സ്റ്റൈല് മന്നന് രജനി കാന്തിന് ഇന്ന് 67ാം പിറന്നാള്, ആഘോഷത്തില് തമിഴ് സിനിമാ ലോകം
സ്റ്റൈല് മന്നന് രജനി കാന്തിന് ഇന്ന് 67ാം പിറന്നാള്. രാജികാന്തിന്റെ പിറന്നാള് ആഘോഷിക്കുന്നതിന്റെ തിരക്കിലാണ് ആരാധകര്. സോഷ്യല് മീഡിയയില് രജനി കാന്തിന് ആശംസകള് നേര്ന്ന് നിരവധി പേര് എത്തി.
കര്ണ്ണാടക തമിഴ്നാട് അതിര്ത്തിയിലുളള നാച്ചിക്കുപ്പം എന്ന ചെറുഗ്രാമത്തിലേക്ക് കുടിയേറിയ മറാഠ കുടുംബങ്ങളിലൊന്നിലാണ് രജനീകാന്തിന്റെ പിതാവായ റാണോജിറാവു ഗെയ്ക്വാദ് ജനിച്ചത്. റാണോജി റാവുവിന് കോണ്സ്റ്റബിള് ആയി ജോലി കിട്ടിയതിനെ തുടര്ന്ന് കുടുംബം ബാംഗ്ലൂര് നഗരത്തിലെ ഹനുമന്ത് നഗര് എന്ന സ്ഥലത്ത് വന്ന് താമസമാക്കി. കുടുംബത്തിലെ നാലാമത്തെ മകനായി ജനിച്ച ശിവാജി റാവുവിന്റെ ഏഴാമത്തെ വയസ്സില് അമ്മ റാംബായി മരിച്ചു.
1975ല് കെ. ബാലചന്ദര് സംവിധാനം ചെയ്ത അപൂര്വ രാഗങ്ങള് എന്ന ചിത്രത്തിലൂടെയാണ് ശിവാജി റാവു തമിഴ് സിനിമയില് അരങ്ങേറ്റം കുറിച്ചത്. ശിവാജി റാവുവിന്റെ പേര് രജനികാന്ത് എന്ന് മാറ്റിയതും ബാലചന്ദറാണ്.
ഇതേ വര്ഷം പുറത്തിറങ്ങിയ കന്നട ചിത്രമായ കഥാ സംഗമയാണ് രജനിയുടെ ആദ്യ ചിത്രമായി കണക്കാക്കപ്പെടുന്നത്. ബാലചന്ദറിനെയാണ് രജനി ഗുരുവായി കരുതുന്നതെങ്കിലും ഈ നടന്റെ വളര്ച്ചക്ക് ഊര്ജ്ജം പകര്ന്ന സംവിധായകന് എസ്.പി. മുത്തുരാമനാണ്. മുത്തുരാമന് സംവിധാനം ചെയ്ത ഭുവന ഒരു കേള്വിക്കുറി(1977) എന്ന ചിത്രത്തിലെ വേഷം രജനിയെ ശ്രദ്ധേയനാക്കി.
ജെ. മഹേന്ദ്രന് സംവിധാനം ചെയ്ത മുള്ളും മലരും(1978) തമിഴ് സിനിമയില് രജനിയുടെ സിംഹാസനം ഉറപ്പിച്ചു. മുത്തുരാമന്റെ ആറിലിരുന്ത് അറുപതുവരെ (1977) ഈ നടന്റെ പ്രതിഛായക്ക് മാറ്റുകൂട്ടി. എഴുപതുകളുടെ അവസാന ഘട്ടത്തില് കമലഹാസന് നായകനായ ചിത്രങ്ങളില് വില്ലന് വേഷമായിരുന്നു രജനിക്ക് പതിവായി ലഭിച്ചിരുന്നത്. പതിനാറു വയതിനിലെ, അവര്ഗള് തുടങ്ങിയ ചിത്രങ്ങള് ഇതില് ഉള്പ്പെടുന്നു.
1980കളാണ് രജനിയുടെ അഭിനയ ജീവിതത്തിലെ സംഭവബഹുലമായ കാലഘട്ടമെന്ന് പറയാം. രജനി അഭിനയം നിര്ത്തുന്നതായുള്ള അഭ്യൂഹങ്ങള് പ്രചരിക്കുന്നതിനിടെ പുറത്തിറങ്ങിയ ബില്ല എന്ന ചിത്രം ബോക്സ് ഓഫീസില് തരംഗം സൃഷ്ടിച്ചു. അമിതാഭ് ബച്ചന് നായകനായ ഡോണ് എന്ന ഹിന്ദി ചിത്രത്തിന്റെ റീമേക്കായിരുന്നു ഇത്.
നായകന് എന്ന നിലയില് തമിഴകം അംഗീകരിച്ച രജനിയുടെ ഹിറ്റ് ചിത്രങ്ങള് ഒന്നിനു പുറകെ ഒന്നായി പുറത്തിറങ്ങി. മുരട്ടുകാളൈ, പോക്കിരി രാജ, താനിക്കാട്ടു രാജ, നാന് മഹാന് അല്ലൈ, മൂണ്രു മുഗം തുടങ്ങിയ ചിത്രങ്ങള് പ്രദര്ശനശാലകളില് പുതിയ ചരിത്രം കുറിച്ചു. കെ. ബാലചന്ദര് സ്വയം നിര്മിച്ച നെട്രികന് മറ്റൊരു നാഴികക്കല്ലായി. അമിതാഭ് ബച്ചന് ചിത്രങ്ങളുടെ റീമേക്കുകളാണ് ഈ കാലഘട്ടത്തില് രജനിയുടെ വളര്ച്ചക്ക് കരുത്തായത്.
https://www.facebook.com/Malayalivartha
