കരിമ്പനിക്കെതിരെ കരുതലോടെ മെഡിക്കല് കോളേജ്
പത്തനാപുരത്തെ പിറവന്തൂര് പഞ്ചായത്തിലെ ചെമ്പനരുവില് കരിമ്പനി സ്ഥിരീകരിച്ചതോടെ അതിനെതിരേയുള്ള പ്രതിരോധ പ്രവര്ത്തനങ്ങളുമായി തിരുവനന്തപുരം ഗവ. മെഡിക്കല് കോളേജ് സജ്ജമായി. ഇതിന്റെ മുന്നോടിയായി പ്രിന്സിപ്പാളിന്റെ നിര്ദ്ദേശാനുസരണം മെഡിക്കല് കോളേജിലെ വിദഗ്ധ സംഘം ചെമ്പനരുവിയിലെ കരിമ്പനി ബാധിതപ്രദേശം സന്ദര്ശിച്ച് സ്ഥിതിഗതികള് വിലയിരുത്തി. രോഗലക്ഷണമുള്ള ചില വ്യക്തികളെ പരിശോധിക്കുകയും രക്തസാമ്പിള് പരിശോധനയ്ക്കായി എടുക്കുകയും ചെയ്തു. ഇതോടൊപ്പം കൊല്ലം ജില്ലാ മെഡിക്കല് സംഘം ഈ പ്രദേശത്തെ 287 വീടുകള് സന്ദര്ശിക്കുകയും പനിയേയും രോഗബാധയേയും കുറിച്ച് അന്വേഷിക്കുകയുമുണ്ടായി.
കരിമ്പനി ബാധിതപ്രദേശത്ത് മെഡിക്കല് ക്യാമ്പ്
ആരോഗ്യവകുപ്പിലേയും മെഡിക്കല് കോളേജിലേയും വിദഗ്ധ ഡോക്ടര്മാരുടെ നേതൃത്വത്തില് ഏപ്രില് 28-ാം തീയതി ചെമ്പനരുവിലെ കരിമ്പനി ബാധിത പ്രദേശത്ത് മെഡിക്കല് ക്യാമ്പ് സംഘടിപ്പിക്കാന് പ്രത്യേക മെഡിക്കല് സംഘം തീരുമാനിച്ചു. ക്യാമ്പില് പങ്കെടുക്കുന്നവരില് രോഗലക്ഷണമുള്ളവര്ക്ക് പ്രത്യേക പരിശോധനകളും വിദഗ്ധ ചികിത്സയും തിരുവനന്തപുരം മെഡിക്കല് കോളേജ് ആശുപത്രിയില് നിന്നും ലഭ്യമാക്കും.
പഞ്ചായത്ത് പ്രതിനിധികളുടേയും മറ്റ് സന്നദ്ധ സംഘടനകളുടേയും നേത്യത്വത്തില് പ്രദേശത്തെ എല്ലാ കുടുംബാംഗങ്ങളേയും ക്യാമ്പില് എത്തിക്കാനുള്ള ശ്രമം നടത്തും. ഇതോടൊപ്പം സംയുക്തമായ ആരോഗ്യ വിദ്യാഭ്യാസ ബോധവല്ക്കരണവും നടത്തും.
രോഗ പ്രതിരോധ പ്രവര്ത്തനത്തിനും മണലീച്ചയുടെ ഉറവിട നശീകരണ പ്രവര്ത്തനവും ദ്രുതഗതിയിലാക്കാനും തീരുമാനിച്ചു. വെറ്റിനറി ഡിപ്പാര്ട്ടുമെന്റിന്റെ സഹകരണം ഉള്പ്പെടുത്തി പ്രതിരോധപ്രവര്ത്തനം കൂടുതല് ശക്തിപ്പെടുത്തും.
