യു.എ.ഇയില്‍ ദീർഘകാലത്തേക്കുള്ള പുതിയ താമസവിസ അനുവദിക്കാനുള്ള തീരുമാനത്തിന് മന്ത്രിസഭ അംഗീകാരം നല്‍കി. നിക്ഷേപകർക്കും വ്യവസായികൾക്കും കലാ സാംസ്‌കാരിക മേഖലകളിലെ പ്രതിഭകൾക്കും ശാസ്ത്ര ബഹിരാകാശ വൈജ്ഞാനികമേഖലകളിലെ പ്രൊഫഷണലുകൾക്കും ഗവേഷകർക്കും അവരുടെ കുടുംബത്തിനും മികവ് തെളിയിച്ച വിദ്യാര്‍ത്ഥികള്‍ക്കുമാണ് പത്തുവര്‍ഷം വരെ കാലവധിയുള്ള ദീർഘകാലവിസ അനുവദിക്കുക.

വിവിധ വിഭാഗങ്ങളില്‍പ്പെട്ടവര്‍ക്ക് വ്യവസ്ഥകളോടെ അഞ്ചു വര്‍ഷം മുതല്‍ 10 വരെ കാലാവധിയുള്ള വിസയാണ് അനുവദിക്കുക. ഭാര്യക്കും മക്കള്‍ക്കും ഇതേ ആനുകൂല്യം ലഭിക്കും. അതേസമയം നിക്ഷേപത്തിന്റെ തോത് അനുസരിച്ച്‌ രണ്ടു വിഭാഗങ്ങളായാണ് വന്‍കിട നിക്ഷേപകര്‍ക്ക് ദീര്‍ഘ കാല വിസ അനുവദിക്കുക.

റിയല്‍ എസ്റ്റേറ്റ് മേഖലയില്‍ 50 ലക്ഷം ദിര്‍ഹമോ അതിലധികമോ മൂല്യമുള്ള ആസ്തിയില്‍ നിക്ഷേപമിറക്കിയവര്‍ക്ക് അഞ്ചു വര്‍ഷ വിസ അനുവദിക്കും. മറ്റു കമ്ബനികളിലും ബിസിനസ് പങ്കാളിത്തത്തിലും മറ്റുമായി ഒരു കോടി ദിര്‍ഹമോ അതിലധികമോ വരുന്ന പൊതുനിക്ഷേപം നടത്തിയവര്‍ക്കും, റിയല്‍ എസ്റ്റേറ്റ് ഇതര മേഖലകളിലായി ഒരു കോടിയില്‍ കുറയാത്ത നിക്ഷേപം നടത്തിയവര്‍ക്കും 10 വര്‍ഷം കാലാവധിയുള്ള വീണ്ടും പുതുക്കാവുന്ന വിസയും അനുവദിക്കും. നിക്ഷേപം പൂര്‍ണമായും സ്വന്തമായിരിക്കണം. വായ്പ എടുത്തതാവരുത്. മൂന്നു വര്‍ഷമെങ്കിലും കാലാവധിയുള്ള നിക്ഷേപമായിരിക്കണം. കുടുംബത്തിനുപറമേ ബിസിനസ് പങ്കാളികള്‍ക്കും ഒരു എക്സിക്യൂട്ടീവ് ഡയറക്ടര്‍ക്കും ഒരു ഉപദേഷ്ടാവ് എന്നിവര്‍ക്കും ഇതേ കാലയളവുള്ള വിസ അനുവദിക്കും. ദീര്‍ഘകാല വിസക്ക് അപേക്ഷിക്കുന്നവര്‍ക്ക് അപേക്ഷ നടപടികള്‍ പൂര്‍ത്തീകരിക്കാന്‍ യുഎഇയിലേക്ക് വരാന്‍ അനുമതിയുണ്ടാകും.

ഡോക്ടർമാർക്കും വിദഗ്ധർക്കും ഈ ആനുകൂല്യത്തിന് നിബന്ധനകളുണ്ട്. ഡോക്ടർമാർ ലോകത്തിലെ മികച്ച 500 യൂണിവേഴ്‌സിറ്റികളിലൊന്നിൽനിന്ന് പിഎച്ച്.ഡി. സ്വന്തമാക്കിയവരായിക്കണം. ജോലിയിൽ മികവിന്റെ അംഗീകാരം ലഭിച്ചവരും ശാസ്ത്രീയപരിശോധനകളിൽ സംഭാവനകൾ നൽകിയവരും ശാസ്ത്രപുസ്തകങ്ങളിൽ ലേഖനങ്ങൾ പ്രസിദ്ധീകരിച്ചവരും പത്തുവർഷത്തിലധികം പ്രവൃത്തിപരിചയമുള്ളവരുമായിരിക്കണം. ശാസ്ത്രജ്ഞർക്ക് എമിറേറ്റ്‌സ് സയന്റിസ്റ്റ് കൗൺസിലിന്റെ അംഗീകാരം ലഭിച്ചിരിക്കണം. ശാസ്ത്രരംഗത്തെ മികവിനുള്ള ശൈഖ് മുഹമ്മദ് ബിൻ റാഷിദ് മെഡൽ നേടിയവർക്കും വിസ ആനുകൂല്യം ലഭിക്കും. സാംസ്കാരിക വൈജ്ഞാനിക മന്ത്രാലയത്തിന്റെ അംഗീകാരം ലഭിച്ച കലാ സാംസ്കാരിക രംഗങ്ങളിൽനിന്നുള്ള വ്യക്തിത്വങ്ങൾക്കും അന്താരാഷ്ട്ര അംഗീകാരം ലഭിച്ച കമ്പനികളുടെ എക്സിക്യുട്ടീവുകൾക്കും ഏറ്റവും മികച്ച നിലവാരം പുലർത്തിയ വിദ്യാർഥികൾക്കും അഞ്ചുവർഷം വിസ ആനുകൂല്യം ലഭ്യമാണ്.