ശരീരത്തിൽ രക്തത്തിന്റെ കുറവ് ഏവരെയും അലട്ടുന്ന ഒരു പ്രശ്നമാണ്.രക്തത്തിൽ ഹീമോഗ്ലോബിന്റെയും ചുവന്ന രക്താണുക്കളുടെയും അളവിലുണ്ടാകുന്ന ഗണ്യമായ കുറവ് "വിളര്‍ച്ച' എന്ന രോഗാവസ്ഥക്കിടയാക്കുന്നു .രക്തത്തിലെ ഹീമോഗ്ലോബിൻ കോശങ്ങളിലേക്ക് ഓക്സിജന്‍ എത്തിക്കുന്നതും തിരിച്ച് കാര്‍ബണ്‍ഡയോക്സൈഡിനെ ശ്വാസകോശങ്ങളിലേക്ക് എത്തിക്കുന്നതുമായ സുപ്രധാന ധര്‍മം നിർവഹിക്കുന്ന ഒരു ഘടകമാണ്. അതുമാത്രമല്ല അപകടകാരിയായ പലരോഗങ്ങൾക്ക് മുന്നോടിയായും വിളർച്ച സംഭവിക്കാം.ഹീമോഗ്ലോബിന്റെ കുറവുമൂലം കോശങ്ങള്‍ക്ക് ഓക്സിജന്‍ കിട്ടാതെവരുന്നത് ശരീരത്തിന്റെ മൊത്തം പ്രവര്‍ത്തനങ്ങളെയും ബാധിക്കുന്നതിന് കാരണമാകുന്നു.ചെറിയ ജോലി ചെയ്യുമ്പോൾ പോലും ശരീരത്തിന് കിതപ്പും ക്ഷീണവും അനുഭവപ്പെടുന്നത് വളർച്ചയുടെ ഒരു ലക്ഷണമാണ്.

പുരുഷന്മാരെ അപേക്ഷിച്ച് സ്ത്രീകളിലാണ് വിളര്‍ച്ച കൂടുതലായി കാണപ്പെടുന്നത് . ഗര്‍ഭകാലവും പ്രസവവുമായി ബന്ധപ്പെട്ട വിവിധ സങ്കീര്‍ണതകള്‍ക്കും ഇത് ഇടയാക്കാറുണ്ട്.മാത്രമല്ല മുലപ്പാലിനുപകരം പശുവിന്‍പാല്‍മാത്രം കുടിച്ചുവളരുന്ന കുട്ടികളിലും വിളര്‍ച്ച ഉണ്ടാകാനുള്ള സാധ്യത കൂടുതലായി കണ്ടുവരുന്നു.ആഹാരത്തിൽ നിന്നും ഇരുമ്പിനെ വലിച്ചെടുക്കാനുള്ള ശേഷി കുറയുന്നതും വിളർച്ചയ്ക്ക് കാരണമാകുന്നു.ശരീരത്തിലെ രക്തകോശങ്ങൾക്ക് ആവശ്യം വേണ്ട പോഷകങ്ങളുടെ കുറവുകൾ മൂലവും നമുക്ക് വിളർച്ച സംഭവിക്കാം.

ഹൃദയമിടിപ്പ് കൂടുക, തളര്‍ച്ച, ക്ഷീണം, നെഞ്ചിടിപ്പ്, കണ്‍പോളകള്‍ വിങ്ങുക, ദേഷ്യം, കിതപ്പ്, ശ്വാസംമുട്ടല്‍, തണുപ്പ് സഹിക്കാന്‍ വയ്യാതാവുക, മുടികൊഴിച്ചില്‍, തലകറക്കം, ആഹാരത്തോട് വെറുപ്പ്, വിളറിയ വെളുപ്പുനിറം, പ്രത്യേകിച്ച് കണ്ണിനുതാഴെയുള്ള ശ്ലേഷ്മസ്തരത്തിലും ചര്‍മത്തിലും നാക്കിലും, ഏകാഗ്രതക്കുറവ്, പകലുറക്കം കൂടുക, ഇരുമ്പിന്റെ അഭാവംമൂലമുണ്ടാകുന്ന വിളര്‍ച്ചയുടെ പ്രത്യേകതരം രോഗലക്ഷണമായ കല്ല്, കട്ട, അരി, പേപ്പര്‍, പെയിന്റ്, തടി, തലമുടി ഇവ കഴിക്കാന്‍ തോന്നുക, കാലില്‍ രൂപപ്പെടുന്ന നീര്, ആന്തരിക രക്തസ്രാവത്തിന്റെ മുഖ്യലക്ഷണമായ മലം കറുത്തനിറത്തില്‍ പോകുക എന്നിവ വിളർച്ചയുടെ പ്രധാന ലക്ഷണങ്ങളാണ്.

പോഷക സമൃദ്ധമായ ആഹാരം കഴിക്കുക വഴി വിളർച്ചയെ ഒരു പരിധിവരെ തടയാൻ സാധിക്കുന്നു കൂടാതെ തവിടുകളയാത്ത അരി, തുവര, ഗോതമ്പ്, ചെറുപയര്‍, പടവലം, ബീന്‍സ്, ഇലക്കറികള്‍, ശര്‍ക്കര, ഈന്തപ്പഴം, കരിപ്പെട്ടി, കപ്പലണ്ടി, എള്ള്, മാതളം, നാരങ്ങ, നെല്ലിക്ക, മുന്തിരിങ്ങ, അത്തിപ്പഴം, കോഴിയിറച്ചി, ആട്ടിറച്ചി ഇവയൊക്കെ മാറിമാറി ഭക്ഷണത്തില്‍പ്പെടുത്തുന്നത് വളരെ നല്ലതാണ്.അയല, മത്തി, ചൂര തുടങ്ങിയ മത്സ്യങ്ങളില്‍ അടങ്ങിയിരിക്കുന്ന ഇരുമ്പ് വിളർച്ചയെ തടയാൻ സഹായിക്കുന്നു.