രജനിയെപ്പോലെ ധനൂഷും ഇനി നല്ലവഴിക്ക്. പുകവലി പൂര്‍ണമായും ഒഴിവാക്കാനുള്ള തീരുമാനത്തിലാണ് താരം. പിഎംകെ നേതാവും മുന്‍ കേന്ദ്രമന്ത്രിയുമായ അന്‍പുമണിയുടെ അഭ്യര്‍ത്ഥനയെ തുടര്‍ന്ന് തമിഴ് നടന്‍ ധനുഷ് തന്റെ സിനിമകളില്‍ പുകവലി ഒഴിവാക്കാന്‍ തീരുമാനിച്ചു. ഇനി സിനിമയില്‍ പുകവലി രംഗങ്ങളില്‍ അഭിനയിക്കില്ലെന്നാണ് ധനുഷ് തീരുമാനിച്ചിരിക്കുന്നത്.
സിനിമയില്‍ പുകവലി രംഗങ്ങളില്‍ അഭിനയിക്കുന്നത് നിര്‍ത്തണമെന്ന് ആവശ്യപ്പെട്ട് അന്‍പുമണി ധനുഷിന് കത്തയച്ചിരുന്നു. സിനിമയിലെ പുകവലി രംഗങ്ങള്‍ യുവാക്കളെ ആകര്‍ഷിക്കുന്നുവെന്നും ഇത് പഠനങ്ങളില്‍ തെളിഞ്ഞിട്ടുണ്ടെന്നുമാണ് അന്‍പുമണി പറഞ്ഞത്. ധനുഷിന്റെ ആരാധകര്‍ ഏറെയും യുവാക്കളാണ്. അതിനാല്‍ ധനുഷിന്റെ സിനിമയിലെ പുകവലിരംഗങ്ങള്‍ യുവാക്കളേയും പുകവലിക്കാന്‍ പ്രേരിപ്പിക്കുമെന്നുമായിരുന്നു അന്‍പുമണിയുടെ കത്തില്‍ പറഞ്ഞത്. സിനിമയിലെ പുകവലി രംഗങ്ങള്‍ ധനുഷിന്റെ പ്രതിശ്ചായയെ ബാധിക്കുമെന്നും അന്‍പുമണി കത്തില്‍ പറഞ്ഞിരുന്നു. ഈ കത്ത് പരിഗണിച്ചാണ് ധനുഷ് പുകവലി രംഗങ്ങളില്‍ അഭിനയിക്കുന്നത് ഒഴിവാക്കുമെന്ന തീരുമാനമെടുത്തത്. യഥാര്‍ഥ ജീവിതത്തില്‍ ഞാന്‍ പുകവലിക്കാറില്ല. ഭാവിയില്‍ എന്റെ സിനിമകളില്‍ പുകവലി രംഗം ഉള്‍പ്പെടുത്താതിരിക്കാനും ശ്രദ്ധിക്കും ധനുഷ് പറഞ്ഞു.
പിഎംകെ നേതാവ് രാമദോസിന്റെ സമ്മര്‍ദ്ദത്തെ തുടര്‍ന്ന് സ്‌റ്റൈല്‍മന്നന്‍ രജനീകാന്ത് സിനിമയില്‍ പുകവലിക്കുന്നത് ഒഴിവാക്കിയിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha