ശരീരത്തിന്റെ ഏതു ഭാഗത്ത്‌ വേണമെങ്കിലും കാൻസർ വരാം, എന്നാൽ പെട്ടെന്ന് തിരിച്ചറിയാതെ പോകുന്ന ഒന്നാണ് തൊണ്ടയിലെ കാൻസർ. പലപ്പോഴും നിസ്സാര ലക്ഷണങ്ങളായിരിക്കും പൊതുവേ കാണപ്പെടുന്നത് എന്നത് തന്നെയാണ് പ്രധാന കാരണം. വിട്ടുമാറാത്ത തൊണ്ടവേദന മുതൽ അസാധാരണമായ വായ്നാറ്റം വരെ ചിലപ്പോൾ രോഗലക്ഷണങ്ങളായേക്കാം

ഇടക്കിടെയുള്ള ചുമ, തൊണ്ട വേദന എന്നിവ പൊതുവെ നമ്മളാരും തന്നെ അത്ര കാര്യമാക്കാറില്ല. എന്നാൽ തൊണ്ടയില്‍ എപ്പോഴും പറഞ്ഞറിയിക്കാന്‍ വയ്യാത്ത അസ്വസ്ഥതയുണ്ടാകുന്നത് തൊണ്ടയിലെ ക്യാന്‍സറിന്റെ ലക്ഷണമാണ്. തൊണ്ടയിലെ ഇന്‍ഫെക്ഷനുകളും മുറിവുകളുമെല്ലാം പൊതുവെ തൊണ്ടയിൽ കരുകരുപ്പനുഭവപ്പെടാനുള്ള കാരണങ്ങളാണ്. എന്നാൽ മരുന്ന് കഴിച്ചിട്ടും അസ്വസ്ഥത മാറാതിരിക്കുകയോ അടിക്കടി ഉണ്ടാവുകയോ ചെയ്‌താൽ വിദഗ്ധ പരിശോധന നടത്തി രോഗമില്ലെന്നു ഉറപ്പ് വരുത്തേണ്ടതാണ്.

നിര്‍ത്താതെയുള്ള ചുമ പല രോഗങ്ങളുടേയും ആദ്യ ലക്ഷണമാണെന്ന് പറയാം. ക്യാന്‍സര്‍ തൊണ്ടയിലോ ശ്വാസകോശാര്‍ബുദത്തിലോ ആണെങ്കില്‍ ഉടന്‍ തന്നെ പ്രകടമാവുന്ന ലക്ഷണങ്ങളില്‍ ഒന്നാണ് നിര്‍ത്താതെയുള്ള ചുമ. അതുകൊണ്ട് ഈ ലക്ഷണത്തെ വെറുതേ തള്ളിക്കളയരുത് .

തൊണ്ടയിലെ ക്യാന്‍സറിന്റെ ലക്ഷണങ്ങളില്‍ പ്രധാനപ്പെട്ട ഒന്നാണ് ഭക്ഷണം ഇറക്കാനുള്ള ബുദ്ധിമുട്ട്. തൊണ്ടവേദനയുള്ളപ്പോൾ ഭക്ഷണം കഴിക്കാൻ ബുദ്ധിമുട്ടുണ്ടാകുന്നത് സ്വാഭാവികമാണ്. എന്നാൽ അതികഠിനമായ വേദന അനുഭവപ്പെടുന്നുണ്ടെങ്കില്‍ അത് അര്‍ബുദത്തിന്റെ പ്രധാന ലക്ഷണമായി തന്നെ കണക്കാക്കണം. ഒരിക്കലും നിസ്സാരമായ തൊണ്ടവേദനയായി കണക്കാക്കരുത്.
ചെവി വേദനയും തൊണ്ടയിലെ ക്യാന്‍സറിന്റെ ലക്ഷണമായി കണക്കാക്കാം. തൊണ്ടവേദനയുള്ളപ്പോൾ ചെവി വേദനകൂടി വരുകയും ഭക്ഷണം കഴിക്കാൻ ബുദ്ധിമുട്ട് അനുഭവപ്പെടുകയും ചെയ്‌താൽ രോഗം ഗൗരവമായി തന്നെ കാണണം . തൊണ്ടയിലെ ക്യാന്‍സര്‍ ചെവിയിലേക്കുള്ള രക്തക്കുഴലുകള്‍ക്ക് സമ്മര്‍ദ്ദം കൊടുക്കുന്നതുകൊണ്ടാണ് ചെവി വേദന അനുഭവപ്പെടുന്നത് .

ശ്വസിക്കുമ്പോൾ വ്യത്യസ്തമായ ശബ്ദങ്ങളുണ്ടാകുന്നതും തൊണ്ടയിലെ ക്യാന്‍സറിന്റെ ഒരു ലക്ഷണം തന്നെയാകാം. ജലദോഷം ,മൂക്കടപ്പ് എന്നിവ ഉള്ളപ്പോഴും ശ്വസിക്കുമ്പോൾ ശബ്ദമുണ്ടാകാറുണ്ട്. എന്നാൽ ഈ ലക്ഷണങ്ങൾ നിലനിൽക്കുന്നെങ്കിൽ ശ്രദ്ധിക്കണം. ക്യാന്‍സര്‍ ബാധ ഗുരുതരമായാല്‍ ശബ്ദം നഷ്ടപ്പെടുന്ന അവസ്ഥ വരെ ഉണ്ടായേക്കാം. ശബ്ദത്തിനു പെട്ടെന്നുണ്ടാകുന്ന മാറ്റം നിസാരമായി അവഗണിയ്ക്കരുത് .

ചിലരില്‍ ശ്വാസമെടുക്കാനുള്ള ബുദ്ധിമുട്ട് കാണാറുണ്ട്. ഇത് ആസ്ത്മ ആണെന്ന് കരുതുന്നവരാണ് അധികവും . പക്ഷെ ചിലപ്പോള്‍ തൊണ്ടയിലെ ക്യാന്‍സറിന്റെ ലക്ഷണമായിരിക്കാം ഇത്. അതുകൊണ്ട് ഇത്തരം രോഗലക്ഷണങ്ങൾ കണ്ടാൽ സ്വയം ചികിത്സക്ക് മുതിരാതെ എത്രയും വേഗം വിദഗ്ധ പരിശോധന നടത്തണം . പ്രാരംഭദശയില്‍ കണ്ടുപിടിച്ചാല്‍ തൊണ്ടയിലെ കാൻസർ പൂർണമായും സുഖപ്പെടും