ദിനവും ഗോമൂത്രം കുടിക്കും ,ആനപ്പിണ്ട ചായ ഒരു പ്രശ്നമേ അല്ല ! വെളിപ്പെടുത്തി നടന് അക്ഷയ്കുമാർ
താന് ദിവസേന ഗോമൂത്രം കുടിക്കാറുണ്ടെന്ന് ബോളിവുഡ് നടന് അക്ഷയ്കുമാറിന്റെ വെളിപ്പെടുത്തല്. ഇന് ടു ദ വൈല്ഡ് എന്ന ടെലിവിഷന് പരിപാടിയുടെ പ്രമോഷന് പരിപാടിക്കിടെയാണ് അക്ഷയ് കുമാറിന്റെ വെളിപ്പെടുത്തല്. ആരോഗ്യപരമായ കാരണങ്ങളാല് ദിവസവും ഗോമുത്രം കുടിക്കാറുണ്ടെന്ന് ഒരു ഇന്സ്റ്റഗ്രാം ലൈവിനിടെയാണ് താരത്തിന്റെ വെളിപ്പെടുത്തല്.
മാന് വേഴ്സസ് വൈല്ഡ് എന്ന ടെലിവിഷന് സീരിസിലൂടെ ശ്രദ്ധേയനായ ബെയര് ഗ്രില്സിനൊപ്പമായിരുന്നു ഇന്സ്റ്റഗ്രാം ലൈവ്. ബെയര് ഗ്രില്സ് അവതാരകനാവുന്ന, ഡിസ്കവറി ചാനലിന്റെ പ്രശസ്ത അഡ്വഞ്ചര് ഷോ ആയ ഇന്ടു ദി വൈല്ഡിന്റെ പുതിയ എപ്പിസോഡില് അക്ഷയ് കുമാര് പങ്കെടുക്കുന്നുണ്ട്. അതിന്റെ പ്രചരണാര്ഥമാണ് ഇന്സ്റ്റഗ്രാം ലൈവ് സെഷന് സംഘടിപ്പിച്ചത്. അക്ഷയ് കുമാറിനൊപ്പം അദ്ദേഹമിപ്പോള് അഭിനയിച്ചുകൊണ്ടിരിക്കുന്ന ചിത്രമായ 'ബെല്ബോട്ട'ത്തിലെ സഹതാരമായ ഹുമ ഖുറേഷിയും ഉണ്ടായിരുന്നു. സിനിമയുടെ ഷെഡ്യൂള് പുരോഗമിക്കുന്ന സ്കോട്ട്ലന്ഡിലെ ഗ്ലാസ്ഗോയില് നിന്നാണ് ഇവര് ഇരുവരും സെഷനില് പങ്കെടുത്തത്. ഇന്ടു ദി വൈല്ഡ് എപ്പിസോഡില് അക്ഷയ് കുമാറിന് ആനപിണ്ടം ചേര്ത്ത ഒരു പാനീയം ബെയര് ഗ്രില്സ് കുടിയ്ക്കാന് നല്കുന്നുണ്ട്. ഇതിനകം പുറത്തുവന്ന ഷോയുടെ പ്രൊമോ വീഡിയോയില് അക്ഷയ് കുമാര് ഒരു പാനീയം കുടിയ്ക്കുന്നതിന്റെ ദൃശ്യങ്ങളും ഉണ്ടായിരുന്നു. ഇത് ഒരു വെല്ലുവിളി ആയിരുന്നോയെന്ന ഗ്രില്സിന്റെ ചോദ്യത്തിന് മറുപടി പറയവെയാണ് അക്ഷയ് കുമാര് ഗോമൂത്രം കുടിയ്ക്കുന്ന തന്റെ പതിവിനെക്കുറിച്ചും പറഞ്ഞത്.
