മാരകമായ ഒരു അപൂർവ പാരമ്പര്യരോഗമാണ് ടേ-സാക്സ് രോഗം എന്ന് പറയുന്നത്.കൊഴുപ്പിന്റെ ഉപാപചയ തകരാറാണ് ഈ രോഗത്തിന് കാരണമായി ഭവിക്കുന്നത്. ഒരു സവിശേഷയിനം കൊഴുപ്പ് നാഡീവ്യൂഹത്തിൽ ക്രമാധികമായി വർധിക്കുകയും തലച്ചോറിൽ അടിഞ്ഞുകൂടുകയും ക്രമേണ തലച്ചോറിന് അപചയം സംഭവി ക്കുകയും ചെയ്യുന്നു.
ജനനസമയത്ത് ശിശുവിന് പൂർണ ആരോഗ്യമുള്ളതായി തോന്നുമെങ്കിലും 3-6 മാസത്തിനിടയ്ക്ക് ഈ രോഗത്തിന്റെ ആദ്യ ലക്ഷണങ്ങൾ കണ്ടുതുടങ്ങും. ഉദാസീനതയും മന്ദതയും പ്രകടമാണ്. കഴുത്തിന്റെയും കൈകാലുകളുടെയും ശക്തി ക്ഷയിക്കുകയും കാഴ്ച ശക്തി ക്രമേണ കുറയുകയും ചെയ്യുന്നു. രോഗം മൂർച്ഛിക്കുന്നതോടെ പൂർണമായും അന്ധത ബാധിക്കുന്നു. കണ്ണുകൾ തുറന്നിരിക്കുമ്പോൾ തന്നെ കൃഷ്ണമണികൾ അങ്ങോട്ടുമിങ്ങോട്ടും ഉരുണ്ടുകൊണ്ടിരിക്കും. ഈ രോഗമുള്ള ശിശുക്കൾക്ക് ചുഴലിദീനവും ഉണ്ടാകാറുണ്ട്. രോഗം ക്രമേണ വർധിച്ച് നാലു വയസ്സിനുള്ളിൽതന്നെ മരണം സംഭവിക്കുന്നു. മസ്തിഷ്ക കോശങ്ങളുടെ സൂക്ഷ്മ നിരീക്ഷണം വഴിയാണ് രോഗനിർണയനം നടത്തുന്നത്. ഈ രോഗത്തിന് ഫലപ്രദമായ ചികിത്സ ഇതുവരെ കണ്ടുപിടിച്ചിട്ടില്ല.