ന് എനിക്ക് തോന്നുന്നില്ല. ദേശീയഗാനം കേട്ട് ഒരു ദിവസം ആരംഭിക്കാൻ നമ്മൾ സ്കൂളിലൊന്നുമല്ലല്ലോ.
എന്റെ വ്യക്തിപരമായ അഭിപ്രായം എന്തെന്നാൽ ദേശീയഗാനം വയ്ക്കരുതെന്ന് തന്നെയാണ്. ദേശഭക്തി അടിച്ചേൽപിപ്പിക്കണ്ട ഒന്നല്ല. എന്നോട് ആരും പറഞ്ഞു തരേണ്ട ആവശ്യവുമില്ല . ദേശീയഗാനം കേൾക്കുമ്പോൾ എവിടെയാണെങ്കിലും ഞാൻ എഴുന്നേറ്റ് നിൽക്കാറുണ്ട്'. ഈ അഭിപ്രായം തന്നെയായിരുന്നു ഗായകൻ സോനു നിഗമിനും.
എല്ലാ രാജ്യത്തിന്റെയും ദേശീയ ഗാനം ബഹുമാനിക്കേണ്ടത് തന്നെയാണെന്നും എന്നാൽ സിനിമ തീയറ്ററുകളും ഭക്ഷണശാലകളുമല്ല അവ ആലപിക്കേണ്ട സ്ഥലമെന്നും സോനു പറഞ്ഞു. ഇനി പാക്കിസ്ഥാന്റെ ദേശീയ ഗാനം വയ്ക്കുമ്പോൾ പോലും താൻ എഴുന്നേറ്റ് നിൽക്കുമെന്നും കാരണം അത് ആ രാജ്യത്തോടും അവിടുത്തെ ജനങ്ങളോടുമുള്ള ബഹുമാനമാണെന്നും സോനു പറഞ്ഞു. വിധി സുപ്രീം കോടതി പുനഃപരിശോധിക്കാനിരിക്കെ ഇതിനോടകംതന്നെ നിരവധി പ്രമുഖർ തിയേറ്ററുകളിൽ ദേശീയ ഗാനം നിർബന്ധമാക്കുന്നതിൽ തങ്ങളുടെ നിലപാടറിയിച്ച് രംഗത്തെത്തിയിരുന്നു.
കഴിഞ്ഞ ദിവസം നടൻ അരവിന്ദ് സ്വാമി ഈ വിഷയത്തിൽ പ്രതികരിച്ചിരുന്നു. ദേശീയഗാനം തിയേറ്ററുകളിൽ മാത്രമല്ല കോടതികളിലും നിയമസഭ, പാർലമെന്റ് സമ്മേളനങ്ങൾക്ക് മുൻപും നിർബന്ധമാക്കിയാലെന്താണെന്നായിരുന്നു അരവിന്ദ് സ്വാമി ചോദിച്ചത്. ഇരുപതും മുപ്പതും മിനുട്ടുകൾ ക്ലബിനും ഹോട്ടലിനും പുറത്ത് കാത്ത് നിൽക്കുന്നവർക്ക് വെറും അമ്പത്തിരണ്ട് സെക്കൻഡ് ദേശീയഗാനത്തിനായി എഴുന്നേറ്റു നിൽക്കുന്നത് ബുദ്ധിമുട്ടുള്ള കാര്യമാണോ എന്നാണ് ഇന്ത്യൻ ക്രിക്കറ്റ് താരം ഗൗതം ഗംഭീർ ചോദിച്ചത്.
https://www.facebook.com/Malayalivartha