ബിസിനസുകാരനുമായുള്ള വിവാഹം നടക്കാനിരിക്കെ പഴയ പ്രണയകഥകള്‍ ലക്ഷ്‌മി റായിയുടേയും ഉറക്കം പോയി
ഒത്തുകളി വിവാദത്തില്‍ പെട്ട്‌ ശ്രീശാന്ത്‌ അറസ്‌റ്റിലാവുകയും ഇന്ത്യന്‍ ക്രിക്കറ്റില്‍ നടമാടുന്ന അഴിമതിക്കഥകള്‍ ഓരോന്നായി ദിനവും പുറത്തുവരികയും ചെയ്യുന്നതില്‍ തെന്നിന്ത്യന്‍ താരസുന്ദരി ലക്ഷ്‌മി റായി അങ്കലാപ്പിലാണ്‌. ലക്ഷ്‌മി റായിയെയും ധോണിയെയും ശ്രീശാന്തിനെയും ചേര്‍ത്ത്‌ നിരവധി പ്രണയകഥകള്‍ മുന്‍പ്‌ പ്രചരിച്ചിരുന്നു. ഇപ്പോള്‍ ആ പഴയകഥകള്‍ പൊടിതട്ടിയെടുത്ത്‌ നിറം പിടിപ്പിച്ച്‌ നിരത്തുന്നത്‌ നടിയുടെ ഉറക്കം നഷ്‌ടമാക്കിയിരിക്കുകയാണ്‌.
തന്റെ പേര്‌ വിവാദത്തിലേക്ക്‌ വലിച്ചിഴയ്‌ക്കരുത്‌. ഐപിഎല്‍ ഫസ്‌റ്റ് സീസണില്‍ താനും നയന്‍താരയ്‌ക്കൊപ്പം ടീമിന്റെ ബ്രാന്റ്‌ അംബാസിഡറായിരുന്നുവെന്നല്ലാതെ തനിക്ക്‌ ക്രിക്കറ്റുമായി ബന്ധങ്ങളൊന്നുമില്ലെന്നും ലക്ഷ്‌മി പറയുന്നു. അന്ന്‌ ശ്രീശാന്തുമായി പരിചയം ഉണ്ടായിരുന്നു. പക്ഷേ ഇപ്പോള്‍ ശ്രീയുമായി സംസാരിച്ചിട്ട്‌ മൂന്നു വര്‍ഷമെങ്കിലുമായി. ശ്രീയോടൊപ്പം ചില ഫോട്ടോ ഷൂട്ടുകളില്‍ പങ്കെടുത്തിട്ടുണ്ടെന്നല്ലാതെ മാധ്യമങ്ങളില്‍ പ്രചരിക്കുന്നതുപോലെ താനും ശ്രീശാന്തും പ്രണയത്തിലായിരുന്നില്ലെന്നും ലക്ഷ്‌മി ആണയിടുന്നു.
സിനിമാ ഷൂട്ടിംഗുമായി തിരക്കിലായിരുന്ന തനിക്ക്‌ പിന്നീട്‌ ക്രിക്കറ്റ്‌ കളി കാണാനോ ക്രിക്കറ്റ്‌ താരങ്ങളുമായി സൗഹൃദം പുതുക്കാനോ സമയം കിട്ടിയിരുന്നില്ലെന്നാണ്‌ താരസുന്ദരി പറയുന്നത്‌. എന്നാല്‍, ഇക്കാലയളവില്‍ താരക്രിക്കറ്റിന്‌ കേരള സ്‌ട്രൈക്കേഴ്‌സിനെ പിന്തുണയ്‌ക്കാനായി താന്‍ ഗ്രൗണ്ടിലിറങ്ങിയത്‌ ടീം ഉടമ കൂടിയായ പ്രിയദര്‍ശന്റെ സ്‌നേഹപൂര്‍ണ്ണമായ നിര്‍ബന്ധത്തിന്‌ വഴങ്ങിയായിരുന്നുവെന്നും ലക്ഷ്‌മി വിശദീകരിക്കുന്നു.
ഇപ്പോള്‍ താനൊരു ബിസിനസുകാരനുമായി പ്രണയത്തിലാണ്‌. ഈയവസരത്തില്‍ ചിലര്‍ മനപൂര്‍വ്വം തന്റെ സല്‍പ്പേരും വ്യക്‌തിജീവിതവും തകര്‍ക്കാന്‍ കച്ചകെട്ടിയിറങ്ങിയിരിക്കയാണെന്നും അവരാണ്‌ തന്റെ പേര്‌ ഈ ഒത്തുകളി വിവാദത്തിലേക്ക്‌ വലിച്ചിഴയ്‌ക്കാന്‍ ശ്രമിക്കുന്നതെന്നും ലക്ഷ്‌മി പറഞ്ഞു.
ശ്രീശാന്തുമായുള്ള പ്രണയകഥകള്‍ കൂടാതെ ധോണിയുമായും ചെന്നൈ സൂപ്പര്‍ കിംഗ്‌സ് ഉടമ ഗുരുനാഥുമായും ലക്ഷ്‌മിക്ക്‌ വളരെ അടുത്ത ബന്ധമാണുള്ളതെന്നും റിപ്പോര്‍ട്ടുകള്‍ പ്രചരിക്കുന്നുണ്ട്‌. എന്നാല്‍, ഗുരുനാഥ്‌ എന്ന്‌ പേരുള്ള ഒരാളെ അറിയുക പോലുമില്ലെന്നാണ്‌ ലക്ഷ്‌മി പറയുന്നത്‌. ധോണിയുമായി വര്‍ഷങ്ങളായി ബന്ധമൊന്നുമില്ല. അദ്ദേഹം വിവാഹിതനുമാണ്‌. ക്രിക്കറ്റിലെ ആരുമായും അടുപ്പവും ബന്ധവുമില്ലെന്നും ലക്ഷ്‌മി പറഞ്ഞു.
ബിസിനസുകാരനായ കാമുകന്‍ തന്റെ സങ്കല്‍പ്പത്തിലെ പുരുഷനാണെന്നും വിവാഹം രണ്ടു വര്‍ഷം കൂടി കഴിഞ്ഞേ ഉണ്ടാവൂ എന്നും ലക്ഷ്‌മി പറഞ്ഞു.
https://www.facebook.com/Malayalivartha
