സ്തനാര്ബുദത്തിന് ഒറ്റമൂലി കണ്ടെത്തിയെന്നോ?
11 ദിവസം കൊണ്ട് സ്തനാര്ബുദത്തെ ഇല്ലാതാക്കിയ ഒരു മരുന്നു കണ്ടെത്തി എന്ന വാര്ത്തയാണ് ഇപ്പോള് മെഡിക്കല് ലോകത്തിന്റെയാകെ ശ്രദ്ധയാകര്ഷിച്ചിരിക്കുന്നത്. സ്തനങ്ങളില് കണ്ടെത്തിയ മുഴകളെ ഈ മരുന്നു നീക്കം ചെയ്ത വേഗത അവിശ്വനീയമെന്നാണ് ഡോക്ടര്മാര് പറയുന്നത്. വര്ഷങ്ങളോളം മരുന്നു കഴിച്ചാല് മാത്രം കിട്ടുന്ന ഫലങ്ങളാണ് വിരലിലെണ്ണാവുന്ന ദിവസങ്ങള്കൊണ്ട് ഈ പുതിയ മരുന്ന് നല്കിയിരിക്കുന്നത്.
സ്തനാര്ബുദത്തിനു നല്കാറുള്ള രണ്ടു മരുന്നുകള് ഒരേസമയം ഉപയോഗിക്കാന് ശ്രമിച്ചപ്പോഴാണ് അവിശ്വനീയമായ ഫലങ്ങള് വെളിപ്പെട്ടത്. സ്തനാര്ബുദം കണ്ടെത്തിയ 7 ബ്രിട്ടീഷ് യുവതികളോടാണ് ഹെര്സെപ്റ്റിന് എന്ന മരുന്നും ടൈകേര്ബ് എന്ന മരുന്നും ഒരുമിച്ച് ഉപയോഗിക്കാനാവശ്യപ്പെട്ടത്. സാധാരണയായി ഇവയില് ഏതെങ്കിലും ഒന്നു മാത്രമാണ് ഒരു രോഗിയ്ക്കു കഴിക്കാന് നല്കാറുള്ളത്.
മേല്പ്പറഞ്ഞ ഏഴുപേരില് 3 സെ.മീറ്റര് വലിപ്പമുള്ള മുഴയുണ്ടായിരുന്ന യുവതിയുടെ സ്തനത്തില്നിന്നും അത് തീര്ത്തും ഇല്ലാതായി.വേറെ 11 പേരില് ഇതു പരീക്ഷിച്ചപ്പോള് മുഴകളെല്ലാം വലിയ തോതില് ചുരുങ്ങി എന്നു കണ്ടെത്തി. ഇത് ആയിരക്കണക്കിന് സ്ത്രീകള്ക്ക് കീമോതെറാപ്പി ചികില്സ ഒഴിവാക്കാന് ഇടയാക്കിയേക്കുമെന്നാണ് കരുതുന്നത്.
ആംസ്റ്റര്ഡാമില് ഇന്നലെ നടന്ന യൂറോപ്യന് ബ്രെസ്റ്റ് കാന്സര് കോണ്ഫറന്സിലാണ് ഈ കണ്ടെത്തലുകള് അവതരിപ്പിച്ചത്. യൂണിവേഴ്സിറ്റി ഓഫ് എഡിന്ബറോയിലെ കാന്സര് വിദഗ്ദ്ധന് പ്രൊഫസര്.ഡേവിഡ് കാമറൂണാണ് ഈ മരുന്നുകള് ഇപ്രകാരം പരീക്ഷിക്കുന്നതിന് നേതൃത്വം നല്കിയത്.
ഈ രണ്ടു മരുന്നുകളും ഒന്നിച്ചു നല്കുമ്പോള് എന്തുകൊണ്ടാണ് ഇത്ര നല്ലഫലം ഉണ്ടാവുന്നതെന്നതിന്റെ കാരണം അവര്ക്കും ഇതുവരെ മനസ്സിലായിട്ടില്ല. അവ രണ്ടും ചേരുമ്പോള് കാന്സര് കോശങ്ങളുടെ അനുക്രമമായുള്ള വിഭജനവും വികസനവും തടയുന്നതായും കോശങ്ങളെ തീര്ത്തും ഇല്ലാതാക്കുന്നതായും പിന്നീട് വീണ്ടും ഉണ്ടാകുന്നതില് നിന്നും തടയുന്നതായും കണ്ടെത്തിയിട്ടുണ്ട്. മറ്റുതരം കാന്സറുകളില് ഇതു ഫലപ്രദമാണോ എന്ന് ഇതുവരെ പരീക്ഷിച്ചു നോക്കിയിട്ടില്ല.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha