ഒമാനിൽ എ.സിയിൽ നിന്നും തീപടർന്ന് വീടിനുള്ളിലുണ്ടായിരുന്ന എട്ടു കുട്ടികളടക്കം സ്വദേശികളായ പത്ത് പേർ മരിച്ചതായി റിപ്പോർട്ടുകൾ. വടക്കൻ ബാത്തിന ഗവർണറേറ്റിലെ സഹമിൽ വീടിനാണ് തീപിടിത്തമുണ്ടായതെന്ന് അധികൃതർ അറിയിച്ചു. അതേസമയം മരിച്ച പത്തു പേരും ഒരു കുടുംബത്തിലെ അംഗങ്ങളാണ്.

ഖോർ അൽ ഹമാം ഗ്രാമത്തിലെ വീട്ടിൽ വ്യാഴാഴ്ച പുലർച്ചെയാണ് ദാരുണമായ അപകടം നടന്നത്. മാതാപിതാക്കളും കുട്ടികളുമാണ് മരിച്ചതെന്ന് ഉദ്യോഗസ്ഥർ വ്യക്തമായിട്ടുണ്ട്. എ.സിയിൽ നിന്ന് തീ പടർന്നതിനെത്തുടർന്നുണ്ടായ പുക ശ്വസിച്ചാണ് മരണം സംഭവിച്ചത്. പുക പടർന്നതിനെ തുടർന്ന് മുകളിലത്തെ നിലയിൽ ഉറങ്ങി കിടന്നവർക്ക് രക്ഷപ്പെടാൻ സാധിക്കാതെ വരുകയായിരുന്നു. സഹം ആശുപത്രിയിലേക്ക് മാറ്റിയ മൃതദേഹങ്ങൾ ഉച്ചയോടെ ഖബറടക്കി.

സമീപ കാലത്തുണ്ടായ ഏറ്റവും ദാരുണമായ തീപിടിത്ത അപകടങ്ങളിൽ ഒന്നാണ് സഹമിലേത്. സഹം വാലിയടക്കം ഉന്നത സർക്കാർ ഉദ്യോഗസ്ഥർ സ്ഥലത്തെത്തി തുടർനടപടികൾക്ക് നേതൃത്വം നൽകി.