"ആയുര്വേദ സംബന്ധമായ കാരണങ്ങളാല് ഞാന് എല്ലാ ദിവസവും ഗോമൂത്രം കുടിയ്ക്കാറുണ്ട്. അതിനാല് എനിയ്ക്ക് ഇതൊരു പ്രശ്നമായി തോന്നിയില്ല", അക്ഷയ് കുമാര് പറഞ്ഞു. ഉത്തരത്തില് അന്തംവിട്ട ഗ്രില്സ് തന്റെ അതിഥികളില് ഭൂരിഭാഗം പേരും അങ്ങനെ പറയാറില്ലെന്ന് അഭിപ്രായപ്പെട്ടു. "ആളുകള് പ്രശസ്തരാവുമ്പോള് തങ്ങളുടെ കംഫര്ട്ട് സോണിന് പുറത്തുള്ള കാര്യങ്ങള് ചെയ്യാന് മടിക്കും. കാരണം മറ്റൊരു രീതിയില് കാണപ്പെടുവാന് അവര് ആഗ്രഹിക്കുന്നില്ല", എന്നാല് അക്ഷയ് കുമാര് എന്ത് വെല്ലുവിളിയെയും സ്വീകരിക്കുന്ന കൂട്ടത്തില് പെടുന്ന ആളാണെന്നും ഗ്രില്സ് പറഞ്ഞു. മൈസൂരുവിലെ ബന്ദിപ്പൂര് ടൈഗര് റിസര്വിലാണ് അക്ഷയ് കുമാര് പ്രത്യക്ഷപ്പെടുന്ന ഇന്ടു ദി വൈല്ഡ് ചിത്രീകരിച്ചിരിക്കുന്നത്. ഡിസ്കവറി പ്ലസില് ഇന്നും ഡിസ്കവറി ചാനലില് 14നുമാണ് ഷോ സംപ്രേഷണം ചെയ്യുക.
നേരെത്തെ പ്രധാനമത്രി നരേന്ദ്രമോദിയും സ്റ്റൈൽ മന്നൻ രജനികാന്തും മാന് വേഴ്സസ് വൈല്ഡ് എന്ന പരിപാടിയുടെ ഭാഗമായിരുന്നു. ബെയർ ഗ്രിൽസ് അവതാരകനായ പ്രധാനമന്ത്രിയുടെ ഷോ ഒരേ സമയം പ്രശംസയും വിമർശനവും ഏറ്റുവാങ്ങിയിരുന്നു. മുതലകുഞ്ഞുങ്ങൾക്കൊപ്പം ചെലവഴിച്ചതിനെ പറ്റിയുള്ള വെളിപ്പെടുത്തൽ പ്രധാനമന്ത്രി ആദ്യം നടത്തിയതും ഈ ഷോയിൽ ആയിരുന്നു. ഉത്തരാഖണ്ഡിലെ ജിം കോർബെറ്റ് പാർക്കിൽ കഴിഞ്ഞ ഫെബ്രുവരി 14നാണ് മോദി പങ്കെടുത്ത എപ്പിസോഡ് ഷൂട്ടു ചെയ്തത്. അന്നായിരുന്നു കശ്മീരിലെ പുൽവാമയിൽ 40 പാരാമിലിറ്ററി സൈനികർ കൊല്ലപ്പെട്ട ഭീകരാക്രമണമുണ്ടായത്. പുൽവാമ സംഭവം അറിഞ്ഞിട്ടും മോദി ഷൂട്ടിങ് തുടർന്നുവെന്ന് അന്നു പ്രതിപക്ഷം ആരോപണമുന്നയിച്ചിരുന്നു. വന്യജീവി സംരക്ഷണത്തിലേക്കു വെളിച്ചം വീശുന്ന തുറന്ന സഞ്ചാരമെന്നാണു പരിപാടി വിശേഷിപ്പിക്കപ്പെടുന്നത്. മുൻ അമേരിക്കൻ പ്രസിഡന്റ് ബറാക് ഒബാമയടക്കമുള്ള ലോക നേതാക്കളും ഒട്ടേറെ ഹോളിവുഡ് താരങ്ങളും ‘മാൻ വേഴ്സസ് വൈൽഡ്’ സീരീസിൽ ബെയറിനൊപ്പം ചേർന്നിട്ടുണ്ട്.
https://www.facebook.com/Malayalivartha