ചില്ഡ്രന്സ് ഹോം ലൈബ്രറി കെട്ടിടത്തിന്റെ ഉദ്ഘാടനം മന്ത്രി കെ.കെ. ശൈലജ ടീച്ചര് നിര്വഹിച്ചു, കുട്ടികളുടെ മാനസിക ആരോഗ്യ നിലവാരം ഉയര്ത്തുന്നതിന് നിരവധി പദ്ധതികളാണ് സംസ്ഥാന സര്ക്കാര് ആവിഷ്കരിച്ച് വരുന്നതെന്ന് മന്ത്രി
വനിത ശിശുവികസന വകുപ്പ് പൂജപ്പുര ചില്ഡ്രന്സ് ഹോമില് പുതുതായി നിര്മ്മിച്ച ലൈബ്രറി കെട്ടിടത്തിന്റെ പ്രവര്ത്തനോദ്ഘാടനം ആരോഗ്യ സാമൂഹ്യനീതി വനിത ശിശുവികസന വകുപ്പ് മന്ത്രി കെ.കെ. ശൈലജ ടീച്ചര് നിര്വഹിച്ചു. ജുവനല് ജസ്റ്റിസ് ആക്ട് (കെയര് പ്രൊട്ടക്ഷന്) പ്രകാരം സമൂഹത്തില് ശ്രദ്ധയും സംരക്ഷണയും അര്ഹിക്കുന്ന വിഭാഗം കുട്ടികളെ ശിശുക്ഷേമ സമിതിയുടെ അംഗീകാരത്തോടെയാണ് ചില്ഡ്രന്സ് ഹോമില് പ്രവേശനം നല്കുന്നത്. ഇത്തരം കുട്ടികളുടെ മാനസിക ആരോഗ്യ നിലവാരം ഉയര്ത്തുന്നതിന് നിരവധി പദ്ധതികളാണ് സംസ്ഥാന സര്ക്കാര് ആവിഷ്കരിച്ച് വരുന്നതെന്ന് മന്ത്രി പറഞ്ഞു. പ്രത്യേക ശ്രദ്ധയും പരിചരണവും ആവശ്യമുള്ള കുട്ടികള്ക്ക് മെച്ചപ്പെട്ട ഭൗതിക സാഹചര്യങ്ങള് ഒരുക്കി ജീവിതത്തിന്റെ മുഖ്യധാരയിലേക്ക് കൊണ്ടു വരുന്നതിന്റെ ഭാഗമായാണ് 45 ലക്ഷം രൂപ ചെലവഴിച്ച് ഈ കെട്ടിടം നിര്മ്മിച്ചിട്ടുള്ളത്. ഈ സ്ഥാപനത്തിലെ കുട്ടികള്ക്ക് മെച്ചപ്പെട്ട പഠനത്തിനും വിനോദത്തിനും വേണ്ട സൗകര്യങ്ങള് ഒരുക്കുന്നതിന് വേണ്ടി ലൈബ്രറി, സിക്ക് റൂം, റിക്രിയേഷന് റൂം എന്നിവയും ഉള്പ്പെടുത്തിയിട്ടുള്ളത്. ഇത് കുട്ടികളുടെ ബൗദ്ധിക വികാസത്തിന് വലിയൊരളവുവരെ സഹായകമായിരിക്കും. വായനാശീലം വളര്ത്തുന്നതിനും അവര്ക്ക് സന്തോഷം പകരുന്നതിനും ഇത് ഉപകരിക്കുമെന്നും മന്ത്രി പറഞ്ഞു.
ഒ. രാജഗോപാല് എം.എല്.എ. അധ്യക്ഷനായ ചടങ്ങില് വനിത ശിശുവികസന വകുപ്പ് ഡയറക്ടര് ഷീബജോര്ജ് ഐ.എ.എസ്., കൗണ്സിലര് വിജയലക്ഷ്മി ബി., ചെല്ഡ് വെല്ഫെയര് കമ്മിറ്റി മെമ്പര്മാരായ രാജഗോപാല് എം., ഷീല എ., അജിത് വെണ്ണിയൂര്, ജുവനല് ജസ്റ്റിസ് ബോര്ഡ് മെമ്പര് ഫിലോമിന സെഡറിക്, സൂപ്രണ്ട് കെ. ശ്രീകുമാര് എന്നിവര് പങ്കെടുത്തു.
"
https://www.facebook.com/Malayalivartha
