കുവൈത്തില്‍ അന്തരീക്ഷം മഞ്ഞുമൂടിയത് ഗതാഗതം ദുഷ്‌കരമാക്കി. വെള്ളിയാഴ്ച രാത്രിമുതല്‍ കനത്ത മഞ്ഞുണ്ടായിരുന്നു.പകലില്‍ ഇടക്ക് തെളിഞ്ഞും ഇടക്ക് മൂടിക്കെട്ടിയും തുടര്‍ന്നു. പുലര്‍ച്ചെ ഇടക്ക് സൂര്യന്‍ അല്‍പം തെളിഞ്ഞപ്പോള്‍ ആകാശം കാഴ്ചഭംഗിയുള്ളതായി. കാഴ്ച പരിധി വളരെ കുറഞ്ഞത് കാരണം നിരത്തില്‍ വാഹനങ്ങള്‍ ഇഴഞ്ഞുനീങ്ങി. തൊട്ടുമുന്നിലുള്ള വാഹനങ്ങള്‍ പോലും കാണാന്‍ പ്രയാസപ്പെട്ടു.

വാഹനമോടിക്കുന്നവര്‍ ജാഗ്രത പുലര്‍ത്തണമെന്ന് ആഭ്യന്തര മന്ത്രാലയം മുന്നറിയിപ്പ് നല്‍കി. മൂടിക്കെട്ടല്‍ വിമാനത്താവളത്തിന്റെ പ്രവര്‍ത്തനത്തെ ബാധിച്ചില്ലെന്ന് സിവില്‍ വ്യോമയാന വകുപ്പ് മേധാവി എന്‍ജി. ഇമാദ് അല്‍ സനൂസി അറിയിച്ചു.

അതേസമയം, തുറമുഖത്തിന്റെ പ്രവര്‍ത്തനം ഇടക്ക് അല്‍പ സമയം നിര്‍ത്തേണ്ടി വന്നു. ശുഐബ, ദോഹ, ശുവൈഖ് തുറമുഖങ്ങളില്‍ ചരക്കുനീക്കത്തെ ബാധിച്ചു.