നെടുമങ്ങാട് മന്ത്രി റിയാസ് പങ്കെടുക്കുന്ന പാലം ഉദ്ഘാടനത്തിനു വന്നില്ലെങ്കിൽ നൂറു രൂപ പിഴ ഈടാക്കുമെന്നു കുടുംബശ്രീ അംഗങ്ങൾക്കു പഞ്ചായത്തംഗത്തിന്റെ മുന്നറിയിപ്പ്. ആനാട് പഞ്ചായത്ത് സിപിഐ വാർഡ് മെമ്പർ എ.എസ്.ഷീജയുടെ ശബ്ദസന്ദേശം ആണ് പുറത്ത് വന്നത്. ഞായറാഴ്ച വൈകിട്ടാണ് മന്ത്രി മുഹമ്മദ് റിയാസ് പഴകുറ്റി പാലം ഉദ്ഘാടനം ചെയ്യുന്നത്. ഈ ചടങ്ങിൽ എല്ലാ കുടുംബശ്രീ അംഗങ്ങളും പങ്കെടുക്കണമെന്നു നിർദേശിച്ചു കൊണ്ട് വാട്സാപ് ഗ്രൂപ്പിലാണ് ഷീജ ശബ്ദസന്ദേശം പങ്കുവച്ചത്.

മന്ത്രി ജി.ആർ.അനിലിന്റെ മണ്ഡലത്തിലാണു ചടങ്ങ്. ‘‘പ്രിയപ്പെട്ട കുടുംബശ്രീ അംഗങ്ങളെ, വരുന്ന ഞായറാഴ്ച നമ്മുടെ പഴകുറ്റി പാലത്തിന്റെ ഉദ്ഘാടനമാണ്. പൊതുമരാമത്ത് മന്ത്രി മുഹമ്മദ് റിയാസ് ഉദ്ഘാടനം ചെയ്യും. നെടുമങ്ങാടിന്റെ മന്ത്രി ജി.ആർ.അനിൽ ആണ് അധ്യക്ഷത വഹിക്കുന്നത്. രണ്ടു മന്ത്രിമാർ പങ്കെടുക്കുന്ന പരിപാടിയാണ്. നമ്മുടെ വാർഡിലാണ് ഈ പാലം സ്ഥിതി ചെയ്യുന്നത്. വരുന്ന ഞായറാഴ്ച ഒരു കുടുംബശ്രീയും വയ്ക്കേണ്ടതില്ല. കുടുംബശ്രീയിലുള്ള എല്ലാവരുമായി ക്യത്യം നാലരയ്ക്കു പഴകുറ്റി പാലത്തിൽ എത്തിച്ചേരുക. വരാത്തവരിൽനിന്നു നൂറു രൂപ പിഴ ഈടാക്കുന്നതാണ്’’– എന്നാണ് ശബ്ദസന്ദേശം.

ആനാട് ഗ്രാമപഞ്ചായത്ത് മെമ്പർ ഷീജ തന്റെ വാർഡിലെ കുടുംബശ്രീ അംഗങ്ങൾക്ക് അയച്ച ഓഡിയോ സന്ദേശമാണ് പുറത്തായത്. ഓഡിയോ സന്ദേശത്തിൽ പറയുന്നത് ഇങ്ങനെ: ''12-ാം തീയതി പഴകുറ്റി പാലത്തിന്റെ ഉദ്ഘാടനമാണ്. വൈകുന്നേരം നാല് മണിക്ക് പൊതുമരാമത്ത് മന്ത്രി മുഹമ്മദ് റിയാസ് ഉദ്ഘാടനം ചെയ്യുന്നു. നെടുമങ്ങാടിന്റെ മന്ത്രി ജി ആർ അനിലാണ് അധ്യക്ഷസ്ഥാനം വഹിക്കുന്നത്. രണ്ട് മന്ത്രിമാർ പങ്കെടുക്കുന്ന പരിപാടിയാണ്.

നമ്മുടെ വാർഡിലാണ് ആ പാലം സ്ഥിതി ചെയ്യുന്നത്. വരുന്ന ഞായറാഴ്ച ഒരു കുടുംബശ്രീയും വെക്കേണ്ടതില്ല. ലോണോ മറ്റ് കാര്യങ്ങൾ ഉണ്ടെങ്കിൽ ശനിയാഴ്ച കുടുംബശ്രീ വെക്കുക. ഞായറാഴ്ച മുഴുവൻ കുടുംബശ്രീ അംഗങ്ങളും കൃത്യം നാലരമണിക്ക് പഴകുറ്റിയിൽ എത്തിച്ചേരേണ്ടതാണ്. കൃത്യമായ കാരണങ്ങൾ ഇല്ലാത്ത ഒരാൾ പോലും പരിപാടിയിൽ വരാതിരിക്കരുത്. അഞ്ചരമണിയോടെ നിങ്ങൾക്ക് തിരിച്ചുപോകാം. വരാത്തവരിൽ നിന്നും ഫൈൻ ഈടാക്കുന്നതാണ് 100 രൂപ. ഓഡിയോ പുറത്തായതിന് പിന്നാലെ വാർഡ് മെമ്പർക്കെതിരെ നിരവധിയാളുകൾ രംഗത്തെത്തിയിട്ടുണ്ട്.

പാലം ഉദ്ഘാടനത്തിന് എത്താത്ത കുടുംബശ്രീ അംഗങ്ങളോട് എന്തടിസ്ഥാനത്തിലാണ് ഫൈനടിക്കുമെന്ന് പറയുന്നതെന്ന് ഇവർ ചോദിക്കുന്നു. മന്ത്രിമാരുടെ പരിപാടിക്ക് വരുന്നതാണോ തങ്ങളുടെ ജോലി എന്നു കുടുംബശ്രീ അംഗങ്ങളും ചോദിക്കുന്നു. റോഡ് നവീകരണത്തിന്റെ ഭാഗമായി കിള്ളിയാറിന് കുറുകെയുള്ള പഴകുറ്റി പാലം 2021 ഡിസംബറിലാണ് പൊളിച്ചത്.

പഴകുറ്റി മംഗലപുരം റോഡ് നവീകരണത്തിന്റെ ഭാഗമായി ദശാബ്ദങ്ങൾ പഴക്കം വരുന്ന കിള്ളിയാറിന് കുറുകെയുള്ള പഴകുറ്റി പാലമാണ് പൊളിച്ചു പണിതത്. ഒരു വർഷംകൊണ്ട് പാലം പണിയും റോഡ് പുനരുദ്ധാരണവും പൂർത്തിയാക്കും എന്നാണ് സ്ഥലം എംഎൽഎയും മന്ത്രിയുമായ ജി ആർ അനിൽ അറിയിച്ചിരുന്നത്. എന്നാൽ അത് നീണ്ടുപോയി. ഇപ്പോഴാണ് നിർമ്മാണ പ്രവർത്തനങ്ങൾ പൂർത്തിയായത്.