മെഡിസിന് ആന്റ് ഹെമറ്റോളജി വിഭാഗം അഡീഷണല് പ്രൊഫസര് ഡോ. ശ്രീനാഥിന്റെ നേത്യത്വത്തില് ഇന്ഫക്ഷ്യസ് ഡിസീസ് അസിസ്റ്റന്റ് പ്രൊഫസര് ഡോ. അതുല്, സ്റ്റേറ്റ് പി.ഇ.ഐ.ഡി സെല് അസിസ്റ്റന്റ് പ്രൊഫസര് എം.ശിവന്കുട്ടി നായര്, ഡോ. അഞ്ജന, കമ്മ്യൂണിറ്റി മെഡിസിനിലെ ഡോ. മാത്യു എന്നിവര് അടങ്ങുന്നതായിരുന്നു വിദഗ്ധ മെഡിക്കല് സംഘം.
എന്താണ് കരിമ്പനി?
ഉത്തരേന്ത്യയിലും ലോകത്തിന്റെ മറ്റു ചില ഭാഗങ്ങളിലും വ്യാപകമായി കണ്ടു വരുന്ന പകര്ച്ചപ്പനിയാണ് കരിമ്പനി അഥവാ കാലാ അസാര്. ലീഷ്മാനിയാസിസ് എന്ന രോഗം ആന്തരികാവയവത്തെ ബാധിക്കുമ്പോഴാണ് കരിമ്പനി ഉണ്ടാകുന്നത്. തൊലിപ്പുറത്തെ മുഴകളും പാടുകളുമായും ഈ രോഗം പ്രത്യക്ഷപ്പെടാം. കേരളത്തിന്റെ ആദിവാസി മേഖലകളില് ഇത്തരം രോഗങ്ങള് റിപ്പോര്ട്ട് ചെയ്യപ്പെടുന്നുണ്ട്.
കേരളത്തില് കരിമ്പനി അപൂര്വമായി മാത്രമേ കാണാറുള്ളൂ. രണ്ട് വര്ഷങ്ങള്ക്ക് മുമ്പ് തൃശൂര് മലപ്പുറം ജില്ലകളിലായി മൂന്നു പേരില് കരിമ്പനി സ്ഥിരീകരിച്ചിരുന്നു. തിരുവനന്തപുരം മെഡിക്കല് കോളേജില് 2005ലാണ് കരിമ്പനി റിപ്പോര്ട്ട് ചെയ്തത്.
കൊതുകുകളുടെ മൂന്നിലൊന്ന് വലിപ്പമുള്ള മണലീച്ചകള് അഥവാ സാന്റ് ഫ്ളൈ ആണ് കരിമ്പനി പരത്തുന്നത്. ഈ പ്രാണികള് പൊടിമണ്ണിലാണ് മുട്ടയിട്ട് വിരിയിക്കുന്നത്. പൊടിമണ്ണ് ധാരാളമായി കാണുന്ന സ്ഥലങ്ങളിലും അകവശം പൂശാത്ത ചുമരുകളുള്ള വീടുകളിലും ഈ ജീവികളെ ധാരളമായി കാണാം. മണലീച്ചകളെ നശിപ്പിക്കുകയും അവ വളരുന്ന ചുറ്റുപാടുകള് ഇല്ലാതാക്കുകയും ചെയ്യുക എന്നതാണ് പ്രധാന രോഗ പ്രതിരോധ മാര്ഗം.
മാരകമായ രോഗമായതിനാല് കരിമ്പനി വളരെ ശ്രദ്ധിക്കേണ്ടതുണ്ട്. വിട്ടുമാറാത്ത പനിയോടൊപ്പം രക്തക്കുറവ്, ക്ഷീണം എന്നിവയാണ് കരിമ്പനിയുടെ പ്രധാന ലക്ഷണങ്ങള്. ആന്തരികാവയവങ്ങളായ പ്ലീഹ, കരള്, അസ്ഥിമജ്ജ തുടങ്ങിയവയെ ബാധിക്കുന്നു. വേണ്ടത്ര ശ്രദ്ധിച്ചില്ലെങ്കില് മരണകാരണവുമാകും. കൃത്യമായ സമയത്ത് രോഗനിര്ണയം നടത്താന് കഴിഞ്ഞാല് പൂര്ണമായി ചികിത്സിച്ച് ഭേദമാക്കാന് കഴിയുന്ന രോഗമാണ് കരിമ്പനി.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
